Publikuar më 16.04.2025 nga shekulli_admin

Kreu i Komisionit Qendror të Zgjedhjeve, Ilirjan Celibashi, ka bërë një sqarim lidhur me sigurinë dhe fshehtësinë e votës për emigrantët shqiptarë që votojnë për herë të parë nga jashtë vendit në zgjedhjet e 11 majit.

Në një deklaratë për mediat, Celibashi theksoi se procesi i administrimit të votës, sapo ajo të hyjë në sistemin e kompanisë postare DHL dhe të KQZ-së, është tërësisht i garantuar dhe nuk lejon asnjë ndërhyrje apo komprometim të fshehtësisë.

“Në momentin që fleta është në sistemin e DHL dhe KQZ, garantoj 100% ruajtjen e fshehtësisë, kjo garantohet plotësisht nga ne,” – deklaroi ai.

Megjithatë, ai la të qartë se çdo tentativë për të shitur, blerë apo treguar votën përpara se ajo të dorëzohet, është përgjegjësi e vetë qytetarëve dhe shoqërohet me pasoja penale serioze.

“Nëse votuesit duan ta shesin, blejnë apo tregojnë, është çështje e tyre. Do të thotë se kanë llogaritur edhe pasojat penale. Nëse një fenomen i tillë ndodh, ai shoqërohet me sanksione penale të rënda, deri në 3, 4 apo 5 vite burgim,” paralajmëroi Celibashi.

Kreu i Komisionit Qendror të Zgjedhjeve, Ilirjan Celibashi, ka njoftuar sot se janë bërë disa ndryshime në procesin e shpërndarjes së zarfeve me fletët e votimit për shqiptarët që jetojnë jashtë vendit.

Sipas tij, për të garantuar më shumë siguri dhe efikasitet, janë shtuar faza kontrolli si nga KQZ ashtu edhe nga kompania shpërndarëse DHL, çka ka sjellë një shtyrje të afateve për dorëzimin e fletëve, pa ndikuar në cilësinë apo integritetin e procesit.

Celibashi ka sqaruar gjithashtu se njoftimi me një shënim në rast se zgjedhësi nuk gjendet në banesë, është zëvendësuar tashmë me një njoftim nëpërmjet një mesazhi në telefon apo emaili.

Gjithashtu votuesit do të kenë mundësinë që fletën e votimit ta tërheqin vetë pranë zyrave të DHL në zonën përkatëse.

“Kemi shtuar si KQZ kontrollin , një fazë tjetër të saj dhe kompani DHL ka bërë të njëjtën gjë, kjo na ka çuar në shtyrjen e afateve për dorëzimin e fletëve të votimit, por kjo nuk cënon procesin.

Ne shpresojmë që në 2 ditë, por në rastin më ekstrem brenda javës të përfundojë procesi i dërgimit.

Disa procese pune janë modifikuar gjatë rrugës për të rritur eficencën dhe garancinë.

Zgjedhesit nga jashtë do të njoftohen nga DHL jo vetëm nëpërmjet lënies së një shënimi. Në mënyrë të unifikuar zgjedhjeve të unifikuar do t’u komunikohet me mesazh telefonik apo email se kur u mbërrin zarfi, dhe nëse nuk mund ta presin në banesë, mesazhi do të përmbajë të dhënat në lidhje me vendndodhjen e zyrave ku mund të shkojnë ta tërheqin.

Kjo besojmë se rrit eficencën dhe mundësinë për shpërndarjen 100 për qind të fletëve të votimit”, tha ai.