Publikuar më 31.10.2023 nga shekulli_admin

Lionel Messi është fitues i “Topit të Artë” për vitin 2023. Sulmuesi argjentinas bën për vete trofeun më të rëndësishëm individual për herë të tetë.

Messi ia doli t’i mposhtë të gjithë, duke lënë mbrapa Erling Haaland apo edhe Kylian Mbappe. Kujtojmë që “pleshti” ndihmoi jashtëzakonisht shumë Argjentinën për të fituar Botërorin e Katarit, falë paraqitjeve fantastike të tij.

Në total,  Lionel Messi ka fituar 98 trofe gjatë gjithë karrierës së tij. Si lojtar i Barcelonës, ai mori 35 trofe gjatë ecurisë së tij 17-vjeçare me ekipin e parë. Ai gjithashtu ka fituar mbi 50 trofe individual.

Sa i takon çmimeve të tjera të fituara mbrëmjen e sotme, lojtari i ri më i mirë u shpall Bellingham, portieri më i mirë u vlerësua argjentinasi Emiliano Martinez, ndërsa çmimi i bamirësisë iu dha Vinicius-it.

Golashënuesi më i mirë? Erling Haaland. Sulmuesi i Manchester Cityt realizoi jo por 56 gola. Pas fitimit të Champions League, skuadra më e mirë është parë e arsyeshme të vlerësohet Manchester City.

Çmimet:

“Topi i Artë” për femra: Aitana Bonati

“Topi i Artë” për meshkuj: Messi

Çmimi Sokrates (i bamirësisë): Vinicius

Çmimi Gerd Muller (Golashënuesi): Haaland

Portieri më i mirë: Emiliano Martinez (Aston Villa)

Trofeu për të riun më të mirë të sezonit: Jude Bellingham (Real Madrid)

Skuadra më e mirë: Manchester City

Messi falenderon gruan

Thuajse si të ishte normale, Lionel Messi mori Topin e tetë të Artë të karrierës së tij në Paris nga duart e David Beckham, pronarit të Inter Miami, skuadra ku luan argjentinasi, në MLS. Nga skena futbollisti falënderoi bashkëlojtarët dhe familjen e tij që e ndihmuan në këtë sipërmarrje të cilën e arriti falë fitores së Kupës së Botës me Argjentinën. Në mënyrë të veçantë falënderoi gruan e tij.

“E vetmja gjë që më mungonte ishte të bëhesha kampion bote, ishte e veçantë sepse shumë njerëz të kombësive të ndryshme bënin tifo për Argjentinën. Faleminderit gruas sime, e cila ka qenë gjithmonë aty edhe në kohë të vështira. Dhe pastaj falënderoj Maradonën, nuk ka vend më të mirë për t’i uruar ditëlindjen”, – shpreh Messi.

Me të në ceremoni ishte bashkëshortja e tij Antonela Roccuzzo dhe tre fëmijët e tyre që fillimisht kaluan në tapetin e kuq dhe më pas u ngjitën në skenë me të. Antonela dhe Messi njihen që fëmijë. Por ata do të martoheshin vetëm në vitin 2017, duke kurorëzuar një lidhje që zgjaste prej vitesh. Mes tyre nuk ka pasur asnjë krizë, ose edhe nëse ka patur diçka, kurrë nuk është bërë publike.

Mateus del kundër

Pavarësisht fitores së Kupës së Botës, jo të gjithë ranë dakord me dhënien e çmimit për Lionel Messin. Ndër më kritikët ishte Lothar Matthäus, sipas të cilit Erling Haaland, i freskët nga tripleta me Manchester City, duhej të ishte shpërblyer.

“Gjatë gjithë vitit, Haaland ka bërë më mirë se Messi, – tha legjenda gjermane e futbollit për “Sky Deutschland”. – Ky trofe ishte i pamerituar për Messin. Kjo është dëshmi se Kupa e Botës ka më shumë rëndësi se çdo gjë tjetër.

Për mua, askush nuk ka bërë më mirë se Haaland, ai ka qenë më i miri në 12 muajt e fundit. Haaland fitoi tituj të rëndësishëm me Manchester City dhe vendosi rekordin e golave. Vota është një farsë, edhe nëse kam kam qenë gjithmonë tifoz i Messit”.