Publikuar më 25.04.2023 nga shekulli_admin

Megi Pojani ka reaguar dhe njëherë për videon që bëri xhiron e rrjetit ku shfaqej duke u tallur në varreza. Teksa ishte e ftuar mëmgjesin e sotëm “Wake Up”, moderatorja sqaroi dhe njëherë se videoja është filmuar rreth 3 vite më parë dhe nuk e di se kush e ka ripublikuar atë. Ajo shtoi se tashmë e ka kuptuar ndikimin që ka në publik dhe ka kërkuar dhe njëherë falje të gjithë personave që janë prekur nga veprimi i saj.

“Nuk kam guxuar që të hap videon, e kështu më ka ndodhur edhe herë të tjera. Më merrnin në telefon, madje edhe motrat e mia. Është video e para 3 viteve. Kam kërkuar ndjesë për këtë video. Ka një tranzicion që kam ndjekur si personazh, si njeri.

Në rrjetet sociale kam nisur që të postoja shumë kohë më parë dhe nuk e dija çfarë postoja. Por tani kam kuptuar se kur bën diçka pa asnjë qëllim dhe postohet tani, merr një konotacion tjetër. Ky është një mësim që duhej të merrja. Unë kam kërkuar një falje publike, është hera e parë që e bëj një gjë të tillë. Ju kërkoj falje njerëzve që akoma nuk e kanë kaluar dhimbjen e madhe të një njeriu që nuk e kanë më që e kanë dashur fort. Ju kërkoj falje njerëzve që janë të ndjeshëm nga ai vend”.

Më tej, Megi ka shpjeguar e ëma e saj qan sa herë që shkojnë në varreza dhe kjo nuk i pëlqen ndaj përpiqet që të ç’dramatizojë situatën.

Përsa i përket reagimit të të atit pas kësaj video, Megi shprehet se ai është njësoj si ato  që përpiqet gjithmonë që të bëjë familjen të lumtur dhe të qeshë.

“Por duhet të shpjegoj diçka, për mënyrën se si e kam parë dhe pse e kam bërë. Kur ajo video është bërë, para se të bëhej, unë jam mësuar nga familja ime të jem shumë familjare. Unë dhe motrat e shoqërojmë mamin, nuk është një proces që mami shkon aty dhe ne e presim. Ne shkojmë atje, përveshim mëngët, mbushim ujë. Duhet të shkulësh barin me rrënjë, të marrësh sende pastrimi. Këtë gjë e bëj 2-3 herë në vit.

Si mundem unë të tregoj mungesë respekti. Isha mbi varrin e stërgjyshes sime. Një proces shumë intim. Mami im është shumë e ndjeshme. Mami është gjithmonë duke qarë edhe pse ai person mund të ketë vdekur shumë vite më parë. Unë nuk e shoh mamin tim duke qarë, dhe bashkë me motrat e mia mundohemi të bëjmë diçka. Pastaj babi im është njësoj si ne, në kuptimin që për familjen jemi aty dhe përpiqemi gjithmonë të ngremë dhe karikojmë njëri-tjetrin.

E përsëris kam marrë shumë mesazhe për këtë, sigurisht shumë mesazhe urrejtje, por edhe mesazhe njerëzish që e kuptojnë. Jo të gjithë njerëzit e përjetojnë dhe menaxhojnë dhimbjen në të njëjtën formë. Ky ka qenë një rast që unë kam qenë shumë neutrale, pra është një njeri që unë nuk e kam njohur, një njeri që mamaja ime e ka dashur, që familjarët e mi kanë pasur një respekt.”- përfundoi Megi.