Publikuar më 20.02.2025 nga shekulli_admin

Komisioni Qendror i Zgjedhjeve tashmë ka numëruar të gjitha votat e rregullta për subjektet politike, ndërkaq po vazhdon me numërimin e votave për kandidatët për deputetë.

Së fundmi KQZ ka filluar publikimin e numrit të votave të kandidatëve të secilit subjekt politik.

E nga numërimi i mbi 90% të votave për kandidatë, kandidati më i votuar për kryeministër nga katër sa ishin në garë, del të jetë Albin Kurti nga Lëvizja Vetëvendosje.

Kurti ka marrë deri më tani 259 mijë e 532 vota. Pas tij më i votuar është kandidati i PDK-së për kryeministër, Bedri Hamza me 150 mijë e 294 vota.

Kandidati i LDK-së për kryeministër, Lumir Abdixhiku është i treti me 109 mijë e 202 vota dhe i katërti Ramush Haradinaj nga AAK me 37 mijë 752.

Në nivel vendi nga numërimi i votave të rregullta Lëvizja Vetëvendosje është partia e parë më 40.80% apo 342 mijë e 281 vota. E dyta renditet Partia Demokratike me 22.03% apo 184 mijë e 811 vota.

Në vendin e tretë sipas KQZ-së është Lidhja Demokratike e Kosovës me 17.63% apo 147 mijë e 888 vota dhe në vendin e katërt koalicioni AAK-Nisma me 7.46% apo 62 mijë e 588 vota.

Duhet theksuar se këto rezultate nuk përfshihen rezultatet e votave me kusht, votave të personave me nevoja të veçanta dhe votave nga votimi jashtë Kosovës, numërimi i të cilave do të bëhet gjatë ditëve në vazhdim në Qendrën e Numërimit dhe Rezultateve. 

Votat e kandidatëve për deputetë

Komisioni Qendror i Zgjedhjeve ende nuk ka përfunduar numërimin e të gjitha votave nga zgjedhjet e 9 shkurtit. Aktualisht është duke vazhduar procesi i numërimit të votave për kandidatët për deputetë, ku deri tani janë numëruar 92.73% e vendvotimeve.

Nga numërimi i këtyre vendvotimeve, në media kanë qarkulluar listat e partive politike dhe kandidatëve të tyre për deputetë, me numrin e votave që kanë marrë.

Si rezultat i numrit të votave që kanë fituar deri tani, ende pa përfunduar numërimi i të gjitha vendvotimeve dhe votave të tjera, siç janë: numërimi i votave me kusht, votave të personave me nevoja të veçanta dhe votave nga votimi jashtë Kosovës, listat e partive politike kanë sjellë befasi.

Shumë figura të njohura të të gjitha partive politike rrezikojnë të mbesin jashtë Kuvendit të Kosovës, dhe shumë të tjera të reja pritet të zënë vendet e tyre për herë të parë në këtë institucion, shkruan Telegrafi.

Megjithatë, listat mund të ndryshojnë në përqindje të vogël.

Në listën e Lëvizjes Vetëvendosje, top pesë figurat më të njohura që deri tani nga numërimi i votave duket se nuk do të kenë ulëse në Kuvend janë: Hysen Durmishi, Rozeta Hajdari, Enver Dugolli, Ardian Gola dhe Ismajl Kurteshi.

Befasi në listën e LVV-Alternativa e Guxo ishin emrat e rinj që pritet të sigurojnë ulëse në Kuvend. Pesë prej tyre janë: Edona Llalloshi, Liza Gashi, Bylbyl Sokoli, Nezir Kraki dhe Ilir Kërçeli.

Edhe në listën e Partisë Demokratike të Kosovës, figura të njohura rrezikojnë të mbesin jashtë Kuvendit.

Top pesë prej tyre janë: Xhavit Haliti, Ardian Kastrati, Hisen Berisha, Hajdar Beqa dhe Eliza Hoxha.

Befasi në listën e kësaj partie gjithashtu ishin emrat e rinj që kanë marrë numër të konsiderueshëm të votave. Pesë nga ta janë: Sala Jashari, Artan Behrami, Altin Krasniqi, Petrit Hajdari dhe Kosovare Murseli.

Megjithatë, duke llogaritur plotësimin e kuotës gjinore, vendet mund të ndryshojnë.

Në listën e Lidhjes Demokratike të Kosovës, nga votat e numëruara deri më tani, jashtë Kuvendit rrezikojnë të mbesin këto top pesë figura: Arben Gashi, Drita Millaku, Driton Selmanaj, Rrezarta Krasniqi dhe Valentina Bunjaku-Rexhepi.

Top pesë emrat e rinj nga kjo parti që befasuan me vota dhe pritet të jenë pjesë e kësaj legjislature në Kuvend janë: Paris Guri, Fadil Hadërgjonaj, Jehona Lushaku-Sadriu, Serbeze Muçaj dhe Alban Zogaj.

Megjithatë, ndryshimet në listën e LDK-së mund të jenë më të mëdha duke llogaritur edhe mandatet që i kanë fituar kryetarët e komunave, si dhe kuotën gjinore.

Edhe në listën e koalicionit AAK-Nisma, nga rezultatet e deritanishme, figura të njohura rrezikojnë të mbesin jashtë Kuvendit.

Prej tyre janë: Besnik Tahiri, Pal Lekaj, Shemsedin Dreshaj, Albana Bytyqi.

Katër ish-deputetët e legjislaturave të mëhershme Daut Haradinaj, Fatmir Limaj, Lahi Brahimaj, Ardian Gjini bashkë me deputeten e re Arbëreshë Krasniqi kanë marrë vota të mjaftueshme për t’u bërë deputetë.

Nëse Ardian Gjini mban pozitën e kryetarit të Komunës, atëherë zëvendësohet nga Vesel Krasniqi i Nismës Socialdemokrate.

Të dhënat preliminare të KQZ-së tregojnë se ky koalicion në zgjedhjet e 9 shkurtit ka fituar 8 mandate.