Publikuar më 09.10.2024 nga shekulli_admin

Presidenti i Turqisë, Rexhep Taip Erdogan do të vizitojë Shqipërinë nesër, ndërsa në 11 tetor do të udhëtojë drejt Beogradit. Vizita e Erdogan në Tiranë ishte e planifikuar më herët. Autoritetet kanë nisur marrjen e masave të sigurisë, ndërsa në ditët e qëndrimit të Presidentit turk pritet një nivel i lartë gatishmërie, jo vetëm nga policia, por edhe Garda.

Në vizitën në Tiranë, Presidenti turk do të zhvillojë takime me Kryeministrin Edi Rama, Presidentin Bajram Begaj, si dhe me një përfaqësi të komuniteteve fetare.

Vizita e Erdogan në Tiranë vjen në një kohë kur është hedhur ideja për krijimin e “urdhrit sovran Bektashi” në formën e një “shteti”, detajet e së cilës janë zbardhur në mediat ndërkombëtare, si dhe kanë krijuar polemika, kundërshti, por edhe përkrahje, edhe pse nuk ka shumë informacione për modelin që do të zgjidhet dhe si do të aplikohet.

Por gjithashtu vizita e Presidentit të Turqisë në Tiranë, dhe më pas në Beograd, vjen në një kohë kur konflikti në Lindjen e Mesme ka marrë përmasa të mëdha. Shqipëria është rreshtuar në krah të Izraelit, ndërkohë që Turqia ka mbajtur një pozicion të ashpër kundër veprimeve të shtetit izraelit, në sulmet në Gaza dhe Liban, ku ndodhen qendrat e Hamas dhe Hezbollah.

Dhe ndoshta këto mund të jenë çështje që mund të diskutohen në takimet e nivelit të lartë mes Presidentit Erdogan, homologut Begaj dhe Kryeministrit Edi Rama.

Rama dhe Erdogan takimin e fundit që kanë zhvilluar mes tyre e realizuan në New York në kuadrin e Asamblesë së OKB-së.

Ndërkohë në bisedën telefonike e gushtit 2024 mes tyre, sipas të dhënave zyrtare nga Qeveria turke, Erdogan dhe Rama kanë diskutuar marrëdhëniet dypalëshe dhe çështjet rajonale dhe globale.

Drejtoria e Komunikimit të Turqisë bënte të ditur se gjatë bisedës, Erdogan theksoi se marrëdhënia Turqi- Shqipëri është në një nivel të avancuar dhe se bashkëpunimi në industrinë e mbrojtjes do të forcohet më tej përmes kontakteve tregtare, ekonomike dhe ushtarake.

Udhëheqësi turk iu referua përpjekjeve zhgënjyese të Organizatës Terroriste FETÖ për të fituar një terren në Shqipëri, duke shprehur besimin se vendi ballkanik do të vazhdojë të punojë drejt eliminimit të strukturës së grupit në sektorët e tij arsimor, shëndetësor dhe fetar.

Ankaraja akuzon gjithashtu FETÖ-në se qëndron pas një fushate të gjatë për të përmbysur shtetin përmes infiltrimit në institucionet turke, veçanërisht në ushtri, polici dhe gjyqësor.

Sipas Ankarasë, FETÖ dhe lideri i saj me bazë në SHBA, Fethullah Gulen, orkestruan grushtin e shtetit të dështuar të 15 korrikut 2016, në Turqi, në të cilin 252 njerëz u vranë dhe 2,734 u plagosën.Presidenti turk Recep Tayyip Erdogan zhvillon të enjten një vizitë në Tiranë, e cila nis me takimin me Presidentin Bajram Begaj.

Në vijim, Presidenti Erdogan do të ketë një takim dhe më pas një konferencë për mediat me Kryeministrin Edi Rama, ndërsa në orët e pasdites do të marrë pjesë në inaugurimin e xhamisë së Namasgjasë.

Agjenda:

11:30 – 11:40

Ceremonia e pritjes në presidencë

11:40 – 12:40
Takim koke me koke me presidentin Begaj

12:40 – 13:40
Mbledhja e Këshillit të bashkërendimit të nivelit të lartë

13:40 – 14:00
Ceremonia e firmosjes së marrëveshjeve

14:00 – 14:30
Deklaratë Erdogan- Rama

16:30 – 17:30
Ceremonia e inaugurimit të Xhamisë

Media greke: Erdogan takim me Baba Mondin

Vizita e Presidentit të Turqisë, ka tërhequr vëmendjen e mediave greke. Ato shkruajnë se xhamia, ndërtimi i së cilës filloi në vitin 2015, konsiderohet më e madhja në Ballkan, me katër minare, secila 35 metra të larta, me një stil arkitekturor që të kujton epokën osmane.

Përreth xhamisë do të ketë objekte që do të funksionojnë si qendër kulturore, bibliotekë, hapësirë ​​ekspozite, sallë konferencash, “muze të bashkëjetesës” dhe shkollë për mësimin e Kuranit.

Komuniteti Mysliman Shqiptar ka lëshuar një deklaratë ku shpreh mirënjohje për “popullin vëlla turk”, Presidentin Erdogan dhe kryeministrin shqiptar Edi Rama që bënë të mundur ndërtimin e xhamisë së re të madhe në Tiranë.

Myftiu i Tiranës Gazmend Teki̇a është emëruar kryetar i Bordit Drejtues të fondacionit të përbashkët mes Komunitetit Mysliman dhe palës turke, që do të menaxhojë xhaminë e re.

Presidenti turk pritet të takohet në Tiranë edhe me liderin fetar të sektit mysliman bektashi në Shqipëri dhe në mbarë botën, Edmond Brahimaj, i njohur për ndjekësit edhe si Baba Mondi.

Muajin e kaluar, një raport i New York Times zbuloi planin e kryeministrit Edi Rama për të krijuar një shtet sovran mysliman bektashi brenda territorit shqiptar, të modeluar sipas Vatikanit, gjë që shkaktoi një reagim nga përfaqësuesit e komunitetit të madh bektashi në Turqi.

Policia njoftoi se do të ketë bllokime të disa segmenteve rrugore, si dhe bllokime të pjesshme të disa segmenteve të tjera, në varësi të takimeve dhe aktiviteteve që do të zhvillohen gjatë vizitës, në Tiranë.

Drejtuesit e automjeteve të shfrytëzojnë autostradën e re Kashar – Rinas, për të qarkulluar në drejtim të aeroportit të Rinasit, pasi aksi i vjetër Kashar – Rinas nga ora 10:00 deri në 11:30, si dhe nga ora 17:00, deri në orën 18:00, të datës, 10.10.2024, do të jetë i bllokuar.

Rrugë të tjera që do të bllokohen janë:

Nga Rinasi – Qafa e Kasharit – Mbikalimi tek Casa Italia – nënkalimi te ish-sheshi “Shqiponja”, Unazë (Astir) – Rrethrrotullimi i Saukut, Rruga e Elbasanit.

Bulevardi “Dëshmorët e Kombit”, nga Ura te ish Hotel Dajtit deri te sheshi “Nënë Tereza”, rruga “Ismail Qemali”, rruga “Papa Gjon Pali II”, rruga “Ibrahim Rugova” rruga “Ukraina e Lirë”, bulevardi “Zhan D’Ark” dhe rruga “Xhorxh Bush”.

Njoftimi i policisë:

Në kuadër të vizitës në Shqipëri, të Presidentit të Turqisë, z. Recep Tayyip Erdoğan, Drejtoria Vendore e Policisë Tiranë, me mbështetjen e Drejtorisë së Përgjithshme të Policisë së Shtetit ka marrë një sërë masash të detajuara për sigurinë e vizitës së Presidentit të Turqisë z. Recep Tayyip Erdoğan, duke filluar nga aeroporti i Rinasit, shoqërimi drejt Tiranës në vendet ku do të zhvillohen takimet dhe shoqërimi drejt Rinasit, në përfundim të vizitës.

Një nga masat e planit të detajuar konsiston në sigurimin e vizitës të presidentit të Turqisë, z. Recep Tayyip Erdoğan, i cili do të zhvillojë takime në datën 10 tetor 2024, në qytetin e Tiranës.

Në këtë kuadër, Policia e Shtetit njofton qytetarët se do të ketë bllokime të disa segmenteve rrugore, si dhe bllokime të pjesshme të disa segmenteve të tjera, në varësi të takimeve dhe aktiviteteve që do të zhvillohen gjatë vizitës, në Tiranë.

Drejtuesit e automjeteve të shfrytëzojnë autostradën e re Kashar – Rinas, për të qarkulluar në drejtim të aeroportit të Rinasit, pasi aksi i vjetër Kashar – Rinas nga ora 10:00 deri në 11:30, si dhe nga ora 17:00, deri në orën 18:00, të datës, 10.10.2024, do të jetë i bllokuar.

Rrugë të tjera që do të bllokohen janë:

Nga Rinasi – Qafa e Kasharit – Mbikalimi tek Casa Italia – nënkalimi te ish-sheshi “Shqiponja”, Unazë (Astir) – Rrethrrotullimi i Saukut, Rruga e Elbasanit.

Bulevardi “Dëshmorët e Kombit”, nga Ura te ish Hotel Dajtit deri te sheshi “Nënë Tereza”, rruga “Ismail Qemali”, rruga “Papa Gjon Pali II”, rruga “Ibrahim Rugova” rruga “Ukraina e Lirë”, bulevardi “Zhan D’Ark” dhe rruga “Xhorxh Bush”.

Policia e Shtetit kërkon mirëkuptimin e qytetarëve për masat që ka ndërrmarrë dhe do të zbatojë gjatë vizitës së z. Recep Tayyip Erdoğan.