Publikuar më 10.02.2025 nga shekulli_admin

Edi Rama ka thirrur në një mbledhje urgjente grupin parlamentar të Partisë Socialiste, ku në fokus të diskutimeve do të jetë arrestimi i kryebashkiakut të Tiranës, Erion Veliaj me urdhër të SPAK.

Deputetët socialistët, të pyetur nga gazetarët në hyrje të Kuvendit janë treguar të rezervuar për të komentuar, teksa disa janë distancuar duke e konsideruar një punë të drejtësisë.

“Nuk kam komentuar vendimet e drejtësisë, por Erion Veliaj ka qenë e do të mbetet mik i mirë i imi” tha Toni Gogu.

“PS nuk ndërhyn në punët e drejtësisë dhe nuk komenton ato” tha Lavdërim Krashi.

Rama pritet t’u japë porosi se çfarë qëndrimi do të mbajnë, pasi priten debate të forta edhe në sallën e Kuvendit.

Edi Rama anuloi takimet që kishte në agjendë në Shkodër dhe u nis me urgjencë drejt Tiranës, pas arrestimit të Veliajt.

Në fjalën e tij nga foltorja e Kuvendit të Shqipërisë, kryetari i PD-së, Sali Berisha, i bëri thirrje kryeministrit Edi Rama që të shkojë në Kuvend për të zhvilluar një debat të gjerë lidhur me arrestimin e kryetarit të bashkisë Tiranë, Erion Veliaj.

Berisha kërkoi gjithashtu që Rama të japë dorëheqje.

Berisha: Kjo ishte një ditë e madhe për shqiptarët…Harrojnë këta që ka një Zot në këtë vend, që opozita do bëje betejën e vet deri në fund. Koha juaj ka mbaruar, prandaj Rama te vij këtu, të ketë një debat të gjerë dhe të jap dorëheqjen në mënyrë që vendi të shkojë drejt zgjedhjeve.Arrestuan Veliajn se i paska bërë favore filanit, po Rama çfarë favoresh ka bërë…Baxhanaku i Ramës me mandate arresti ka marrë dhjetëra mln tendera pa garë.

Gjatë seancës plenare, kryetarja e Parlamentit Elisa Spiropali, i ka ndërprerë fjalën kreut të PD-së Sali Berisha, pasi i kishte përfunduar minutazhi.

Ka qenë Albana Vokshi që i ka dhënë 10 minutat e saj, Berishës, dhe për këtë kreu demokrat i është drejtuar Spiropalit duke i thënë të kënaqet për herë të fundit, duke shtuar se do të përfundojë si Erion Veliaj, pas hekurave.

Në përgjigje Spiropali i tha se nëse nuk do të kishte qenë kryetare e Kuvendit, do të kishte folur ndryshe.

Pjesë nga debati:

Spiropali: Përfundoni zoti Berisha

Berisha: Më lejoni pra, është radha jonë.

Spiropali: Ka mbaruar koha? E Albana Vokshit?

Berisha: U kënaqe që nuk flet Albana Vokshi. Kënaqu për herë të fundit, se te Erioni do shkosh.

Spiropali: Mos përfito që jam këtu lart, se ta ktheja përgjigjen ndryshe. Po të jap kohën, mos abuzo.

Berisha: Elisa, pëllumbesha, më lër të flas tani, mos mi merr minutat. Mos më ndërhy më se nuk ke për të më ndërhyrë. Je një delinkuente.

Spiropali: Përfundo fjalën, boll me atë gjuhë.

Berisha: Mos ndërhy pra

Pjesë nga fjala e Berishës në Kuvend:

Nuk dua të përdor terma dhe nuk do të përdor, nuk do bëj gojën time, si gojën e tij.

Po çfarë menduat ju, se me mercenarë si Dumani do të shkatërronit pluralizmin në Shqipëri.

A e morët sot mesazhin apo jo. A doni të ua sjell prap ju, të ua transmetoj se nuk e keni marrë vesh disa prej jush.

I them Edi Ramës se nuk mund të fshihesh pas fustanit të Ajola Xoxës dhe as Erion Veliajt. Sepse populli i Tiranës  ka  protestuar 42 javë rresht te ajo bashki për arrestimin e tij.

Po për turpin, turpin e atyre të cilët për të mbrojtur Edi Ramën, nuk e akuzojnë për 130 mln euro të zhdukura  në inceneratorin e Tiranës. Më thoni mua si ndodh kjo.

Nuk e akuzojnë. Ku është ajo ‘5B’, sille këtu Belindën.

Ku është ‘5B’. Nuk e akuzojnë për 5D, nuk e akuzojnë për vjedhjet monstruozë të taksave, të taksave antikushtetuese.

Po pse e akuzojnë thoni ju? E akuzojë se Edi Rama i jep për detoks, e dini ju ca  është detoksi, 10 mijë euro detoksi dhe i paguan paratë bashkëshorti i Alketa Vejsiut dhe kërcasin lejet nga jugu tek parku i Tiranës për bashkëshortin e Alketa Vejsiut.

Po detoksin nuk e bëri Erion Veliaj. Detoksin e bëri Edi Rama. Me seanca, jo njëherë, por disa herë.

Po ai tjetri që i paguante Edi Ramës, 12 chartera. Nuk ishte Erion Veliaj me 12 chartera.

Erion Velaij është një hajdut që përveç Ramës dhe Lubisë nuk ka shok në Shqipëri. Por nuk mund të tallet mercenar Dumani me qytetarët shqiptarë. Jo talljen nuk ta pranojmë ne.

Ai harron, ai nuk e di se nga bashkia shkojnë atje poshtë qytetarët dhe e fshijnë.