Publikuar më 18.04.2025 nga shekulli_admin

Kreu i PD-së, Sali Berisha ishte sot në Krujë, ku pati takime me qytetarë dhe biznese. Gjatë një takimi me fasonët, Berisha tha se zv.kryeministrja Balluku ka patur në duar 12 mld euro për rrugët, të cilat i ka futur në xhep së bashku me Ramën.

Berisha shtoi se ato para do gjenden me ardhjen e PD-së në pushtet dhe do u kthehen shqiptarëve.

Sakaq, ai krahasoi edhe punët e PD-së pas 2005-ës kur për rrugët u shpenzuan 3 miliardë euro.

Berisha: 12 mld euro ka administruar zv.kryeministrja Balluku për rrugët. 2006- 2010 u ndërtuan 11 300 km rrugë dhe mijëra km në fshatra. Kushtuan gjithsej 3 mld e 800 mln euro. 12 mld ka administruar kjo me Ramën. Ku janë rrugët? Janë paratë në xhepat e tyre njëlloj si djegësi i Tiranës. Ato para do gjenden. Do gjenden dhe do u kthehen shqiptarëve. Kjo që them është garanci e madhe. Fondet ekzistojnë. Nuk mungon asnjë qindarkë. Zotohemi të vendosim ligjin. Por shteti duhet të jetë i pari që duhet të zbatojë ligjin.

U thoshte pensionistëve këta e kanë fajin se nuk regjistrojnë punëtorët. Po ku janë punonjësit më të paregjistruar? Në administratë shtetërore. Një model kanë, hajninë.

Kreu i Partisë Demokratike, Sali Berisha, ka akuzuar sërish ministret për shpenzime të mëdha për aksesorë dhe çanta të shtrenjta, me të cilat janë parë në Kuvend.

“Kanë mashtruar dhe vjedhur”, tha Berisha për ministret, ndërsa shtoi se Kuvendi nuk është pasarelë mode për to.

“Ministreshat vinin me aksesorë dhe çanta, a thua janë princesha e jo shërbëtore të qytetarëve”, tha Berisha më tej, ndërsa theksoi se rroga që ato marrin, nuk del për shpenzime te tilla.

Sali Berisha: Kanë mashtruar dhe vjedhur, i shihni vetë ato ministret. Gjersa unë ngrita zërin në Parlament, se parlamenti nuk është pasarelë mode, ministreshat vinin me aksesorë dhe çanta, a thua janë princesha e jo shërbëtore të qytetarëve.

Gjera si nuk i imagjinon kurrë me rrogën tënde, nuk del rroga. Të gjitha këto do përfundojnë më 11 maj, paratë do u kthehen qytetarëve.

Kreut të PD-së, te pazari në Krujë, artizanët i kanë dhuruar dhe veshur një xhamadan dhe një qeleshe, veshje tradicionale shqiptare.

“Do të duhej të hiqja xhaketën të bëhej më mirë kjo punë, por s’ka gjë”, tha Berisha.

Më pas ai hoqi xhaketën dhe vijoi takimin me veshjen popullore.

Përveç xhubletës dhe qeleshes, artizanët e Krujës i kanë dhuruar Sali Berishës gjatë vizitës së tij në pazar edhe një laps, e cila kishte të ngjitur një buf.

“Simbol i mençurisë”, u shpreh Berisha tek mori dhuratën, ndërsa falënderoi artizanët dhe u shpreh se “bufi e çmendi Edi Ramën”.

Qytetarja: Një nga shitëset nuk erdhi dot të të takojë, dhe të bën këtë dhuratë (i jep bufin)

Berisha: Simbol i mençurisë, e çmendi Edi Ramën, e çmendi! Shumë faleminderit!

Kujtojmë se Rama e cilëson kreu e PD “buf kënete”, por sipas Berishës nuk është aspak i ofenduar pasi bufi simbolizon mençurinë dhe diturinë.