Publikuar më 25.04.2023 nga shekulli_admin

Serjan Repaj është lojtar profesionist i vërtetë i Skuadrës së I-rë të Apolonisë, me cilësi të shkëlqyera në organizim: i shpejtë, i mirë në lojën në ajër dhe i fortë në lojën një kundër një. Lojtar dhe djalë shembullor si në ndeshje e sidomos në stërvitje, civil dhe mjaft i paqëm, Serjani na dha një intervistë duke na përcjellë energjitë e tij pozitive.

Serjan, ju jeni nga Shkodra, qytet me traditë dhe futboll të zhvilluar dhe një popull interesant e futbolldashës. Si u bëre lojtar profesionist futbolli? Nga nisi rrugëtimi juaj?

Karriera ime si futbollist nisi në moshën 9-vjeçare në ekipin e fshatit tim ku u rrita deri në moshën 12-vjeçare. Pastaj fillova me ekipet zinxhir të Vllaznisë aty ku pothuajse në çdo grupmoshë kena dalë kampion. Dy vitet e fundit të ekipive zinxhir kena fitu dy herë Kupën e Shqipërisë dhe një here kampionatin. Luajta në UEFA YOUTH LEAGUE, eksperienca më e bukur për një futbollist të ri. Në moshën 19-vjeçare debutova në ekipin e parë të Vllaznisë moment që nuk do ta harroj kurrë. Ishte andrra ime, por asht edhe andrra e çdo shkodrani.

Cila ishte pjesa më e vështirë e rrugëtimit tuaj për t’u bërë një futbollist profesionist?

Pjesa më e vështirë ishte momenti ku dola nga moshat në ekipin e parë dhe aty fillon dhe bahet ma e vështirë cdo gja.

Kush ka pasur ndikimin më të madh në karrierën tuaj?

Baba jem asht personi i vetëm që kishte besim dhe gjithmonë më jepte kurajo për të vazhduar përpara.

Cilat mendoni se janë  cilësitë më të rëndësishme për një futbollist të suksesshëm?

Mendoj se për nji futbollist profesionist cilësitë kryesore janë shpejtësia, teknika dhe të ketë vendosje të mirë taktike.

Kur keni ardhur te Klubi Apolonia dhe a ka qenë rrugëtim i mirë karriere pranë tij?

Te Apolonia erdha në vitin 2020, atëherë kur ekipi ishte në Superiore. Mendoj se kam ba një  lëvizje të mirë për të ardhmen time.

Çfarë mendoni se e dallon ekipin e Apolonisë nga ekipet e tjera?

Apolonia asht ekip që i hap dyert çdo talenti të ri dhe i jep mundësinë për t’u rrit në karrierë dhe për të ba hapa të mëdhenj, ndryshe nga ekipet tjera shiptare.

Çfarë vlerësoni më shumë këtu, trajnimin, atmosferën, kulturën e Klubit, trajtimin, skuadrën?

Trajnimi që i bahet lojtarëve me seriozitet nga drejtuesit dhe stafi i klubit.

Për cilën arritje në karrierën tuaj të futbollit jeni më krenar?

Krenar që kam vesh dy fanela me histori dhe kulturë në kampionatin shqiptare, atë të Vllaznisë dhe të Apolonisë.

Cila ishte gjëja më e vështirë që keni mësuar për të luajtur futboll?

Asgjë në futboll nuk është e lehtë, gjithçka duhet vlerësuar dhe përmirësuar çdo ditë.

Cila ishte këshilla më e mirë që dikush ju ka dhënë për të luajtur futboll?

Këshilla që kam marrë nga trajneri Kamarata, Nëse doni që të ecni para, duhet të kaloni limitet tuaja personale.

Cilat kanë qenë momentet më të këqija në karrierën e futbollit? Po më të mirat?

Momentet më të mira i kalova këtu në Fier vitin që Apolonia ishte në Superiore. Momenti më i keq që kam mësuar prej tij asht kartoni i kuq në ndeshjen e fundit të Superligës.

Si qëndroni në formë në periudhën jashtë sezonit?

Ne jemi profesionista dhe nuk rrimë asnjëherë pushim. Marrim programin që na jep trajneri dhe e zbatojmë me seriozitet.

Çfarë pengesash ju është dashur të kapërceni për të arritur këtu ku jeni sot në karrierën tuaj?

Pengesa më e madhe është jeta jashtë sportit e cila të tërheq, por duhet sakrificë e madhe ta lësh pas.

Si e trajtoni zhgënjimin pas një humbjeje?

Të them të drejtën i përjetoj pak keq humbjet nuk më dilet fare nga shtëpia derisa ta marr veten.

Si qëndroni të motivuar edhe kur rezultatet nuk ju ecin?

Eci gjithmonë me “pas vështirësisë vjen lehtësimi”.

Si arrini të qëndroni të përqendruar gjatë ndeshjeve të gjata ose kur loja nuk po shkon sipas mënyrës që ekipi juaj do?

Në raste të tilla mundohem gjithmonë që të jem i qetë dhe t’ju flas vetëm fjalë të mira shokëve sepse në futboll ka ndeshje të tilla që nuk të ecën.

A ndiqni ndonjë sport tjetër përveç futbollit? Nëse po, cilat?

Përveç futbollit nuk ndjek ndonjë sport tjetër të them drejtën.

Dimë se shumë futbollistë kanë bestytni për fitoren.  Ju keni ndonjë ritual apo bestytni para lojës?

Jo unë personalisht nuk merrem me këto gjëra, mbështetem vetëm te Zoti i madh dhe në asgjë tjetër.

Kush është futbollisti juaj i preferuar dhe pse?

Futbollisti im i preferuar është Sergio Ramos më pëlqen grinta që ka dhe roli i liderit që merr gjithmonë në fushën e lojës.

Cili është ushqimimi juaj  i preferuar para ndeshjes?

Nuk kam ndonjë preference, eci gjithmonë me dietën që jep doktori i ekipit

A keni ndonjë këshillë për prindërit, fëmijët e të cilëve luajnë futboll në Akademinë e Futbollit F.K. Apolonia?

Dua t’u them dicka të rëndësishme. Shpresoj që të vlejë kjo si këshillë. Mos i lini fëmijët që të ndikohen nga shoqëria jashtë futbollit dhe mbështetini dhe jepini zemër që të ndjekin ëndrrën e tyre.

Ku e shikon veten pas pas ca vitesh Serjan Repaj?

Dëshira ime është që të kap një kampionat jashtë Shqipërisë dhe besoj se me ndihmën e Zotit, në një të ardhme shumë të shpejtë do t’ia arrij.