Publikuar më 19.02.2024 nga shekulli_admin

Gjykata Kushtetuese ka zbardhur vendimin e marrë mbi marrëveshjen e firmosur me Italinë për ngritjen e kampit në Gjadër të Lezhës ku do të priten emigrantët afrikanë. Në vendim theksohet se protokolli për Migracionin ofron mbrojtje juridiksionale, nuk sjell kufizim të të drejtave të njeriut, duke i hapur kështu rrugë miratimit të kësaj marrëveshje në Kuvend në seancën e së enjtes (22 shkurt).

“Vendosëm deklarimin e Protokollit ndërmjet Këshillit të Ministrave të Republikës së Shqipërisë dhe Qeverisë së Republikës Italiane “Për forcimin e bashkëpunimit në fushën e migracionit” në pajtim me Kushtetutën dhe lejimin e ratifikimit të tij nga Kuvendi.

Ky vendim u njoftohet menjëherë Presidentit, Kuvendit dhe Këshillit të Ministrave dhe dërgohet për publikim në Fletoren Zyrtare. Ky vendim është përfundimtar dhe hyn në fuqi ditën e botimit në Fletoren Zyrtare.”- thuhet në përfundimin e Gjykatës Kushtetuese.

Vendimi u miratua më 29 janar 2024 me 5 vota pro e 4 kundër, ndërsa sot u publikua i arsyetuar në 43 faqe

Gjyqtarët që kanë votuar Pro: Holta Zaçaj, Fiona Papajorgji, Sandër Beci,  Genti Ibrahimi, Marjana Semini. 

Gjyqtarët që kanë votuar Kundër janë Marsida Xhaferllari, Sonila Bejtja, Ilir Toska. Ata kanë qenë kundër duke e cilësuar protokollin për Migracionin të papajtueshëm me Kushtetutën dhe të ndalohej ratifikimi i tij nga Kuvendi.

Ndërkohë gjyqtarja e Gjykatës Kushtetuese Elsa Toska që ka votuar kundër ka pasur edhe ajo mendim ndryshe nga 8 gjyqtarët e tjerë. Ajo argumenton se autorizimi për dhënien e plotfuqisë për negocimin dhe nënshkrimin e tij do të duhej të ishte lëshuar nga Presidenti i Republikës.

Vlerësoj se Protokolli ndërmjet Qeverisë së Republikës Italiane dhe Këshillit të Ministrave të Republikës së Shqipërisë “Për forcimin e bashkëpunimit në fushën e migracionit” përfshihet në kategorinë e marrëveshjeve që lidhen me territorin në kuptimin juridiksional, sipas shkronjës “a” të pikës 1 të nenit 121 të Kushtetutës, ndaj autorizimi për dhënien e plotfuqisë për negocimin dhe nënshkrimin e tij do të duhej të ishte lëshuar nga Presidenti i Republikës, dhe për rrjedhojë kërkesa duhej pranuar për këtë shkak kushtetues. 

“Vendosëm deklarimin e Protokollit ndërmjet Këshillit të Ministrave të Republikës së Shqipërisë dhe Qeverisë së Republikës Italiane “Për forcimin e bashkëpunimit në fushën e migracionit” në pajtim me Kushtetutën dhe lejimin e ratifikimit të tij nga Kuvendi.

Ky vendim u njoftohet menjëherë Presidentit, Kuvendit dhe Këshillit të Ministrave dhe dërgohet për publikim në Fletoren Zyrtare.

Ky vendim është përfundimtar dhe hyn në fuqi ditën e botimit në Fletoren Zyrtare.”- thuhet në përfundimin e Gjykatës Kushtetuese.

Lajmi në përditësim…

(Kliko këtu për të lexuar dokumentin e plotë)

Grupi Parlamentar i Partisë Socialiste u mblodh sot paradite nën drejtimin e Bledi Çuçit, ku në fokus të diskutimeve ka qenë axhenda e javës në Kuvend. Në fjalën drejtuar deputetëve të mazhorancës, kreu i grupit tha se në seancën e ditës së enjte, 22 shkurt, pritet të kalojë për votim marrëveshja me Italinë për emigrantët, si edhe amnistia penale.

Çuçi tha se pritet zbardhja e plotë e vendimit të Gjykatës Kushtetuese këto ditë të para të javës, që i hap më pas rrugë për çuarjen në seancë, ndërsa në Kuvend kërkohen vetëm 71 vota. Kështu që mjaftojnë vetëm votat e socialistëve në parlament që t’i hapin rrugë nisjes së punimeve për ndërtimin e një qendre pritjeje në portin e Shëngjinit dhe akomodimin në Gjadër të Lezhës për emigrantët azilkërkues në Itali.

Protokolli i nënshkruar mes kryeministrit Edi Rama dhe homologes së tij italiane Giorgia Meloni më 6 nëntor pret vetëm ratifikimin nga deputetët shqiptarë, ndërsa në vendin fqinj gjithçka tashmë është e votuar nga senati 4 ditë më parë. Pikërisht në lidhje me këtë deklaratë ka reaguar deputetja e PD-së Jorida Tabaku.

Ajo e cilëson skandaloze faktin që Bledi Çuçi di se kur zbardhen vendimet e gjykatës.

“Më duket skandaloze që kryetari i Grupit të PS di se kur do të zbardhet vendimi i Gjykatës Kushtetuese. Është e pa tolerueshme dhe e pa konceptueshme në ndarjen e pushteteve dhe në drejtësinë që ne duam dhe po ngremë që kryetari i grupit të PS të thotë se do të zbardhet për pak ditë vendimi. Këtë shtet e mbajnë ligjet, procedura dhe institucionet. Nëse bien parimet, bien shtyllat që kontrollojnë edhe balancën e pushtete dhe ruajnë parlamentin që të mos bëhet zgjatim i qeverisë, atëherë ndodhemi në një moment shumë të rrezikshëm”, tha Tabaku.