Publikuar më 17.04.2025 nga shekulli_admin

Kryeministri Edi Rama ka vijuar edhe sot me rubrikën “Sy m’sy” ku dy herë në javë ka një bashkëbisedim me qytetarët nëpërmjet komenteve në rrjetet sociale.

“Kemi pasur një moment shumë të bukur dje në sheshin “Skënderbej” me fëmijët e rrjetit të ri të ngritur në shkolla “Arte dhe zeje” të cilët do të marrin pjesë në ndërtimin e shtëpisë së Europës, që do të ndërtohet tek kopshti i Skënderbeut, nën monument ku do të mirëpriten udhëheqësit e kontinentit. Më 16 maj Tirana epiqendra e politikës europiane. Janë shumë tema në tryezë, dhe i pranishëm do të jetë edhe kancelari i ri i Gjermanisë.
Ky do të jetë një promovim tjetër i Shqipërisë i destinacion, moment tjetër i rritjes së kuotave tona në arenën ndërkombëtare, fuqizim i imazhit gjithashtu dhe moment promovimi edhe i Shqipërisë turistike sepse do të jemi në ekranet e të gjithë botës.
Në sprintin final të 27 metrave të fundit drejt finishit, po rritet energjia e përgjithshme politike, PS është flakë”, tha ai.

Kryesocialisti u ndal edhe tek vota e diasporës, për të cilën tha se është një zotim që tashmë është bërë realitet pasi zarfet me fletët e votimit po shpërndahen në të gjithë botën.

“Jemi në fazën e jetësimit të zotimit të hershëm për votën e diasporës. Zarfat e KQZ po shpërndahen gjithandej. Procesi është i thjeshtë por gjithsesi duhen ndjekur udhëzimet e KQZ”, tha ai.

Rama u shpreh se në lidhje me akuzat për ndikimin në shpopullimin e vendit duke u detyruar shqiptarët të ikin jashtë vendit, Rama u shpreh se kjo nuk është absolutisht e pavërtetë, pasi valë largimesh në vendin tonë ka pasur gjithmonë, edhe kur PS nuk ka qenë në pushtete.

“Po të shohësh të gjithë trajektoren e lëvizjes së shqiptarëve është e qartë se kur e si ka ndodhur. Kjo është si ajo shprehja” shpif se diçka do të mbetet””, tha ai.

Kreu i socialistëve shtoi se gjithçka e premtuar për mandatin e katërt nuk është një premtim për arsye elektorale, por pjesë e një plani të qartë pune. Sipas tij e vetmja ëndërr është ajo e anëtarësimit në BE.

“Ne nuk bëjmë premtime elektorale sepse në aspektin e punëvë ne japim informacion, janë pjesë e planeve tona qeverisëse, jo ëndrrave, ëndërr kemi vetëm një dhe ai është anëtarësimi në BE. Nuk janë premtime që hajd marrim një herë votën dhe më pas shohim e bëjmë”, tha ai.

Kryeministri Edi Rama ka vlerësuar figurën e kreut të SPAK Altin Duamani ndërsa është solidarizuar me situatat e vështira që ai ka kaluar me sulmet në emër të tij dhe familjes.

Megjithatë kryesocialisti u shpreh se edhe pse Dumani ishte një prokuror i përkushtuar në kohën e ngjarjeve të rënda në vendin tonë, nuk kishte “shpatën” e drejtësisë së re për të hetuar krimet e rënda.

Rama ka kujtuar edhe episode në lidhje me qasjen që kishte politika ndaj drejtësisë, duke iu referuar retorikës së përdorur nga ish-kryeministri Sali Berisha ndaj ish kryeprokurores Ina Rama, duke e quajtur “lavire bulevardi” pasi kërkoi të marrë në pyetje drejtues të policisë mbi “21 janarin”.

“Altin Dumanin kur e ke dëgjuar? E di që ka qenë prokuror në detyrë në këto kohë që po flas, prokuror i ndershëm i vendosur i përkushtuar por nuk ka thirrur dikë të thotë si i vrave ti ata katër veta, sepse nuk e kishte shpatën. Madje shefja e madhe e Dumanit, vetëm se çoi një copë letër për disa drejtues policie që ti pyeste se çfarë ndodhi, u gjen në pozitën që të shohë kryeministrin në TV që i thotë popullit se ajo është një lavire”, tha ai.

Kryeministri Edi Rama u është përgjigjur akuzave se një pjesë e madhe e qeverisë ka probleme me drejtësinë, në një nga komentet e “Sy m’sy”.

Rama theksoi se personat që përmenden si të përfshirë në çështje penale janë ish-ministra dhe nuk përfaqësojnë qeverinë e sotme.

Ai ka kujtuar 21 janarin dhe Gërdecin, duke u shprehur se në të kaluarën Shqipëria ka përjetuar skandale të rënda nga drejtues të lartë të shtetit, pa u ndëshkuar ndonjëherë nga drejtësia.

“Nëse sot ka zyrtarë me probleme me drejtësinë, kjo është rezultat i një drejtësie që më në fund ka filluar të lëvizë,” u shpreh Rama, duke vënë theksin se për herë të parë pas ’91-shit, njerëz të lidhur me pushtetin po përballen me ligjin.

Edi Rama: Qeveria ime është e gjitha në punë, ata që thua janë ish ministra dhe nuk janë as çereku i qeverisë që unë kam sot.
Nëse sot ka zyrtarë me probleme të hapura me drejtësinë, si erdhi kjo ditë? E solli Zoti, Amerika me aeroplan, apo BE me anije? Se SHBA dhe BE aty kanë qenë që në ’91 dhe ti nuk ke parë kurrë një individ të lidhur me pushtetin apo nga ata të lidhur me botën e krimit të jenë nën goditjen e shpatës së drejtësisë. Ke parë të kundërtën, qeveri e kryeministra që vrasin njerëz poshtë dritares së Kryeministrisë janë vrarë njerëz të pafajshëm, dritaret u bënë frëngji nga ku dolën pushkët e shtetit. Ke parë qeveri që hedhin në ere zona të banuara dhe nuk u ka hyrë gjemb në këmbë.
Ke pasur në Tiranë president që kanë hedhur Shqipërinë në humnerë, kanë nxitur vrasjen e 4 mijë njerëzve duke nxitur shqiptarë të fusnin lekë në piramida. Nuk po të kujtoj as që vinin me armë dhe murtaja në Kryeministri për të marrë pushtetin ca Honxho Bonxho dhe nuk ke parë një prokuror t’i thërrasë”.

Rama nuk i ka kursyer ironitë në drejtim të kreut të PD Sali Berisha, ndërsa pyeti nëse i është hequr ende “non grata” apo jo.

Ndërsa në lidhje me zgjedhjet e 11 majit, Rama u shpreh se Partia Socialiste do të marrë më shumë mandate se sa ka momentalisht, rezultat ky që sipas tij mbështetet në sondazhet që kjo forcë politike kryen gjithë kohës.

“Ore ia hoqën non gratën këtij bufit? Si shkoi puna e tij? Nuk është se ndryshon gjë se bufi buf do të mbetet por më duket se nuk ia kanë hequr.

Ne do të marrim më shumë mandate se sa kemi, se sa do të marrim do ta them me shkrim në Kuç por më duhet edhe pak kohë që të kuptoj se ku jemi. Ne kryejmë sondazhe shkencore gjithë kohës.

Diferenca jonë me kënetën do të jetë më e madhja ndonjëherë që nga ‘97″- tha Rama.