Publikuar më 05.10.2023 nga shekulli_admin

Një ngjarje e rëndë është regjistruar në Tiranë, ku një 3-vjeçar ka ndërruar jetë pas vizitës te një dentisti. Ngjarja thuhet se ka ndodhur 3 ditë më parë.

Kanë qenë prindërit e vogëlushit që kanë denoncuar rastin në polici. Ata akuzojnë një klinikë private në rrugën e Kavajës, ku e kishin dërguar djalin për disa ndërhyrje te dhëmbët. Sipas dëshmisë së prindërve, djalit i është bërë anestezi totale dhe pas përfundimit të të gjitha procedurave, kanë marrë fëmijën dhe janë larguar drejt banesës. Por pas disa orësh, 3-vjeçari është ndjerë keq.

Prindërit, të gjendur në këto kushte, kanë telefonuar klinikën, ku nuk i është përgjigjur askush në telefon dhe më pas e kanë transportuar me urgjencë në Pediatrinë e QSUT-së. Pasi gjendja e fëmijët është përkeqësuar, ai ka qëndruar dy ditë në reanimacion, ku edhe për pasojë ka ndërruar jetë. Ndërkohë, policia ka proceduar mjekun.

“Specialistët për Hetimin e Krimeve të Komisariatit të Policisë Nr. 4 kanë referuar materialet në Prokurorinë pranë Gjykatës së Shkallës së Parë të Juridiksionit të Përgjithshëm Tiranë, për shtetasin R. Xh., 70 vjeç, banues në Tiranë, për veprën penale “Mjekimi i pakujdesshëm”, pasi ka bërë kallëzim shtetasi B. S. se shtetasi R. Xh. ka mjekuar në mënyrë të pakujdesshme në klinikën e tij private, djalin 3-vjeçar të shtetasit B. S., i cili pas mjekimit në këtë klinikë ka shfaqur komplikacione dhe pas 3 ditësh, ka humbur jetën, në spital.”, thuhet në njoftimin e policisë.

 Në një dëshmi të dhënë për “JOQ”, daja i vogëlushit, Brian, ka rrëfyer se 3-vjeçari u dërgua te klinika dentare “Ina Xhaxho” pasi ankohej se disa dhëmbë i shkaktonin dhimbje.

Ai ka rrëfyer se vogëlushi qëndroi në sallë për 4 orë dhe më pas iu doëzua prindërve në gjendje kome, mirëpo ky fakt u mohua nga Roland dhe Ina Xhaxhi, të cilët i thanë se vogëlushi është ende nën efektin e narkozës.

“Djali kishte probleme me dhëmbët, kisha 3 a 4 dhëmbë të prishur. Pyetëm shumë veta me anestezi, mjek zemre vajtëm te Roland Xhaxho 2-3 herë, e çuam çunin ti rregullonin dhëmbët dhe bashkë me gocën  e vet i ka bërë 14 dhëmbë çunit ja ka trajtuar dhe e ka mbajtur gati 4 orë në sallë dhe na i ka dhënë çunin në gjendje kome dhe na gënjeu. Çuni është mirë mos u bëni merak kjo është gjendja e narkozës, ndërkohë çuni ishte në gjendje kome të rënduar. Kur e çuam çunin lart në Pediatria e futën direkt në reaminacion pa oksigjen pa puls”, tregoi daja i vogëlushit.

Ndërkohë, gjyshi i të miturit ka kërkuar drejtësi, në të kundërtën do e vendosin vetë atë.

“Djalin nuk na i ktheni dot, ne duam vetëm drejtësi. Ose si njerëz dimë ta vendosim vetë drejtësinë”, tha ai për mediat.

Roland Xhaxho dhe “klinika dentare Ina Xhaxho”, vendosur në rrugën e Kavajës apo zonën tek 21 dhjetori, janë vënë nën lupën e policisë dhe të prokurorisë pas humbjes së jetës së vogëlushit 3 vjeçar që u mjekua te klinika private për dhëmbët e tij të prishur, dhe më pas humbi jetën.

Gjithçka deri tani është në fazën e hetimeve pas denoncimit të prindërve të vogelushit për mjekim të pakujdesshëm të tij, çka rezultoi më pas me humbje jete.

Për shkak të shumë dhëmbëve të prishur, fëmijës i është bërë narkozë dhe pas përfundimit të procedurës, fëmija ka shkuar në spitalin pediatrik, por që sipas raportimeve paraprake, nuk ka pasur puls. Më pas gjithë kjo ndërhyrje ka rezultuar fatale.

Policia me një njoftim të mëparshëm thotë se materialet për këtë çështje i kanë kaluar prokurorisë por nuk dihet se çfarë ka ndodhur me subjektin privat, që shërbimet i jep si në kardiologji, ashtu edhe në klinikë dentare.

Gjithë reklamimi i spitalit privat dhe klinikës private është se fëmijët mund të mjekohen në këtë qendër shëndeti, sepse për çdo komplikacion mund të trajtohet në spital, por siç duket, nuk ka qenë rasti i fëmijës 3 vjeçar.

Roland Xhaxho mban titullin Profesor Asisten Doktor dhe është një ndër mjekët më të rëndësishëm në Shqipëri. Asnjëherë më parë nuk është raportuar për ngjarje në këtë spital privat apo në klinikën e dhëmbëve, por nga ajo që shihet në rrjetet sociale, është se Klinika është e specializuar në kurimin e dhëmbëve të fëmijëve me anestezi të përgjithshme, edhe për specifikat e vështira të këtyre ndërhyrjeve.