Publikuar më 19.10.2024 nga shekulli_admin

Ish-kryetari i bashkisë së Himarës, Fredi Beleri, i cili u lirua nga qelia në fillim të muajit shtator do të takohet në Tiranë me kryeministrin Edi Rama më datë 29 tetor, raportojnë mediat greke.

Në artikullin e gazetës “To Vima” takimi Rama-Beleri cilësohet si “takimi i vitit”. “Beleri do të takohet me njeriun që e mbajti në burg për 481 ditë”, shkruan ndër të tjera media greke.

“Kryeministri Edi Rama do të presë në Tiranë Fredi Belerin, i cili është përfshirë në delegacionin e Parlamentit Europian për Komisionin Parlamentar të BE-së për Stabilizim-Asociiimin me Shqipërinë”, citohet në median greke.

Delegacioni i BE, pjesë e të cilit do të jetë edhe Beleri, do të zhvillojë në Shqipëri një vizitë 3-ditore. Ky komision do të informohet gjithashtu nga ambasadori i BE në Tiranë, Silvio Gonzato, në lidhje me zhvillimet për negociatat e Shqipërisë me Bashkimin Europian.

Takimi me Kryeministrin Edi Rama i komisionit ku do të jetë dhe Beleri parashikohet që të zgjasë rreth 45 minuta. Pjesa e axhendës së takimeve janë edhe përfaqësues të partive të tjera si dhe njw takim me kryeparlamentaren Elisa Spiropali.

Beleri në një intervistë për televizionin grek SKAI ditën e sotme, komentoi hapjen e kapitujve të parë të Shqipërisë për negociatat me BE-në duke thënë se “vendi i Shqipërisë është në BE”

Fredi Beleri u shpreh gjithashtu se në Konferencën e Dytë Ndërqeveritare Shqipëri-BE u fol me terma të qarta edhe sa i takon mbrojtjes së minoritetit grek që është politikë e BE-së”.

Kujtojmë se Beleri u lirua pasi gjykata në Fier, ku ai po vuante dënimin me dy vjet burgim për blerje votash pranoi kërkesën e tij për lirim të parakohshëm.

Beleri, 51 vjeç, u arrestua dy ditë para zgjedhjeve lokale të 14 majit 2023 në Himarë. Ai u akuzua dhe u dënua për ofrimin e 360 eurove për t’i blerë tetë vota.Fredi Beleri dhe kryeminisitri Edi Rama, përplasja publike e të cilëve pati jehonë deri në Parlamentin Europian, pritet të kenë përballjen e parë me njëri tjetrin, por këtë herë nën petkun e Eurodeputetit që mban veshur ish-kryebashkiaku i dënuar i Himarës.

Gati dy muaj pasi u lirua nga burgu i Fierit ku vuajti për 16 muaj dënimin për shitblerje votash, Fredi Beleri rikthehet sërish në Shqipëri, këtë herë si pjesë e delegacionit të komitetit parlamentar të stabilizim asociimit mes Shqipërisë dhe BE-së, që do të mbahet më 29 tetor në Tiranë.

I kontaktuar nga Report TV, Fredi Beleri ka konfirmuar do të jetë në Tiranë, ndërsa në axhendën e delegacionit është edhe një takim me kryeministrin Rama që pritet të zgjasë rreth 45 minuta. Në skenarin më të mirë, mes tyre, që ndaj njëri- tjetrit kanë shkëmbyer akuza të forta, pritet të ketë një shtrëngim duarsh, e që Beleri, thotë se nuk do t’i shmanget, e do t’i japë dorën personit që e akuzon për burgosje politike.

Ky do të jetë takimi i radhës i komitetit parlamentar për stabilizim asocimit, që këtë herë vjen i rifreskuar pas zgjedhjeve të Parlamentit Evropian, ku një karrige e zuri edhe Fredi Beleri.