Publikuar më 30.06.2025 nga shekulli_admin

Seanca gjyqësore për çështjen e njohur si dosja “Partizani” është shtyrë për në datën 21 korrik 2025 ora 10:30, pasi ish-kryeministri Sali Berisha nuk ishte i pranishëm në sallën e gjyqit.

Prokurori i çështjes, Arben Kraja, kërkoi shtyrjen e seancës me argumentin se Berisha nuk është njoftuar zyrtarisht për zhvillimin e saj.

Sipas Krajës, njoftimi i është dorëzuar dhëndrit të tij, Jamarbër Malltezi, i cili ka marrë përsipër ta informojë Berishën, por ka deklaruar se nuk ka pasur kohë të mjaftueshme për ta bërë këtë në mënyrë të duhur.

Në seancë u paraqitën të pandehurit Jamarbër Malltezi dhe Fatmir Begeja. Ndërkohë, i pandehuri tjetër, Fatmir Bektashi, u përfaqësua vetëm nga avokati për shkak të problemeve shëndetësore. E pranishme nuk ishte as Andia Pustina, e cila ka zgjedhur të përfaqësohet në proces përmes mbrojtësit të saj ligjor.

Shtyrja e radhës në këtë proces vjen në një kohë kur pritet që Gjykata të shqyrtojë në themel provat dhe argumentet mbi pretendimet për shpërdorim detyre dhe përfitime të paligjshme në lidhje me truallin e ish-Kompleksit “Partizani”.

Trupa gjykuese pyeti Malltezin nëse ka njoftuar Berishën, pasi OPGJ ia ka lënë atij fletëthirrjen. Malltezi tha në seancë se nuk e ka njoftuar dhe nuk është në dijeni nëse vjehrri i tij ka marrë njoftim.

Klodiana Gjyzari, avokatja e Berishës: Njoftimi ka shkuar ditën e premte për Berishën, është firmosur nga Malltezi. Koha ka qenë e shkurtër për tu njoftuar sipas shpjegimit që dha Malltezi. Edhe ne nuk kemi patur kontakte gjatë kësaj kohe.

Arben Kraja kërkon shtyrjen e seancës pasi nuk është bërë njoftimi sipas ligjit për Berishën ndërsa Homplan nuk ka asnjë përfaqësues ligjor. Ndërkohë, mungonte edhe Fatmir Bektashi i cili mungonte për arsye shëndetësore. Trupa gjykuese vendosi shtyrjen e seancës më datë 21 korrik ora 10:30.

Seanca e parë u hap nga tre gjyqtarët Elsa Ulliri Kryesuese, Bib Ndreca dhe Rudina Palloj anëtarë.

Fletëthirrja për Berishën është marrë dhe firmosur nga Malltezi.

Elsa Ulliri: Zoti Malltezi e keni njoftuar të pandehurin Berisha në lidhje me seancën e sotme?

Jamarbër Malltezi: Nuk e kam njoftuar.

Në një shkresë policia bëri me dije se ia ka dorëzuar fletëthirrjen zotit Berisha dhe se ai është në dijeni për seancën e sotme.

Në seancë mungon i akuzuari  Fatmir Bektashi për arsye shëndetësore.

Andia Pustina nuk është e pranishme në sallën e gjyqit dhe kërkon të përfaqësohet nga avokati i saj Klodian Skënderi.

Nga ana tjetër, njëri nga avokatët e ish kryeministrit Berisha, Klodiana Gjyzari deklaroi: Koha ka qenë e shkurtër dhe ne nuk kemi dijeni nëse zoti Berisha është njoftuar për seancën e sotme.

Prokurori Arben Kraja: I pandehuri Sali Berisha nuk është njoftuar për seancën e sotme, po ashtu shoqëria Homeplan shpk konstatojmë se nuk ka avokat në sallë.

SPAK kërkoi që seanca të shtyhet dhe të caktohet një datë tjetër.

Gjykata: Të konsiderohet e pranishme Andia Pustina dhe të mbrohet nga avokatja Klodiana Gjyzari. Gjykata legjitimon avokatët e të pandehurve. Seanca do shtyhet për në një datë tjetër.

Seanca e ardhshme, datë 21 korrik ora 10:30.

Ish kryeministri Sali Berisha ndodhet nën masën detyrim paraqitje, kurse dhëndri i tij, Jamarbër Malltezi në arrest shtëpie.