Publikuar më 22.05.2025 nga shekulli_admin

Artan Lame ka ndërruar jetë në moshën 58-vjeçare në Gjermani, pas një ndëhyrje të vështirë në zemër. Ai humbi jetën pas daljes nga gjendja e komës.

Lame ka qenë drejtues i lart i shtetit shqiptar si zëvendësministër apo drejtor i Agjencisë së Kadastrës dhe Legalizimeve.

Kryeministri Edi Rama ka shprehur ngushëllimet për ndarjen e befasishme nga jeta të ish-kreut të kadastrës, Artan Lame, pas një operacioni në zemër.

“Lajm i pabesueshëm, por fatkeqësisht i vërtetë”, ka shkruar kreu i qeverisë, ndërsa i ka shprehur ngushëllimet bashkëshortes së Lames, Mirelës, djalit të tyre dhe familjes.

“I pabesueshëm, po fatkeqësisht i vërtetë lajmi i befasishëm i ndarjes nga jeta të Artan Lames. Jam pa fjalë. Ngushëllime Mirelës, djalit të tyre dhe familjes e shokëve të përbashkët💔”, shkruan Rama.

Mësohet se Artan Lame, 58 vjeç, humbi jetën pas një ndëhyrje kirurgjikale të vështirë në zemër, pas daljes nga gjendja e komës.

Gjatë karrierës së tij, Artan Lame ka mbajtur pozita të rëndësishme, përfshirë ato si zëvendësministër dhe drejtor i Agjencisë së Kadastrës dhe Legalizimeve.

Lame ka qenë gjithashtu një publicist, opinionist, studiues i historisë shqiptare dhe një veprimtar i angazhuar për mbrojtjen e trashëgimisë kulturore të vendit.

I lindur në Tiranë në vitin 1967 dhe me origjinë nga fshati Qytezë i Kolonjës, Artan Lame ka lënë gjurmë të thella si pjesë e shoqërisë civile dhe si funksionar publik, duke kontribuar në zhvillimin dhe ruajtjen e pasurive kulturore të Shqipërisë.

Artan Lame ka lindur në Tiranë në vitin 1967. I martuar dhe me dy fëmijë, ai është një figurë e njohur në fushat e administratës shtetërore, trashëgimisë kulturore dhe shoqërisë civile.

Lame ka përfunduar Fakultetin e Gjeologjisë dhe Minierave, dega Inxhinieri Markshajderi. Ai ka shërbyer si publicist, opinionist dhe koleksionist, duke kontribuar në studimin e historisë shqiptare dhe mbrojtjen e trashëgimisë kulturore. Në vitin 2000, ai u emërua Drejtor i Trashëgimisë Kulturore në Ministrinë e Kulturës. Nga 2000 deri në 2002, ka mbajtur postin e Nënkryetarit të Bashkisë së Tiranës, dhe nga 2002 deri në 2005 ka qenë Zëvendësministër i Territorit dhe Turizmit. Në vitin 2013, ai u emërua Drejtor i Përgjithshëm i ALUIZNI-t, pozicion që mbajti deri në vitin 2023.

Aktiviteti Politik dhe Shoqëror

Lame ka qenë anëtar i Partisë Socialiste dhe ka kandiduar për deputet në zgjedhjet parlamentare të vitit 2005, 2009 dhe 2013. Nga 2011 deri në 2013, ai ka qenë anëtar i grupit të punës për hartimin e Programit të PS-së. Në fushën e shoqërisë civile, ai ka shërbyer si Nënkryetar i Federatës së Koleksionistëve Shqiptarë dhe ka përfaqësuar Shqipërinë në organizata ndërkombëtare si “World Collectors Club” në Gjenovë dhe “Instituto degli Studi Araldici” në Milano. Gjithashtu, ai ka qenë Komisar për Shqipërinë në Panairin “IBRA ‘99” në Nuremberg.

Botimet dhe Kontributi Akademik

Lame ka kontribuar në botime të ndryshme, duke përfshirë rubrikat e përjavshme “Shqipni e harrume” në revistën “JAVA” (2005-2013) dhe “Shqipni tavolinash” në gazetën “SHQIP” (2006-2013). Ai ka bashkëautor në librin “TIRANA në kartolina deri më 1944” (2000) dhe ka botuar dy vëllime të titulluar “Medaljet shqiptare (1914-1944)” dhe “Medaljet shqiptare (1945-2002)” (2010). Gjithashtu, ai ka kontribuar në librin “TIRANA, Planin, Building, Living” (2011) dhe ka bashkëautor në librin “Piramida e Tiranës” (2011).

Dekorimet dhe Nderimet

Në vitin 2010, Lame u nderua me çmimin “Book of the Year” nga MIC London për librin “Medaljet shqiptare 1914-2002”. Në vitin 2012, ai u dekorua nga Presidenti i Republikës me “Medaljen e Mirënjohjes” për aktivitetet e tij në 100-vjetorin e Pavarësisë së Shqipërisë.

Artan Lame ka lënë një gjurmë të thellë në administratën shtetërore dhe në fushën e trashëgimisë kulturore, duke kontribuar në ruajtjen dhe promovimin e vlerave historike dhe kulturore të Shqipërisë.