Publikuar më 13.04.2024 nga shekulli_admin

Ardit Kërtusha, ish-drejtues i Forumit Rinor të Partisë Socialiste, Leonard Kadrimi, ish- zv.drejtor i Agjencisë Shtetërore të Kadastrës në Durrës dhe 14 persona të tjerë, dyshohen të përfshirë në një skemë masive të falsifikimit të pronave në zonën e Spitallës.

Hetimi për rastin nisi në 2023 mbi bazën e kallëzimit të Fiqiri Shabës, i cili pretendonte pronësinë mbi dy sipërfaqe toke, kur një ditë konstatoi se një pjesë e pronës ishte rrethuar nga një mur betoni. Kallëzuesi thotë nuk e dinte kush ishte zaptuesi, por hetuesit zbuluan se prona ishte shitur dy herë dhe i kishte kaluar një kompanie private.

Në kuadër të hetimit, prokuroria ka në gjurmët e Lirim Xhametës, një ish punëtor ferme, në emër të cilit ishte regjistruar 75 mijë metra katrorë tokë. Xhameta iu tha hetuesve se një person i identifikuar me emrin Diti i kishte premtuar se do ti bënte dokumentet për të përfituar 3 mijë metra tokë.

“Dy muaj më vonë, Diti më takoi dhe më dha një AMTP të paplotësuar. Më tha që duhet ta firmos”, tregon Xhameta.

Ai thotë se në një takim te tretë, Diti I kishte thënë që do ti jepte 200 mijë lekë në këmbim të pronës. “Shkova te noteri unw, gruaja dhe djali. Firmosëm një akt përfaqësimi në emër të një personi që nuk e njihnim dhe morëm paratë”, tregon Xhameta.

Sipas prokurorisë prona e regjistruar, e cila më pas është ndarë e tjetërsuar, edhe përfituar në mënyrë të paligjshme. Me të njëjtën skemë u regjistrua në emër të të ndjerit Dilaver Taulla sipërfaqja prej 76 mijë metrash katrorë dhe trashëgimtarët e tij e mësuan se ishin pronarë në 2010.

Edhe në këtë rast, Ardit Kërtusha iu mori kartat e identitetit trashgëmitarëve të Dilaver Taulla, duke iu premtuar se do tiu rregullonte pronë që iu takonte sipas ligjit.

Por nga hetimet rezulton se pronat ne emër të Xhametës dhe Taulla ishin regjistruar me dokumente të falsifikuara dhe më pas ishin futur në regjistrat kadastralë, me ndihmën e zyrtarëve te ASHK Leonard Kadrimi Aida Kila dhe Mikel Zaho.

Prokurori Pali Decolli zbuloi se skema e tjetërsimit të pronave shtetërore në Spitallë të Durrësit është shumë më e gjerë. Ai vendosi sekuestron mbi sipërfaqen prej 448.000 m2, e cila nga hetimet rezulton se është tjetërsuar përmes falsifikimit nga zyrtarë shtetërore.

Dosja

Toka me sipërfaqe 75 mijë metër katror, e cila rezultoi në pronësi të Lirim Xhametës, në fakt nuk ishte e tija, pasi vetë ai pas marrjes në pyetje deklaroi se asnjëherë nuk ka pasur dijeni të jetë përfitues i kësaj sipërfaqe pranë Universitetit të Durrësit. Për të kryer këtë manovër, mes familjes Xhameta dhe Gjovalin Ndocit është nënshkruar një prokurë te noteri, përmes së cilës në fakt autorizohet Ndoci që të vijojë me shitjen e pronave 75 mijë metër katror, por në fakt Xhametët nuk kishin asnjë ide të tillë. Familja dha firma në këmbim të 200 mijë lekëve, të cilat iu dhanë nga “Diti”, emrin e të cilit Lirimi nuk e di, por që ishte ai u kërkoi ta nënshkruajnë dokumentin te noteri. Pas kësaj, Gjovalin Ndoci shiti në subjekte të ndryshme pasurinë në 4 pjesë me një vlerë totale 17 milionë lekë brenda vetëm 20 ditëve.

Akti i marrjes së tokës në pronësi në emër të Xhametës rezulton që në qershor 1999 dhe dyshohet se është tërësisht i falsifikuar pasi vetë Lirim Xhameta nuk ka asnjë dijeni se ka përfituar tokën si ish-pronar dhe aq më tepër në sipërfaqe kaq të madhe. Regjistrimi i kësaj toke është futur arbitrarisht në arkivën e Kadastrës së Durrësit në vitin 2019, në numër reference të vitit 2010. Nga verifikimi rezulton se faqet e shtuara nuk kanë linjë kronologjike me ato paraardhëse dhe pasardhëse dhe 2 të pyeturit, Shpresa Kaloshi, plotësuese e inventarit dhe kryeregjistruesi Bedri Luku mohojnë të kenë nënshkruar në këto faqe. Po ashtu janë falsifikuar edhe rivlerësimet e pronave që kapin vlerën totale prej 270 milionë lekësh. Për të regjistruar të katër pasuritë në emër të Lirim Xhametës, Gjovalin Ndoci ka dorëzuar fillimisht te noteri dhe më pas në ASHK certifikata pronësie dhe harta treguese të falsifikuara si të jenë të vitit 2010 dhe kartela pasurie në emër të Lirim Xhametës, por pa datë regjistrimi. Këto janë bërë nga juristi Mikel Zako dhe hartografi Malvino Turku, të ngarkuar nga përgjegjësia e zonës Albana Gjoni dhe të gjitha veprimet në ASHK janë bërë në një ose dy ditë. Të gjitha veprimet e para në maj 2019 janë bërë nga ish-juristja në ASHK Durrës, Aida Kila.

76 mijë metër katror tokë tjetër, u regjistruara në emër të një personi të vdekur ne vitin 2003, Dilaver Taulla

E njëjta skemë është përdorur edhe për përfitimin e 76 mijë metër katror tokë tjetër, kësaj here të regjistruara në emër të një personi të vdekur ne vitin 2003, Dilaver Taulla. Për këtë, Krenar Karati kontaktoi djalin e Taullës, Dashnor Taullën, të cilit i tha se njihte një person që mund t’i rregullonte dokumentet për të përfituar tokë, Ardit Kërtushën! E gjitha familja ka firmosur te noteri, pa e ditur saktësisht çfarë do të përfitojnë. Muaj më vonë Dashnori u ka kërkuar llogari se çfarë po ndodhte, dhe ka debatuar me Ardit Kërtushën, por Krenari i ka garantuar se çdo gjë është në rregull. Pas nisjes së hetimeve Dashnor Taulla është pyetur në prokurori dhe pas kësaj ka takuar Arditin dhe Krenarin, por Arditi i ka thënë se marrëveshjen e ka pasur me Krenarin dhe jo me Dashnorin.

Në prokurori Kërtusha ka mohuar të njihet me familjen Taulla. Hetuesit sekuestruan te noteri dokumentin ku familja Taulla kishte firmosur se ishte pronare e 76 mijë metrave katror tokë dhe në lidhje me to i japin tagër të plotë tjetërsimit të saj Oliver Xhamuçës. Aktet në Kadastrën e Durrësit janë tërësisht të falsifikuara pasi Dilaver Taulla ka vdekur në vitin 2003 dhe sipas familjarëve nuk kanë pasur asnjë dijeni se në 2010-ën atij i takonte tokë në Spitallë si ish-pronar. Edhe në këtë rast faqet e shtuara nuk kanë linjë kronologjike dhe po ashtu kryeregjistruesi mohon të ketë nënshkruar dhe aq më pak te ketë lëshuar certifikatat për këto prona. Po ashtu rivlerësimet e këtyre pasurive janë të falsifikuara dhe kapin vlerën e 273 milionë e 600 mijë lekëve. Për të gjitha këto manovra, Oliver Xhamuça u tha hetuesve se nuk njihte asnjë prej anëtarëve të familjes Taulla, por kishte firmosur disa dokumente te noteri pasi ia kishte kërkuar Ardit Kërtusha, që do përfitonte tokë dhe i kishte premtuar para. Të gjithën sipas tij e ka bërë për nder të “Ditit” dhe më pas nuk kishte asnjë dijeni se çfarë është bërë.

Nga hetimi ka rezultuar se i gjithë mekanizmi në të dyja rastet si në atë të Lirim Xhametës dhe të Dilaver Taullës është identik dhe është bërë nga të njëjtët persona????. Në lidhje me këtë veprimtari kriminale, Prokuroria e Durrësit lëshoi 16 masa sigurie për ish-zyrtarë dhe pronarë. Lirim Xhameta përfitoi 200 mijë lekë përfitim dhe anëtarët e tij të familjes ishin në dijeni. Gjovalin Ndoci pasi bëhet pronar në vetëm 20 ditë i shet të gjitha. Dashnor Taulla ka përfituar para, ndërsa familjarët e tij kanë pasur dijeni se babai i tyre nuk ka pasur tokë dhe me dashje kanë ndihmuar Dashnorin, Krenar Karatin dhe Ardit Kërtushën të përfitojnë. Oliver Xhamuça, edhe pse i pakujdesshëm në leximin e dokumenteve që firmosi, sërish me dijeni ndihmoi Kërtushën në veprimtarinë kriminale në këmbim të parave. Punonjësit e Kadastrës së Durrësit, zv. drejtori Leonard Kadrimi dhe juristët Aida Kila dhe Mikel Zahi, me verime dhe mosveprime krijuan lehtësira për tjetërsimin e pasurive me sipërfaqe 151 mijë metra katror.

Sipas të njëjtës skemë janë përfituar dhe sipërfaqe të tjera toke në Durrës, nga persona të ndryshëm që prokuroria i ka në hetim. Në total janë 448 mijë metra katorë tokë shtet që i kanë kaluar privatëve me dokumente false.