Publikuar më 10.01.2024 nga shekulli_admin

Ish-ministri i Mbrojtjes, Fatmir Mediu ka dëshmuar ditën e sotme në GJKKO lidhur me dosjen “Gërdeci”. Ai deklaruar se nuk kam shkelur autoritetin e FA-ve, teksa shtoi se i vetmi akt shqetësues ka qenë një raport i policisë ushtarake ku përmendeshin se në Gërdec po shembeshin godina pa leje.

“Çështje që për vite më radhë është hedhur baltë, sot duket se s’ka të bëjë me interesa të ministrit, sepse s’ka pasur njohje dhe asnjë kontakt me kompaninë shqiptare dhe amerikane. Nuk kam shkelur autoritetin e FA-ve… I vetmi akt shqetësues ka qenë një raport i policisë ushtarake ku përmendeshin se në Gërdec po shemben godina pa leje.

S’ka asnjë shqetësim tjetër dhe s’ka asnjë diskutim për këtë çështje… Vlerësimi ishte pozitiv. 15 para se të ndodhte shpërthimi kishte një diskutim në shtab, ku thuhej se Gërdeci ishte investim i mirë. Këtë dokument e keni në fashikujt e prokurorisë”, tha ai për gazetarët.

Ish-ministri i Mbrojtjes, Fatmir Mediu deklaroi se duhet të deklasifikohen raportet e Këshillit të Sigurisë Kombëtare sa i takon çështjes së Gërdecit.

Ai tha për mediat se i ka kërkuar Presidencës një shkresë për raportit në fjalë, ndërsa kjo gjë duhej të ishte bërë nga Prokuroria.

Mediu u shpreh për mediat se sot doli qartë se Gërdecin nuk e ka përcaktuar ministri ka ardhur e përcaktuar nga kompania.

“Dua që të gjithë ta keni të qartë se sot doli se Gërdecin nuk e ka përcaktuar ministri ka ardhur e përcaktuar nga kompania. Urdhri 2044 është i përgatitur nga shtabi i përgjithshëm, strukturat e shtabit. Çështjet që ngriti Pinari nuk i përkasin Ministrisë së Mbrojtjes. Vendimi i Këshillit të Ministrave përcakton detyra për MEICO-n, dhe përcakton se ka nevojë për demontimin. Në FA nuk mund të ketë urdhër ministri, përndryshe nuk do flisnim për FA. Ministria e Mbrojtjes ka zbatuar detyrimet ndërkombëtare e ligjore, dhe VKM me detyrën që iu la. Ministri ndërton komisionin për çmimet dhe të kategorizimit, më pas vihet në lëvizje ministri Urdhri ka ardhur nga shtabi i përgjithshëm.”, tha ai.

Po ashtu ai shtoi se; “Ka pasur një mbledhje të Këshillit Kombëtar, të cilët nuk kanë përjashtuar mundësinë e ndërhyrjes për të krijuar një situatë para se të ndodhte anëtarësimi në NATO. Na u dha paralajmërim se duhet të kishim kujdes për ndonjë ngjarje para se të anëtarësoheshim në NATO. Këto dokumente duhet të ishin deklasifikuar. Di që është kërkuar që të bëhet një eksperiment me atë shkak që ndodhi shpërthimi. Djali i Deliut ka thënë se babai i tij ka qenë në shtëpi dhe se nuk kishte bërë asnjë saldim. Është në interes të Shqipërisë që të bëjë një hetim.”.

Pyetje: Çfarë nuk është deklasifikuar?
Mediu: Raporti i Këshillit të Sigurisë Kombëtare, raportet apo dokumentet që kanë vajtur për këtë çështje. Duhet të jepen deponimet e tyre. I kam kërkuar presidentit që të na japë me shkrim këtë dokument që ta depozitoj. Këtë informacion duhet ta kishte marrë prokuroria me kohë.

Dëshmia e ish-drejtorit të MEICO-s

Ish-drejtor i kompanisë MEICO, Ylli Pinari pasi dëshmoi në GJKKO për ‘Gërcedin’ u ndal në një prononcim për mediat. Ai tha se përgjegjës për ngjarjen e rëndë të Gërdecit janë Forcat e Armatosura dhe kompania kontraktore.

“Shpërthimi është përgjegjësi e Forcave të Armatosura. Ato nuk kanë kryer asnjë nga detyrat që u përcakton legjislacioni, vendimet e qeverisë dhe urdhrat e ministrit. Për mua është përgjegjësi e tyre e të operatorit që duhet të zbatonte rregullat që ne i kishim caktuar në kontratë”, deklaroi ai.

Më tej ai shtoi se “MEICO” kishte për detyrë të merrte në dorëzim dhe të dorëzonte municionin.

“MEICO kishte detyrën të merrte në dorëzim dhe të dorëzonte municionin, kaq. Vet statusi i MEICO është ndërmarrje që përfaqëson interesat e pronarit të mallit, që ishin Forcat e Armatosura, dorëzonte mallin dhe të gjitha arkëtimet e lekëve kalonin në buxhetin e shtetit”, deklaroi jashtë GJKKO, Ylli Pinari.

Gjatë fjalës së tij para togave të zeza, Pinari u pyet për ish-ministrin Fatmir Mediu. Balkanweb tha se ka siguruar një tjetër dëshmi të Pinarit.

“Nga viti 2001 kur jam emëruar në krye të MEICO kam marrë informacion se, në kuadër të hyrjes në NATO, deri në 2008-2010, stoku i municioneve të ushtrisë duhet të evandohej. Në nga ana tjetër duhet të verifikonim që të mos shisnim municion tek vende që kishin embargo, apo në kompani joserioze.

Ka një vendim të qeverisë Meksi, që përcakton se tepricat e municioneve duhet të shiten “në blerësin e parë”.
Ne ndërkohë ishim të detyruar që të gjitha shitjet që realizonim duhet t’i raportonim tek Presidenti, kryeministri, ministria e mbrojtjes dhe KLSH.”, tha Pinari.

Mes të tjerash ai u ndal te një urdhër i ri i vitit 2002 që sipas tij urdhëronte që tepricat e municioneve të shiteshin, asgjësoheshin apo demontoheshin.

“Në një urdhër tjetër të vitit 2002 urdhërohej që tepricat e municioneve të shiteshin, demontoheshin, apo asgjësoheshin. Gërdecin si vend demontimi e ka përcaktuar Shtabi i Përgjithshëm i Forcave të Armatosura. Urdhri 2044 i ministrit të Mbrojtjes u gjet me shkelje pasi Meico ngarkohej për te garantuar sigurinë e procesit, por kjo nuk ishte detyra jonë.”, pohoi ai.

PINARI PYETET NGA MEDIU
Ylli Pinari i pyetur nga Fatmir Mediu nëse ai kishte dijeni që ish-ministri kishte njohje me Mihal Delijorgjin.
Ylli Pinari: Këtë e dini ju, nga ta di unë!
Fatmir Mediu: A dini që kam qenë unë në Gërdec?
Ylli Pinari: Atë e dini ju, në dijeninë time jo. Patrick Henri ka bredhur në shumë reparte ushtarake. Mund të ketë qenë edhe në Gërdec.
Fatmir Mediu: Ku shkonte baruti i avaduar?
Ylli Pinari: Rreth 200-300 ton barut është kontraktuar një kompani në Belgjikë dhe është çuar një anije me këtë ngarkesë. Pritej edhe një anije e dytë për të eksportuar barutin tjetër të evaduar. Kam tentuar dy herë të futem në Gërdec, nuk më kanë lejuar të futem pasi duhet leje e posaçme. Ishin dy herë që më ra rruga nga Rinasi kur tentova.