Publikuar më 16.06.2025 nga shekulli_admin

Luftimet ajrore mes Izraelit dhe Iranit kanë hyrë në ditën e katërt, ndërsa orët e fundit intensiteti është rritur dhe për pasojë edhe dëmet në njerëz e ato materiale.

Hossein Kermanpour, një zëdhënës i Ministrisë së Shëndetësisë në Teheran ka deklaruar se numri i përgjithshëm i të vdekurve dhe të plagosurve kishte arritur në 1,481.

“Një total prej 1,481 individësh janë vrarë ose plagosur në sulmet izraelite gjatë 65 orëve të fundit. Nga këta, 1,277 persona janë shtruar në spital në qendrat mjekësore të lidhura me universitetet e vendit, me mbi 90% të viktimave që janë civilë. Deri më tani, 522 individë janë liruar nga spitali, ndërsa 224 burra, gra dhe fëmijë kanë humbur jetën si pasojë e sulmeve”,  deklaroi Kermanpour.

Ministria e Shëndetësisë iraniane thotë se kostoja njerëzore e këtyre sulmeve bie ndesh qartë me pretendimet për “shënjestër të saktë” dhe nënvizon natyrën pa dallim të agresionit izraelit.

Ndërkohë, numri i të vdekurve nga sulmet e Iranit gjatë natës kundër Izraelit ka arritur në 24, njoftoi radiostacioni i ushtrisë izraelite. 8 izraelitë të vrarë u regjistruan orët e fundit nga raketat balistike.

Ndërsa 92 persona u plagosën, përfshirë një grua që është në gjendje të rëndë, sipas raportit të fundit për sulmet iraniane të natës së kaluar.

Një zëdhënës i ushtrisë izraelite deklaroi sot se Izraeli ka “arritur kontroll të plotë ajror mbi Teheranin”.

“Ne kemi shkatërruar një të tretën e lancuesve të raketave tokë-tokë të regjimit iranian”, tha ndër të tjera gjeneral brigade Effie Defrin në një konferencë për mediat.

Ndërkohë që presidenti iranian Masoud Pezeshkian i bëri thirrje popullit iranian të qendrojnë të bashkuar, ndërsa valët e raketave izraelite vazhdojnë të shkaktojnë dëme të mëdha në të gjithë vendin, përfshirë qytetin e Kermanshah, ku u godit një spital.

Ministri izraelit i Mbrojtjes, Izrael Katz, tha se banorët e Teheranit do të “paguajnë me çmim të shtrenjtë” për sulmet hakmarrëse të Iranit ndaj Izraelit.

Numri i të vdekurve nga sulmet e Iranit gjatë natës ndaj Izraelit u rrit në tetë, me dhjetëra të tjerë të transferuar në spital për trajtim për lëndime të lehta, sipas mjekëve.

Një raketë iraniane goditi pranë një ndërtese të Ambasadës Amerikane në Tel Aviv, duke shkaktuar dëme të vogla, sipas të dërguarit të Uashingtonit.

Ndërsa një zëdhënës i Ministrisë së Jashtme tha se parlamenti i Iranit po punon për legjislacionin për ta tërhequr Teheranin nga Traktati për Mospërhapjen e Armëve Bërthamore (NPT).

Udhëheqësi Suprem i Iranit, Ajatollah Ali Khamenei, u zhvendos në një bunker nëntokësor në zonën Lavizan, në verilindje të Teheranit, disa orë pasi Izraeli nisi sulmet e tij ndaj kryeqytetit iranian në orët e para të së premtes së kaluar, raportoi Iran International , duke cituar dy burime të informuara mirë brenda vendit.

Të gjithë anëtarët e familjes së Khameneit, përfshirë djalin e tij Mojtaba, janë me të, thanë burimet.

Sipas medias, kjo është e njëjta strehë ku udhëheqësi fetar dhe familja e tij u morën gjatë operacioneve të Iranit kundër Izraelit, “Premtimi i Vërtetë 1” dhe “Premtimi i Vërtetë 2” në vitin 2024. Në atë kohë, Mojtaba ishte pranë tij, por dy djemtë e tij të tjerë, Massoud dhe Mostafa, nuk ishin me të.

Të dielën, Izraeli kreu sulmin e parë në qytetin iranian të Mashhadit, i cili është më shumë se 2,300 kilometra larg. Një burim diplomatik në Lindjen e Mesme i tha Iran International se sulmi ajror në Mashhad ishte një paralajmërim për udhëheqësin suprem të Iranit se ai nuk është i sigurt askund në vend.

I njëjti burim diplomatik shtoi se Izraeli mund ta kishte vrarë Khamenein që natën e parë të operacionit, por qeveria izraelite zgjodhi ta linte gjallë, duke i dhënë një shans të fundit për t’u tërhequr dhe për të njoftuar çmontimin e plotë të programit bërthamor të Iranit .

Donald Trump i kishte dhënë Khameneit një afat dy-mujor për të rënë dakord për çmontimin e programit të pasurimit të uraniumit, por udhëheqësi suprem injoroi paralajmërimet si amerikane ashtu edhe izraelite.

Me fillimin e sulmeve ajrore izraelite, kjo “mundësi” po ofrohet përsëri këtë herë, thonë burimet, për të vlerësuar realisht fuqinë ushtarake të Izraelit dhe për të urdhëruar çmontimin e programit të pasurimit të uraniumit.