Publikuar më 07.06.2025 nga shekulli_admin

Shqipëria përballet sot me Serbinë në një ndeshje shumë të rëndësishme në Grupin K të kualifikuesve të Botërorit 2026. Kjo është një ndeshje rëndësishme në aspektin sportiv, por padyshim edhe në aspektin emocional të asaj që përmbledh sfida në fjalë duke kujtuar historinë por edhe atë që ndodhi në Beograd 11 vite më parë.

Shqipëria kë regjistruar një humbje ndaj Anglisë dhe një fitore përballë Andorrës në dy sfidat e para të luajtura, ndaj një rezultat pozitiv e sidomos fitorja ndaj Serbisë, do ta mbante në shinat e duhura për të luftuar për vendin e dytë që çon në play-off të Botërorit. Ndërsa na anën e saj, për Serbinë kjo është ndeshja e parë e kualifikuesve, pasi në dritaren e marsit ajo mori pjesë në ndeshjet e play-off të Ligës së Kombeve.

Trajneri Silvinjo ka bërë ndryshime drastike në rreshtimin e kuqezinjve. Në mbrojtje shfaqet përsëri nga minuta e parë Hysaj, ndërsa Ajeti fiton balotazhin me Ismajlin përkrah Gjimshitit, me Mitajn që rifiton vendin në të majtë. Në mesfushë, Shehu i merr vendin Ramadanit, ndërsa përkrah do të ketë Asllanin e Laccin.

Ndërkohë, Bajrami e Asani ulen në stol, me Hoxhën nga minuta e parë në të majtën, ndërsa Manaj e Broja do jenë më në qendër të sulmit.

FORMACIONET ZYRTARE

SHQIPËRIA: Strakosha, Gjimshiti, Ajeti, Hysaj, Mitaj, Shehu, Asllani, Laçi, Hoxha, Broja, Manaj.
Trajner: Silvinjo

SERBIA: Petroviç, Pavloviç, Milenkoviç, Erakoviç, Lukiç, N. Maksimoviç, A. Zivkoviç, Samarxhiç, Terziç, Vlahoviç, Mitroviç.
Trajner: Predrag Stojkoviç

Portieri Etrit Berisha nuk u grumbullua nga Silvinjo për ndeshjet e Kombëtares kundër Serbisë dhe Letonisë. 

Pavarësisht kësaj, gardiani kuqezi nuk ka harruar të motivojë shokët e tij në prag të kësaj ndeshje shumë të rëndësishme.

Përmes një postimi në “InstaStory” ai ka postuar një foto të vetën teksa është me plis në kokë dhe shkruan: “Suksese djema, dalshit faqebardhë”.

Rikujtojmë që sfida kundër Serbisë luhet sot në orën 20:45 ndërsa ajo kundër Letonisë më datë 10 qershor.

UEFA ka lejuar që Shqipëria dhe Serbia të jenë kundërshtarë të mundshëm edhe pas trazirave në Beograd në eliminatoret e Euro 2016 dhe pas 10 vitesh shorti i vendosi përsëri përballë në eliminatoret e Botërorit 2026. Megjithatë, institucioni që  drejton futbollin kontinental i cilëson këto ndeshje si ato të rrezikshmërisë shumë të lartë, ndaj ka nisur një ekspert për të monitoruar gjithçka.

Delegati i ndeshjes së sotme, praktikisht njeriu i plotfuqishëm i UEFA-s në stadium që ka në dorë çdo vendim madhor për shkak trazirash, edhe ndalimin e saj, është zvicerani Zhak Antenen. Veçoria e tij është se ai është një ekspert sigurie falë eksperiencës së jashtëzakonshme me mbi një dekadë si shef i policisë në kantonin e Vaud në Zvicër.

Për ata që nuk e  dinë, kantoni në fjalë është ai në të cilin gjenden zyrat e UEFA-s, ndaj Zhak Antenen është një emër shumë i njohur për institucionin e futbollit. Nuk është rastësi që krahas punës si shef policie, apo edhe më vonë si ekspert sigurie i pavarur, ai ka bërë edhe rolin e funksionarit të jashtëm të UEFA-s, si këshilltar për sigurinë në evenimente apo edhe delegat për ndeshjet e veçanta.

Dhe në vitin 2023, pikërisht Antenen u caktua si delegati i ndeshjes finale të Ligës së Kampioneve në Stamboll mes Mançester Sitit dhe Interit, që cilësohej e një rrezikshmërie të lartë për shkak të spostimit të madh të tifozëve anglezë drejt Turqisë.

Ndaj nuk është rastësi që UEFA ka dërguar një nga njerëzit më të besuar dhe me ekspertizën më të madhe për ndeshjen e sotme në Tiranë, pasi e cilëson si një nga më delikatet e këtyre kualifikueseve.