Publikuar më 08.08.2024 nga shekulli_admin

Një ngjarje e rëndë ndodhi mëngjesin e kësaj të enjte në Tiranë, ku një i moshuar qëlloi për vdekje me bastun shoku ne tij të dhomës në azil.

Mësohet se autori i kësaj ngjarje është Zyhdi Shehi, 78 vjeç, i cili pas një konflikti për motive të dobëta qëlloi me bastunin prej hekuri disa herë shokun e tij, Virxhil Vesho, 82 vjeç. Fatkeqësisht si pasojë e plagëve të marra ky i fundit gjeti vdekjen e menjëhershme, ndërkohë policia e Tiranës bëri të mundur arrestimin e 78-vjeçarit.

Burime për mediat bëjnë me dije se të dy të moshuarit vuanin nga skleroza dhe zanafilla e debatit të tyre është bërë “krevati”.

Rreth orës 04:00 të mëngjesit të sotëm dy të moshuarit u konfliktuan me njëri-tjetrin për krevatin. Mësohet se autori i ngjarjes, Zyhdi Shehi, i ka thënë shokun të tij të dhomës “pse më ke zënë krevatin”.

Menjëherë pas kësaj fraze dyshohet se ai e ka qëlluar disa herë me bastun në disa pjesë të trupit dhe në kokë, duke e lënë 82-vjeçarin të vdekur në vend.

Menjëherë punonjësit e stafit të azilit njoftuan ambulancën, por fatkeqësisht i moshuari kishte ndërruar jetë dhe bluzat e bardha nuk mundën të bëjnë asgjë për ta shpëtuar.  Në vendin e ngjarjes shkuan dhe efektivët e Policisë të cilët bënë të mundur arrestimin e 78-vjeçarit.

Dy të moshuarit vuanin nga skleroza. Ndërkohë, mësohet se autori i kësaj ngjarje të rëndë rezulton të jetë një figurë e njohur.

Zyhdi Shehi, i lindur më 11 dhjetor 1946, në fshatin Bago të Kavajës, është një historian dhe shkrimtar i njohur për botime historike e letrare.

Vitin e kaluar ai u shpall edhe “Qytetar Nderi” i Kavajës, ku iu dorëzua titulli nga autoritetet lokale bashkiake. Në disa video të publikuara në rrjet nga kjo ceremoni shihet qartë që gjendja shëndetësore e Shehit nuk është e mirë.Ai është diplomuar në Institutin Pedagogjik të Shkodrës për “Gjuhë-Letërsi” e më pas ka mbaruar me korrispodencë Fakultetin Filologjik të Tiranës për “Gjuhë-Letërsi”.

Pas një periudhe pune si mësues, në vitin 1982 nisi punë në Muzeun Historik të Kavajës. Në vitin 1996, pas botimeve të artikujve të shumtë në fushën e historisë dhe etnografisë së zonës, del me librin e parë, monografinë kushtuar patriotit kavajas, Ahmet Bejtaga.

Më pas, në vitin 2000, monografinë Andrea Ekonomi, “Mësues i Popullit”, “Kavaja, figura të shquara historike” 2005, “Indrit Cara”, 2007, “Inxhinjeri Jani (Xhuf) Koljaka, e Diplomati Stavro Stavri”, etj. Për merita në punë i është dektretuar në vitin 1990 edhe medalja “Naim Frashëri”.

Postimi i bere per Zyhdi Shehin nga Kavajaonline.com

E teksa kanë kaluar disa orë nga ngjarja e rëndë, është zbardhur dhe dëshmia e të moshuarit që i shkaktoi vdekjen shokut të dhomës.

Ai para uniformave blu është shprehur se Virxhil Vesho e bullizonte dhe i zinte rrugën, dhe se këto janë bërë dhe shkak i debateve mes autorit dhe viktimës.

“Më bullizonte, më zinte rrugën”, mësohet të ketë thënë ai.