Publikuar më 05.02.2025 nga shekulli_admin

Arratisja e 49-vjeçarit Daut Laze nga Burgu i Shenkollit në Lezhë ka çuar në arrestimin e tre punonjësve të këtij institucioni. Sipas burimeve, pas përfundimit të veprimeve hetimore dhe analizimit të situatës, Shërbimi i Kontrollit të Brendshëm ka arrestuar 3 punonjës të IEVP Shenkoll.

Ndaj tyre është ngritur akuza për shpërdorim detyre, pasi në momentin e arratisjes së Daut Lazes ata ishin në shërbim dhe nuk kanë përmbushur detyrat e tyre sipas ligjit.

Daut Laze

Pavarësisht kontrolleve dhe shpërblimit prej 10 mijë eurosh ofruar për informacion, policia nuk ka arritur ende të gjejë gjurmët e 49-vjeçarit Daut Laze.Policia ka vënë shpërblim për këdo që jep detaje në lidhje me vendndodhjen e Daut Lazes, 49-vjeçarit që u arratis mbrëmjen e djeshme nga burgu i Shënkollit në Lezhë.

Blutë kanë vlerësuar se i arratisuri paraqet rrezikshmëri shoqërore ndaj ka apeluar për ndihmë nga qytetarët.

Laze është arrestuar në vitin 2021, për veprën penale “Dhuna në familje”, dhe në vitin 2024, Gjykata e Tiranës i ka caktuar masën “Mjekimi i detyruar në një institucion mjekësor”.

Arratisja

Laze vuante dënimin në burgun e Shënkollit në Lezhë, të shndërruar prej më shumë se 2 vitesh, në strehën e përkohshme të të burgosurve me probleme të shëndetit mendor.

Mbrëmjen e së hënës, (3 shkurt 2025) 49-vjeçari nga Çorovoda, por me banim në Tiranë, i cili ndodhej i shtruar në dhomën e mjekimeve në spitalin e burgut të Shënkollit. I dënuari me mjekim të detyruar, ka mundur të largohet nga rrethimi i institucionit të posaçëm mjekësor brenda burgut, duke kapërcyer murin. Mungesa e tij në dhomë u vu re vetëm në orët e para të mëngjesit të së martës gjatë ndërrimit të turneve dhe kryerjes së apelit.

Pas kontrollit të menjëhershëm nga stafi i policisë në institucion, është vërejtur se ky shtetas me mjekim të detyruar ka shfrytëzuar hapësirat e mundshme të cilat janë në parametrat e institucionit të posaçëm mjekësor për tu larguar nga rrethimi i institucionit. Aktualisht, po analizohen pamjet e kamerave për të zbardhur dinamikën e plotë të ngjarjes.  

Policia tha se menjëherë pas njoftimit nga Drejtoria e Përgjithshme e Burgjeve, se në orët e para të mëngjesit të sotëm, gjatë ndërrimit të turneve dhe kryerjes së apelit në Institucionin e Posaçëm Mjekësor, Lezhë, është konstatuar mungesa e pacientit, shtetasit Daut Laze, 49 vjeç, shërbimet e Policisë së Shtetit kanë organizuar punën dhe po kryejnë kontrolle intensive për gjetjen e tij.

Sqarojmë se shtetasi Daut Laze është arrestuar në vitin 2021, për veprën penale “Dhuna në familje”, dhe në vitin 2024, Gjykata e Tiranës i ka caktuar masën “Mjekimi i detyruar në një institucion mjekësor”.

49-vjeçari paraqet rrezikshmëri shoqërore, prandaj kërkojmë ndihmën e qytetarëve, për të njoftuar menjëherë Policinë e Shtetit, për çdo të dhënë në lidhje me vendndodhjen e tij.

Në bashkëpunim me Drejtorinë e Përgjithshme të Burgjeve, vijon puna për lokalizimin dhe kapjen e 49-vjeçarit.

Policia e Shtetit ka vendosur shpërblimin 10 000 euro për çdo informacion të vlefshëm mbi vendndodhjen e këtij shtetasi. Qytetarët mund të njoftojnë në numrin pa pagesë 112 të Policisë së Shtetit dhe në numrin 068 200 29 61, të vendosur nga Drejtoria e Përgjithshme e Burgjeve.