Publikuar më 21.03.2025 nga shekulli_admin

Kryeministri Edi Rama ka zhvilluar një takim me kandidatët për deputetë të Partisë Socialiste në qarkun e Durrësit, ku ka nënvizuar rëndësinë e zgjedhjeve të 11 majit, duke i cilësuar ato si një moment me peshë të veçantë gjeopolitike.

Sipas tij, këto zgjedhje dallojnë nga të mëparshmet për shkak të ndikimit të tyre në të ardhmen e vendit, duke bërë një krahasim me zgjedhjet e vitit 1991, kur Shqipëria vulosi ndarjen nga komunizmi dhe kalimin në një sistem demokratik.

“Zgjedhjet e 11 majit kanë një komponent ndryshe nga të tjerat. Ato kanë një komponent gjeopolitik që, besoj unë, zgjedhjet e kanë pasur vetëm në fillimet e transformimit demokratik pas rënies së komunizmit në 1991 kur shqiptarët morën një vendim për të vulosur përfundimisht ndarjen me një kohë dhe sistem tjetër duke përqafuar një sistem të ri vlerash”, tha Rama.

Gjatë takimit me kandidatët për deputetë të PS në Durrës, kryeministri Edi Rama ka theksuar rëndësinë e zgjedhjes së PS për të siguruar të ardhmen e fëmijëve, duke përmendur mundësinë e dërgimit të studentëve shqiptarë në universitete të Bashkimit Evropian.

Rama u shpreh se nuk mund të kuptojë se si një prind nga Durrësi, edhe nëse nuk është pjesë e PS, mund të hedhë votën e tij në “kënetë”, duke iu referuar opozitës, për të mbështetur opsione që nuk garantojnë mundësi për fëmijët e tij.

Ai theksoi se për çdo prind që ka fëmijë 14 ose 12 vjeç, është një mundësi e jashtëzakonshme që të bëhet pjesë e një procesi që do t’u mundësojë fëmijëve të shkojnë në universitete të BE, në vend që të jenë studentë të huaj.

“Votat që jepen për PS nuk janë vetëm për të fituar zgjedhjet, por për të siguruar një të ardhme më të mirë për fëmijët tuaj. Nuk mund të hedhësh votën kot për tifozllëk. Duhet ta vendosni në kutinë e PS për të siguruar pasaportën për fëmijët tuaj që të kenë mundësi të shkojnë në universitet dhe të mos kenë barriera për të studiuar dhe punuar kudo në BE,” tha Rama.

“Nuk e kuptoj dot se si mund të jetë ndryshe përveçse një prind këtu në Durrës që nuk ka lidhje me PS, që i ka fëmijët 14 vjeç, 12 vjeç nuk ka rëndësi, por që kur mbaron mandati ynë i katërt do t’i çojnë në universitet jashtë shtetit. Po ta marrin votën e tyre dhe ta hedhin në kënetë. Këneta që po flas unë i merr të keqen kënetën këtu në Durrës se me gjithë këtë punë që po bëjmë me Anin po transformohet ditë për ditë. Ta hedhë votën në kënetë për tifozllëk kot, ndërkohë që atë votë duhet ta marrë dhe fusë te kutia e PS, për të marrë pasaportë për fëmijët që ka 14 vjeç. Që kur të bëhet 18 vjeç, ta çojë në universitet, të mos jetë student i huaj por i BE që të shkojë ku të dojë. Ajo që ndodhi me studentët në Britaninë e Madhe të jetë mësim për prindërit këtu”, tha Rama.