Publikuar më 16.09.2024 nga shekulli_admin

Prokuroria ka vendosur lirimin e mijëra llogarive bankare që u përkisnin qytetarëve të cilët kishin marrë kredi tek kompanitë zhvatëse “Final” dhe “Micro Credit Albania”.

Më 26 Gusht 2024 prokurorja Antoneta Sevdari ka marrë vendimin për lirimin e tyre në 11 banka. Përmes një shkrese përcjellëse të firmosur nga drejtuesja e seksionit në prokurorinë e Tiranës, Suela Salavaçi, ky vendim u është përcjellë bankave të ndryshme, duke dërguar informacion për heqjen e sekuestros të llogarive bankare.

Këto sekuestro ishin vendosur nga disa përmbarues që ishin kontraktuar nga “Final” dhe “Micro Credit Albania”, të cilët duke respektuar vendimet e gjykatave kanë urdhëruar 11 banka të bllokojnë llogaritë bankare të personave debitorë.

Por tashmë urdhrat e ekzekutimit të tyre kanë dalë “nul”, pasi prokuroria e Tiranës përmes vendimit të Gushtit 2024 mori kompetencat e përmbaruesve privatë, duke urdhëruar menjëherë lirimin të mijëra llogarive bankare, pa pasur asnjë vendim gjykate dhe njëherësh pa pritur të përfundojë çështja penale kundër administratorëve të shoqërive kredi-dhënëse “Final” dhe “Micro Credit Albania”.

“…lista emërore e qytetarëve që u është hequr sekuestrim i llogarive bankare, do i dërgohet prokurorisë së Tiranës në mënyrë elektronike në një “Hard Copy” me qëllim që në vazhdim të kryhen verifikimet nga Agjencia për Administrimin e Pasurive të Sekuestruara dhe të Konfiskuara…”, thuhet në dokumentin e siguruar nga gazetari Elton Qyno.

Nga ana tjetër prokuroria e Tiranës, nënvizon se nëse Agjencia për Administrimin e Pasurive të Sekuestruara, do të çmoj të nevojshme në vazhdimin, ekzekutimin e mbledhjes me forcë të atyre detyrimeve që do të rezultojnë në përputhje me ligjin ( pra detyrime jo të lindura nga veprimet e kundraligjshme të sipërcituara), në momentin që do të kryhet zëvendësimi i përmbaruesit, të kryejë veprimet përmbarimore konform legjislacionit në fuqi.

Ndërkohë pas heqjes së sekuestrove të llogarive bankare të individëve të ndryshëm, llogaritë e të cilëve janë sekuestruar me vendim të përmbaruesve, të cilëve rezulton ti jetë hequr licenca, duhet të njoftohet zyrtarisht prokuroria dhe Agjencia e Administrimit të Pasurive të Sekuestruara, e cila zotëron kuotat e shoqërive “Micro Credit Albania” dhe “Final”.

Kjo vendimmarrje e prokurorisë së Tiranës është marrë duke u rakorduar dhe me Ministrinë e Drejtësisë dhe Bankën e Shqipërisë.

Këto dy institucione kanë konstatuar se shumë përmbarues që kanë vepruar për llogari të shoqërive “MCA” dhe “Final” për mbledhjen e borxhit, kanë kryer veprime në kundërshtim me ligjin dhe u ka revokuar licencat.

Për shkak të mosdorëzimit të dosjeve dhe për shkak të problemeve të tjera teknike, nuk është bërë e mundur të vendosen përmbaruesit zëvendësues dhe për këtë arsye llogaritë e shumë qytetarëve prej vitesh kanë mbetur të bllokuara.

Nisur nga këto kushte, thuhet në dokumentin e prokurorisë me qëllimin që mos vazhdojnë pasojat e veprave penale ndaj qytetarëve, është kërkuar në 11 banka të nivelit të dytë heqja e sekuestrove të vendosura mbi llogaritë e të gjithë qytetarëve nga përmbaruesit të cilëve u është hequr licenca.

Reagon ish-ministri i Financave

Ish-ministri Arben Malaj ka përshëndetur vendimin e Prokurorisë e cila ka liruar mijëra llogari bankare të cilat u përksinin qytetarëve kredimarrës tek kompanitë zhvatëse “Final” dhe “Micro Credit Albania”.

Përmes një postimi në “Facebook”, ish-ministri Malaj u ka shprehur mirënjohje të thellë mediave të cilat ngritën zërin për këtë situatë. Kujtojmë se Newsbomb.al ishte dhe media e parë e cila solli me të madhe skemën korruptive dhe mashtruese se si mijëra familje shqiptare po mbaheshin “peng” nga MCA.

Ndër të tjera, ish-ministri thekson se pa sensibilizimin publik ky problem mund të bëhej dhe më i madh dhe shumë familje shqiptare do të varfëroheshin deri në mbijetesë.

Sipas Malajt tani ka ardhur momenti që të ndërmerren hapa ligjore dhe institucionale parandaluese. Ai thekson se një bashkëpunim mes Bankës së Shqipërisë me Bankën Botërore për mbrojtjen e konsumtorëve dhe huamarrësve nga subjektet e MCA është një hap i madh dhe duhet përshpejtuar.

“Bashkëpunimi i Bankës së Shqipërisë me Bankën Botërore për mbrojtjen e konsumatorëve/huamarrësve nga subjektet e mikro kredisë është një hap i cili duhet përshpejtuar.

Kërkesa publike e koleges Jorida Tabaku, kryetare e Komisionit Parlamentar të Integrimit, për miratimin në këtë sesion parlamentar i Direktivës së BE-së për mbrojtjen e huamarrësve nga subjektet financiare jo bankare, mund të mbështetet nga deputetët pa ndasi partiake. Vetë huamarrësit kanë qenë viktima të përbashkëta të prkatikave grabitqare”, shkruan ndër të tjera ish-ministri Malaj.