Publikuar më 29.04.2024 nga shekulli_admin

Pas vendosjes së një sasie tritoli në banesën e gjyqtarit të Shkodrës, Tonin Stërkaj, Këshilli i Lartë Gjyqësor në mbledhjen e sotme ka vendosur të caktojë mbrojtje për gjykatësin dhe familjen e tij.

Të gjithë anëtarët vendosën me vota unanime që për një periudhë 6 mujore, Gjyqtari Stërkaj dhe familjat e tij të vendoset në mbrojtje nga efektivë të policisë së shtetit dhe repartit “RESI”.

Kujtojmë se rreth orës 03:00 të mëngjesit, një shpërthim ka ndodhur në lagjen “Tom Kola”. Gjyqtarit Sterkaj i ishte vendosur lënda plasëse te porta e oborrit të banesës. Si pasojë e shpërthimit, pati vetëm dëme materiale.

Është zbardhur dëshmia e gjyqtarit në Shkodër Tonin Sterkaj para policisë për tritolin e vendosur në portën e banesës së tij. Mësohet se Sterkaj para uniformave blu ka deklaruar se nuk ka probleme me njerëz. Ai ka theksuar se dyshimet në lidhje me tritolin në banesë, i ka te profesioni i tij si gjyqtar.

Autori ka qenë me kapele në kokë dhe është afruar pranë portës së hekurt ku ka hedhur lëndën plasëse dhe është larguar sërish në këmbë, duke shfrytëzuar disa rrugica në zonë. Kamerat e sigurisë kanë filmuar ngjarjen dhe po ashtu janë marrë dhe pamjet e kamerave të tjera në zonë për të parë lëvizjet e autorit.

Shpërthimi me tritol ka ndodhur në orat e para të mëngjesit në Shkodër, në banesën e gjyqtarit Sterkaj. Shpërthimi ka ndodhur rreth orës 03:00 të mëngjesit.

Ministri i Brendshëm, Taulant Balla, sulmin ndaj gjyqtarit në Shkodër Tonin Sterkaj e ka konsideruar një akt burracakësh, i cili duhet të zbardhet sa më parë.

Ai bëri thirrje, që kjo ngjarje të zbardhet sa më parë dhe personat e përfshirë të vihen menjëherë para përgjegjësisë.

“Sulmi ndaj gjyqtarit është një sulm burracakësh. Unë kam marrë një komunikim me magjistratin dhe i kam shprehur solidariteti. Strukturat do të ofrojnë mbrojte personale dhe të familjes së magjistratit.

Është momenti për të dhënë mesazh ndaj kushdo që ka hartuar dhe është bërë pjesë e këtij akti intimidues, mezi pres, orë pas ore, raportimet e punës së posaçme të ngritur në Shkodër, që shpresoj që në orët në vijim të ketë gjëra konkrete.

I bëj thirrje kujtdo të heqë dorë  nga çdo forme intimidimi ndaj sistemit gjyqësor. Na duhet më shumë mbështetje ndaj magjistratëve, të cilët duhet ta kryejnë detyrën të pandikuar”, tha ai.

Ai tha se e vlerëson punën që po bën prokuroria dhe policia e Shkodrës për zbardhjen e këtij rasti.

“Do të ishte jo etike nga ana ime, pa pasur një panoramë të qartë. E vlerësoj shumë punën që po bëhet në Shkodër nga prokuroria dhe Policia, që po hetojnë për këtë rast”, tha ai.

Teksa u pyet se sa ndikon gjuha sulmuese e politikanëve në nxitjen e akteve të tilla ndaj gjyqtarëve (referuar këtu etiketimeve të Ilir Metës ndaj kreut të SPAK, Altin Dumani), ministri Balla u shpreh:

“Retorika që ju përmendet, i bën dëm dhe është e papranueshme. Në këtë kuptim gjithkush të vetëpërmbahet dhe të respektojë vendimet e drejtësisë”, tha Balla.

Një ditë pas ngjarjes së rëndë në Shkodër, ku banesa e gjyqtarit Tonin Sterkaj u sulmua me lëndë eksplozive, Këshilli i Lartë Gjyqësor vendosi të marrë në mbrojtje magjistratin dhe familjen e tij për gjashtë muajt e ardhshëm.