Publikuar më 09.07.2025 nga shekulli_admin

Dhëndri i ish-kryeministrit Sali Berisha, Jamarbër Malltezi ka folur sot për herë të parë në “Breaking” Top News, pas lirimit nga arresti i shtëpisë me garanci pasurore.

Malltezi tha se nga i gjithë ky proces, i vjen keq që nuk ka mundur të jetë pranë fëmijëve të tij. Ai tha se është burgosur për tokën e tij, duke shtuar se nga prona ka marrë vetëm 8%. Ai tha po ashtu se brenda ditës i janë sekuestruar pasuritë që sipas tij, janë krijuar kur ishte pjesë e OKB-së.

“Unë kam 4 fëmijë, djali tashmë është në adoleshencë. Vajzat jetojnë jashtë dhe nuk e konceptojnë dot heqjen e lirisë pa akuzë dhe pa prova. Më vjen keq që nuk iu jam gjendur pranë. Por janë vështirësi që jeta t’i vendos përballë dhe unë kam vendosur të përballem.

SPAK-ut i ka rënë tymnaja e akuzave. Janë depozituar 3 çështje për mua në Strasburg dhe shumë shpejt do shihen rezultatet. Këto kanë ndikuar në lirimin tim.

Unë kam qëndruar 20 muaj i ndaluar, kanë ndryshuar shumë gjëra. Mu sekuestruan pasuri që unë i kam bërë kur isha pjesë e OKB-së. U sekuestruan brenda ditës mbi 70% e pasurive, llogari bankare, pronat që i kisha blerë kur isha pjesë e OKB-së dhe gjithçka tjetër.

Unë kam kërkuar që Rama të vijë dëshmitar në gjyq sepse ka qenë kryebashkiak. Gjyqtarët kanë patur frikë ta thërrasin. Unë kam bërë dhe padi penali sepse ka shpërdoruar detyrën. Rama ka firmën në çdo gjë. Në lejen e ndërtimit, etj.

SPAK nuk po e mbron interesin publik. 4 prokurorë i ka promovuar Taulant Balla. Unë jam në tokën time dhe u burgosa për tokën time. Jam brezi i tretë që burgosem për tokën time. Daja im është burgosur për këtë, nëna ime është internuar dhe unë jam brezi i tretë që burgosem. Unë kam marrë vetëm 8% të pronës time, 92% është vjedhur.”– tha Malltezi.

Ai tregoi për herë të parë detaje nga arrestimi i tij në aeroportin “Nënë Tereza”, të cili ne cilëson si rrëmbim. Ai thotë se nuk iu tregua asnjë urdhër-arrest apo dokument tjetër dhe se u mor në polici pa njoftim.

“Unë isha duke folur në telefon me gruan time, kur erdhën 3 persona pa njoftim pa gjë. U kërkova një letër, nuk më dhanë gjë. Ata më morën telefonin dhe më thanë do vish me ne. Unë thirra disa njerëz që ishin pranë dhe u thashë filmoni sepse ky është rrëmbim personi. Më futën në një makinë pa targa, jo makinë policie dhe nuk më jepnin as telefonin. Ishte rrëmbim personi. Më çuan tek drejtoria e përgjithshme e policisë. Më thanë firmos ca letra dhe unë nuk pranova. Aty më lejuan më pas të telefonoja avokatin. Ishte rreth 1 orë, 1 orë e 30 minuta pa ditur gjë.”– tha ai.

Ai ka treguar për herë të parë bisedën që ka patur me Sali Berishën, vjehrrin e tij pas humbjes së Partisë Demokratike në zgjedhjet e 11 majit. Malltezi tregoi se i kërkoi që të hiqte dorë, por shtoi se kur provat për krimet zgjedhore, e kuptoi që Berisha nuk mund të largohej.

“I kam thënë vetë Berishës që nuk ja vlen më se është lodhje, mundim dhe shqiptarët nuk të duan më. Por kur dolën faktet dhe dokumentet e vjedhjeve, rastet e tmerrshme nga krimet zgjedhore… Berisha e ka dhënë dorëheqjen në 2013 kur kuptoi që shqiptarët nuk e mbështesnin. Do priste numërimin dhe mund ta bënte, por dolën faktet që tregoi kriminalizimin e votës së diasporës. Sali Berisha është i vetmi që na bëri bashkë, ka frymën pozitive. Rama po mundohet të nxjerrë demokratë dhe t’i kthejë kundër.  Unë nuk kam ambicie politike por për çfarëdo lloj pozicioni jam i gatshëm. Jam kundër Partisë Komuniste dhe do jem kundër Ramës gjithmonë.”– tha ai.