Publikuar më 06.12.2024 nga shekulli_admin

Sali Berisha hedh poshtë çdo opsion që Lulzim Basha të jetë pjesë e listave të kandidatëve të PD për deputet, në zgjedhjet e ardhshme parlamentare të 11 Majit 2025.

Në një konferencë për shtyp nga selia blu, i pyetur nëse Basha do të kandidojë për deputet si përfaqësues i listës së PD, Berisha dha këtë përgjigje:

“Jashtë çdo lloj mundësie, aq sa mund të jetë Taulant Balla. Nuk i referohem vetëm Toyota Yaris, ata u mpleksën shumë me njëri-tjetrin. Janë disa çështje”.

Ndërsa pyetjes nëse do e heqë Bashën nga Grupi Parlamentar i PD-së, ish-kryeministri iu përgjigj: “Vëllain siamez të Taulant Ballës do e lëmë me Taulant Ballën. Ai nuk ka rëndësi regjistri, ai është si binjak siamez i Taulant Ballës”.

Deklarata e Berishës

Kuvendi reflektoi kërkesën tuaj për të qenë edhe formalisht pjesë e grupit parlamentar të PD, ju tashmë jeni pjesë e grupit dhe formalisht nga Kuvendi. Ju do ta përjashtoni Lulzim Bashën nga grupi parlamentar i PD, meqenëse ai vazhdon të jetë pjesë e grupit parlamentar, formalisht në parlament?
Berisha: Vëllain siamez të Taulant Ballës do e lëmë me Taulant Ballën. Ai nuk ka rëndësi regjistri, ai është si binjak siamez i Taulant Ballës.

Duke qenë se nuk po jepni një përgjigje, a do ta hiqni apo jo nga lista dhe grupi i PD, a do të jetë Lulzim Basha pjesë e listave të kandidatëve të PD, për deputet?Berisha: Jashtë çdo lloj mundësie, aq sa mund të jetë Taulant Balla.

I referoheni çështjes ‘Toyota Yaris’, z. Berisha, meqenëse bëtë këtë?
Berisha: Nuk i referohem vetëm Toyota Yaris, ata u mpleksën shumë me njëri-tjetrin. Janë disa çështje.

Pëgjigjia e Bashës

Lulzim Basha ka reaguar mbi prononcimin e dhënë nga kreu demorkat, Sali Berisha i cili i ka cilësuar deklarata politike akuzat e bëra në vitin 2021 nga Gazment Bardhi që Berisha bashkëpunonte ngushtë me bandën e Suel Çelës, kohë kur PD ishte e përçarë dhe në krye qëndronte Basha.

Në postimin e tij ai e quan Berishën të shitur tek Edi Rama, si një bashkëpunëtor të krimit, i cili ka pranuar të qëndrojë nën pushtetin e kryeministrit.

Ndër të tjera ai shkruan se Berisha e ka të pamundur të mbijetojë pa një kundërshtar politik teksa thotë se i ka mbetur vetëm Lulzim Basha ai me të cilin mund të lëshojë në publik deklarata qesharake, referuar këtu cilësimit si deklarata politike akuza të Bardhit në 2021.

Postimi i plotë i Lulzim Bashës:

Fatkeqësisht, dosjet e Sali Berishës e kanë kthyer atë në asetin e Edi Ramës, të cilin e përdor për të mbajtur debatin publik larg aferave të panumërta korruptive të qeverisë dhe lidhjeve të saj të tmerrshme me krimin.

Është e turpshme, që Berisha pranon të jetë nën patronazhimin e Edi Ramës, të cilit i dha votat për të amnistuar të korruptuarit e tij, për mbylljen e listave, për pazarin e radhës me Gjykatën Kushtetuese, dhe në këmbim, mori vulën përmes një vendimi skandaloz, që Berisha e përdor jo për t’i shërbyer opozitës, por problemeve të tij me drejtësinë.

Është e kuptueshme, që politikisht Berisha nuk mund të ekzistojë pa një armik, kështu që, përsa kohë Trekëndëshi i Bermudës po shtrëngon radhët në përballjen me SPAK-un, i ngelem vetëm unë me të cilin mund të merret për të hedhur në publik shashka qesharake.

Ndaj jemi më të vendosur se kurrë për të mos i lënë demokratët pa alternativën e duhur dhe të besueshme, me të cilën të ndihen të përfaqësuar, të nderuar dhe jo të tradhëtuar.

“Deklaratat politike, janë politike, nuk kanë asnjë vlerë. E vërteta është se askush nuk e ka denoncuar më shumë se Sali Berisha Suel Çelën, dhe çdo Suel Çelë. Sa i përket lidhjeve me Edi Ramën, është shumë evidente, provohet në të gjitha dokumentet se ai është marr me fushatën elektorale të Edi Ramës, e thotë dhe vetë, është edhe Taulant Balla. Dhe një tjetër që është shpall anëtar i asaj bande, tha që kryetari i vërtetë është Edi Rama dhe ai i din’, tha Berisha në një prononcim prë median pasi doli nga Kuvendi”, ka deklaruar Sali Berisha ditën e djeshme.