Publikuar më 20.05.2024 nga shekulli_admin

Në tarracën e bashkisë së Tiranë, kurorëzuan dashurinë në një ceremoni fetare, çifti i së njëjtës gjini, Edlira Mara dhe Alba Ahmetaj. Dy pastorë nga Britania kishin udhëtuar për të zhvilluar këtë ceremoni, mes dy aktivisteve të komunitetit LGBT+. Të pranishme në dasmën e tyre, e para e këtij lloji në vendin tonë, ishin edhe vajzat e tyre 3-vjeçare. 

Kjo ceremoni shënon edhe nisjen e betejës së tyre ligjore për të ndryshuar Kodin e Familjes, i cili nuk lejon martesat mes personave të së njëjtës gjini. 

“Fakti se martesa jonë nuk njihet ende ligjërisht nuk na pengon të nisim këtë rrugëtim të rëndësishëm. Kërkesa jonë për shpallje martese simbolizon hallkën e parë të një beteje të gjatë dhe të vështirë, por mbi të gjitha të drejtë. Ne jemi të vendosura të ndjekim rrugën ligjore dhe të respektojmë procedurat dhe institucionet e vendit tonë, duke sfiduar përmbajtjen diskriminuese të Kodit të Familjes, për të kërkuar njohjen e të drejtës sonë për martesë, në mënyrë të barabartë me çdo çift tjetër në Shqipëri”, thuhej në një njoftim të çiftit. 

Deputetja e Partisë Demokratike Ilda Dhori tha përmes një lidhje “Skype” se me martesën e dy vajzave lezbike në tarracën e Bashkisë Tiranë është shkelur ligji në vendin tonë.

Sa kohë që ende nuk  e kemi një ligj të tillë do të thotë që janë shkelur ligjet. Sa i takon zgjedhjet personale, unë hyj tek ajo kategori që e respektoj, i takon shtetit të marrë masa ose jo, duke marrë parasysh dhe traditën nëse do të jemi apo jo pjesë e atyre shteteve që e pranojnë një lidhje të tillë. Ne nuk i kemi pranuar me ligj martesa të tilla, është shkelur ligji sa kohë që nuk ekzistojnë të ligjëruara të tilla bashkime.

Kisha Ortodokse Autoqefale ka reaguar për në lidhje me ceremoninë martesore simbolike të dy vajzave në tarracën e bashkisë së Tiranës.

‘Në lidhje me martesën e së njëjtës gjini, kryer në Bashkinë e Tiranës, ditën e djeshme, dt. 19 maj 2024, siç jemi shprehur edhe më parë, si në deklaratën e janarit 2024, Kisha Orthodhokse Autoqefale e Shqipërisë mban të njëjtin qëndrim:

Është më se e njohur se përjetësimi i njerëzimit ka qenë i bazuar në ekzistencën e dy gjinive dhe bashkimin e tyre.

Asnjë kulturë, fe apo sistem ligjesh (Soloni, Platoni etj.) nuk e ka institucionalizuar bashkëjetesën homoseksuale si martesë.

E panatyrshmja nuk bëhet e natyrshme me dekrete ligjore. Përkundrazi, një ligj i tillë fyen krijimin.

Nuk është përparim shoqëror, por një konflikt me rendin natyror, e tatëpjetë.

Kisha është e detyruar të artikulojë qartë konceptin dhe vlerën e martesës, rëndësinë e familjes dhe të lindjes së fëmijëve në përputhje me tekstet e saj të shenjta dhe traditën e saj shekullore (siç u deklarua në Sinodin e Shenjtë dhe të Madh të Kishës Orthodhokse në Kretë në vitin 2016) .’- thuhet në reagimin e kishës Ortodokse.