U mbyt në Liqenin e Shkodrës pasi shpëtoi 2 turistët izraelitë, qeveria shpall “Dëshmor të Atdheut” kapitenin Arben Anamali
Publikuar më 10.07.2025 nga shekulli_admin
Kryeministri Edi Rama ka reaguar me një mesazh në rrjetin social Facebook, duke nderuar Kapiten Arben Anamalin, i cili humbi jetën gjatë një aksioni heroik për shpëtimin e dy turistëve në Liqenin e Shkodrës.
“U prehsh në paqe, dëshmor i atdheut,” shkruan Kryeministri në postimin e tij, duke e cilësuar kapitenin si një hero të Republikës, që u vetësakrifikua për të shpëtuar jetën e të tjerëve.
Arben Anamali ishte drejtues i anijes turistike të Bashkisë Shkodër dhe ndërhyri pa hezitim për të ndihmuar dy turistë që rrezikonin të mbyteshin në ujërat e liqenit. Ai arriti t’i shpëtojë, por për fat të keq humbi jetën gjatë misionit shpëtimtar.
“I paharruar, Kapiten Arbeni,” përfundon postimi i Kryeministrit, duke ngushëlluar familjen dhe të gjithë qytetarët për këtë humbje të rëndë.
Kapiteni i anijes turistike të bashkisë u hodh në ujë për të shpëtuar dy turistë izraelitë, por nuk mundi që t’ia dilte vetë. Trupi u gjet gjatë ditës së tretë të operacionit të kërkimit, që nisi rreth orës 05:00.
“Në vijim të informacionit të dhënë më datë 08.07.2025, për kapitenin e një anijeje që u mbyt gjatë përpjekjes për të shpëtuar dy turistë që kishin rënë në ujë, në liqenin e Shkodrës, bëjmë me dije se si rezultat i kontrolleve të pandërprera nga shërbimet e Policisë Kufitare, në bashkëpunim me polumbarët e RENEA-s, ditën e sotme, është bërë e mundur gjetja dhe nxjerrja nga uji, e trupit të pajetë të kapitenit të anijes, shtetasit A. A., 51 vjeç.”, njofton policia.
Më 8 Korrik, 15 turistë të huaj të nisur nga Shiroka, kërkuan që të shijonin me not liqenin dhe refuzuan të dëgjojnë kërkesën e kapitenit për të mos u futur në ujë, sepse era që vinte nga veriu ishte e rrezikshme. Pak minuta pasi ata u hodhën në ujë, kërkuan ndihmë, pasi era i kishte larguar rreth 50 metra larg nga anija.
Kapiteni është hedhur në liqen me dy kamerdare shpëtimi, por pasi ka arritur të shpëtojë dy turistët, ka mbetur vetë, pa mundur të kthehej për shkak të erës së fortë, e cila e shtynte në thellësi të liqenit.
Kryebashkiaku i Shkodrës, Benet Beci tha se akti i tij heroik u kthye në tragjedi. Arben Anamali, si një mjeshtër i motorëve të barkave dhe skafeve, por edhe kapiten i licencuar, u punësua nga bashkia Shkodër me 1 maj të 2024 kur edhe u sollën anijet turistike “Buna” dhe “Drini”. 51-vjeçari ishte baba i dy fëmijëve.
.jpg)
.jpg)
