Publikuar më 14.11.2024 nga shekulli_admin

Pas disa javësh konkurrimi, 12 drejtoritë e qarqeve të Policisë së Shtetit kanë këtë të enjte drejtuesit e rinj. Emrat e tyre u prezantuan Ervin Hoxha, ministër i Brendshëm, në një ceremoni të organizuar në ministri.

Po kush janë emrat që ikin dhe kush janë të rinjtë

Pas gati 2 vitesh në drejtimin e Policisë së Tiranës, oficeri i karrierës Tonin Vocaj, që mbi supe mbajti detyrat më të rëndësishme të bluve, largohet duke i lënë vendin brezit të ri. Nga zv/drejtor në Vlorë, Elton Alushi emërohet në qarkun kryesor në vend, për të vijuar punën e vështirë të një metropoli që prodhon çdo ditë telashe.

Së fundmi, Alushi ka mbajtur edhe detyrën e shefit të Komisariatit të Krujës. Në Durrës emërohet Vilson Bala, pas detyrës së vështirë për drejtimin Operacionales dhe Komisariatit nr. 6, duke zëvendësuar Skënder Hitën, i cili emërohet në Fier, duke zëvendësuar Lorenc Panganikën.

Pavarësisht se u rendit i 16-i në renditjen e pikëve, ministri Hoxha ka parë të arsyeshme të vijojë drejtimin nga Hita, me karrierë në Durrës, Dibër dhe Shkodër.

Eksperienca në Akademinë e Sigurisë e Fatmir Hoxhës është parë e udhës të emërohet në Elbasan, në qarkun që deri para pak kohësh e drejtonte Ilir Proda. Fatmir Lleshaj zëvendëson Edmond Sulajn në Shkodër, duke nisur sfidën me një prej qarqeve më të vështirë në vend.

Prova e parë është zbardhja e atentatit me 4 viktima në Dobraç më 30 tetor. Nga gara për drejtor të përgjithshëm te emërimi në drejtues të Policisë së Lezhës, Altin Mena zëvendëson Alfred Elezin.

Kukësi do të drejtohet nga Gentian Berberi, me detyra si zv/drejtor në Vlorë e Lezhë, duke zëvendësuar Artan Bajraktarin.

Vendi i lënë bosh nga Dhimitraq Ziu në Dibër plotësohet nga Artion Duka, ndërsa Kastriot Skënderin në Berat e zëvendëson Luigj Vathi nga eksperienca e gjatë e menaxhimit të protestave si zv/drejtor i Tiranës në vitet e fundit.

Nga drejtues i AMP-së së Tiranës deri para pak vitesh, Elidon Çela do të menaxhoj qarkun aspak të lehtë të Vlorës, duke zënë vendin e Ermal Muçajt, ndërsa Gjovalin Loka i dorëzon detyrën Erion Ahmetit në Korçë, pas vitesh në Policinë Rrugore. Ish-zv/drejtori i Tiranës, i cili së fundmi ka drejtuar Kufirin dhe Migracionin në Durrës, Altin Merizaj zëvendëson Ardian Çipën në Gjirokastër, i cili zgjodhi të tërhiqej nga gara për drejtor qarqesh.

Drejtorët e policive në qarqe: Kush ikën e kush vjen

Qarku Tiranë 
Ikën Tonin Vocaj  –       Vjen Elton Alushi

Qarku Shkodër
Ikën Edmond Sulaj –       Vjen Fatmir Lleshaj

Qarku Elbasan
Ikën Ilir Proda        –        Vjen Fatmir Hoxha

Qarku Vlorë 
Ikën Ermal Muçaj    –       Vjen Elidon Çela

Qarku Durrës
Ikën Skënder Hita    –       Vjen Vilson Bala

Qarku Korçë 
Ikën Gjovalin Loka     –     Vjen Erion Ahmeti 

Qarku Gjirokastër
Ikën Ardian Çipa         –    Vjen Altin Merizaj 

Qarku Berat
Ikën Kastriot Skënderi –     Vjen Luigj Vathi

Qarku Kukës 
Ikën Artan Bajraktari     –    Vjen Gentian Berberi 

Qarku Dibër 
Ikën Dhimitraq Ziu       –      Vjen Artion Duka 

Qarku Lezhe
Ikën Alfred Elezi           –      Vjen Altin Mena

Qarku Fier
Ikën Lorenc Panganika  –     Vjen Skënder Hita