Publikuar më 18.04.2025 nga shekulli_admin

Kryeministri Edi Rama ishte pasditen e sotme në një takim me biznese dhe sipërmarrës në qytetin e Lezhës.

Rama foli për një plan të qeverisë me bizneset që ai e cilësoi si planin për paqe fiskale, praktikë e cila për kryeministrin pritet të lehtësojë një sërë biznesesh nga kontrollet tatimore.

Nga ana tjetër, plani synon të rikthejë dhe ato biznese që i kanë detyrime të pashlyera shtetit.

Rama: Do krijojmë një ofertë më cilësore dhe bindëse për Lezhën. Ajo që them me siguri nga eksperienca dhe si kanë ecur gjërat, rritja e vlerës së pasurisë do jetë më e madhe. Siç ju ka ndodhur gjithë vendve do na ndodh dhe ne, me hyrjen në BE, vlera e pasurisë së patundshme dyfishohet. Edhe qasja ndaj pronës ndryshon për shkak se ata që janë pjesë e BE-së, bëhen më të interesuar të investojnë. Për pak ditë do kemi një aktivitet me biznesin, për të shpjeguar planin e paqes fiskale. Kemi një plan, duke qenë se ka patur interes nga bizneset do bëjmë një shpjegim shterues.

Është mekanizëm i përdorur që në kohët e Romës së vjetër, që nënkupton një marrëveshje mes qeverisë dhe biznesit për kontributin. Nëse biznesi dhe qeveria apo tatimet bien dakord që për vitet e ardhshme unë si biznes do paguaj këtë që kam paguar vitin e kaluar plus rritjen ekonomike, atëherë tatimet marrin përsipër që ti nuk ke më asnjë kontroll asnjë marrëdhënie me burokracinë. Elementi i dytë është mundësia që u japim bizneseve për tu kthyer, të deklarojnë të ardhura që nuk i kanë deklaruar më parë për 5 vite, t’ i deklarojnë pa marrë asnjë lloj penaliteti, duke paguar 5% për ato të ardhura”- tha Rama.

I shoqëruar edhe nga kryebashkiaku socialist i Lezhës, Pjerin Ndreu, Rama nuk i kurseu batutat me të, “pasi po i nxin jetën” për rrugën Milot-Balldren.

Më tej, Rama tha se është gati një projekt promovues për Lezhën lidhur me gatimet tradicionale të zonës, që pritet të japë një hov turistik për hotelet dhe resortet.

Rama: Turizmi ka marrë një hov të ri. E qartë që duhet ta shoqërojmë këtë hov me investime për infrastrukturën. Tek rrugët lidhëse të bregdetit me rrugën kombëtare, është projekt ambicioz, si projektet e Pjerinit, që e di Lezhën qendrën e botës. Do e mbështesim. Fluksi i turistëve në Lezhë do rritet jo vetëm për shkak të projekteve. Por edhe për cilësinë dhe namin e Lezhës për guzhinën. Kemi një plan, një guidë për guzhinën po pres të bashkëpunojmë me grupin.

Duhet ta bëjmë dhe të ndërtojmë një program për ta mbështetur këtë hapësirë dhe ta bëjmë më të dukshme. Në disa vende kjo ka qenë qasje që ka sjellë sukses për hotele. Provomimi i guzhinës dhe pikave ku mund të shijohet gazhina tradicionale. Shkak tjetër fuqizimi i infrastrukturës. Pjerini ma ka nxirë jetën me këtë histori. Do shpallet fituesi i segmentit Milot-Balldren. Pas nënshkrimit të kontratës do fillojë puna dhe me aksin e ri që do jetë katërcipërisht e njëjtë në cilësi me Thumanë-Kashar.