Publikuar më 24.06.2025 nga shekulli_admin

Presidenti i SHBA, Donald Trump deklaron se është arritur një armëpushim prej 12-orësh midis Izraelit dhe Iranit, dhe se pas kësaj periudhe lufta do të konsiderohet e përfunduar.

Këtë moment të rëndësishëm shefi i Shtëpisë së Bardhë e njoftoi përmes një postimi në platformën e tij sociale, Truth.

“Duke supozuar se gjithçka do të shkojë si duhet, që do të ndodhë, dua të uroj të dyja vendet, Izraelin dhe Iranin, për qëndrueshmërinë, guximin dhe mençurinë për të përfunduar atë që duhet quajtur “LUFTA E 12 DITËVE””, shkruan Trump.

Mesazhi i Trump

URIME PËR TË GJITHË!

Është arritur plotësisht marrëveshja mes Izraelit dhe Iranit për një ARMËPUSHIM TË PLOTË dhe TOTAL (rreth 6 orë nga tani, kur Izraeli dhe Irani të kenë përfunduar misionet e tyre përfundimtare në zhvillim!), për një periudhë 12-orëshe, pas së cilës Lufta do të konsiderohet E MBARUAR!

Zyrtarisht, Irani do të fillojë ARMËPUSHIMIN, dhe në orën e 12-të, Izraeli do të nisë ARMËPUSHIMIN, ndërsa në orën e 24-t do të festohet nga e gjithë bota FUNDI ZYRTAR i LUFTËS SË 12 DITËVE.

Gjatë secilit ARMËPUSHIM, pala tjetër do të mbetet PAQËSORE dhe RESPEKTUESE.

Duke supozuar se gjithçka do të shkojë si duhet, që do të ndodhë, dua të uroj të dyja vendet, Izraelin dhe Iranin, për qëndrueshmërinë, guximin dhe mençurinë për të përfunduar atë që duhet quajtur “LUFTA E 12 DITËVE”.

Kjo ishte një luftë që mund të kishte zgjatur për vite dhe të shkatërronte të gjithë Lindjen e Mesme, por nuk ndodhi, dhe nuk do të ndodhë kurrë!

Zoti e bekoftë Izraelin, Zoti e bekoftë Iranin, Zoti e bekoftë Lindjen e Mesme, Zoti i bekoftë Shtetet e Bashkuara të Amerikës, dhe ZOTI E BEKOFTË BOTËN!

DONALD J. TRUMP,
PRESIDENT I SHTETEVE TË BASHKUARA TË AMERIKËS

Kjo deklaratë e Trump vjen pas një periudhe të tensionuar pas luftës Izrael-Iran, ku SHBA-të kanë realizuar sulme ajrore ndaj disa objekteve bërthamore në Iran, duke përfshirë Fordow, Natanz dhe Isfahan. Trump i ka cilësuar këto sulme si një “sukses të madh ushtarak” dhe ka paralajmëruar se çdo hakmarrje nga Irani do të ndeshej me një forcë shumë më të madhe.

Presidenti i SHBA, Donald Trump ka deklaruar se armëpushimi mes Izraelit dhe Iranit ka hyrë në fuqi, duke u kërkuar që të mos e shkelin atë.

“Armëpushimi tani është në fuqi. Ju lutem mos e shkelni atë!”, shkroi presidenti amerikan në një postim në Truth Social.

Trump kishte njoftuar më parë se armëpushimi do të zbatohej brenda 24 orësh në dy faza, me Iranin që fillimisht do të ndalojë të gjitha operacionet e tij dhe Izraelin që do të bënte të njëjtën gjë 12 orë më vonë.

Ndërkohë Izraeli nuk e ka pranuar publikisht propozimin për armëpushim.

Televizioni shtetëror iranian njoftoi se armëpushimi i ishte “imponuar” Izraelit.

Qeveria izraelite ka konfirmuar se ka pranuar propozimin për armëpushim të paraqitur nga presidenti amerikan, Donald Trump.

Në një deklaratë zyrtare thuhet: “Izraeli do të përgjigjet me forcë ndaj çdo shkeljeje të armëpushimit.”

Qeveria izraelite ka sqaruar se ka pranuar propozimin për armëpushim pasi, sipas saj, “janë arritur objektivat” e sulmeve ndaj Iranit.

Në deklaratë thuhet se Izraeli ka eliminuar “kërcënimin e dyfishtë dhe të menjëhershëm ekzistencial” nga Irani, që kishte të bënte me armët bërthamore dhe raketat balistike.

Po ashtu, autoritetet izraelite bëjnë me dije se kanë “shkaktuar dëme të rënda ndaj udhëheqjes ushtarake iraniane dhe kanë shkatërruar dhjetëra objektiva qendrore të qeverisë së Iranit”.

Më tej, deklarata sipas BBC, nënvizon se forcat izraelite, gjatë ditës së fundit, “kanë goditur rëndë objektiva qeveritare në zemër të Teheranit, duke eliminuar qindra operativë të Basij-it”, që përdoret shpesh nga qeveria iraniane për shtypjen e protestave, si dhe “kanë eliminuar edhe një tjetër shkencëtar të lartë bërthamor”.

Në përmbyllje të deklaratës, Izraeli shpreh mirënjohje ndaj presidentit Donald Trump dhe Shteteve të Bashkuara për mbështetjen në mbrojtje dhe për pjesëmarrjen në “eliminimin e kërcënimit bërthamor iranian”.