Publikuar më 28.01.2025 nga shekulli_admin

“Administrata Trump është në negociata me qeverinë shqiptare për të pranuar në Shqipëri 100 mijë refugjatë nga Rripi i Gazës.” Ky ishte pretendimi që ngriti gazetari dhe analisti politik izraelit i medias “Channel 12”, Amit Segal.

“Stacioni i radhës – Shqipëria?

Administrata Trump është në bisedime me qeverinë në Tiranë për migrimin e deri në 100,000 banorëve të Gazës drejt vendit.

Burimet izraelite besojnë se Egjipti dhe Jordania do të refuzojnë të strehojnë refugjatë dhe pretendojnë se opsione si Shqipëria dhe Indonezia janë më të realizueshme”,- shkruan gazetari izraelit në rrjetin social “X”.

Ky pretendim është hedhur poshtë kategorikisht nga kryeministri Edi Rama, po ashtu përmes një postimi në rrjetin social “X”. Ai nënvizon se Tiranës zyrtare nuk i është kërkuar kjo gjë nga askush dhe se vendi nuk mund të marrë përsipër një përgjegjësi të tillë.

“Nuk kam dëgjuar diçka kaq të rreme për një kohë të gjatë—dhe ka pasur shumë lajme të rreme kohët e fundit! Kjo është plotësisht e pavërtetë.

Respekt dhe solidaritet të plotë për popullin e Gazës, i cili është dehumanizuar nga regjimi barbar i Hamasit dhe ka kaluar një luftë ferri pas horrorit mesjetar të 7 tetorit. Por le të jem i qartë: Shqipëria nuk është pyetur nga askush, dhe as mund të mendojmë për të marrë një përgjegjësi të tillë.

Ne jemi krenarë për miqësitë tona të forta me Izraelin, Emiratet e Bashkuara Arabe, Arabinë Saudite, Katarin, Kuvajtin dhe, natyrisht, me popullin palestinez, shtetin e të cilit Shqipëria e ka njohur që shumë kohë më parë.

Por Shqipëria nuk ndodhet në Lindjen e Mesme, dhe nga zemra e Europës, nuk mund të bëjmë më shumë se çdo shtet tjetër europian për këtë çështje. Megjithatë, dëshirojmë dhe lutemi që populli palestinez të ketë mundësinë të jetojë në shtetin e tij, si njerëz të lirë nën sundimin demokratik, dhe që Hamas-i të mos mund të dëmtojë më Izraelin—apo, mbi të gjitha, palestinezët vetë”,- shkruan Rama.

Boshatisje e Gazës? 

Donald Trump duket se ka hartuar një plan për Rripin që në thelb kërkon deportimin e të gjithë popullsisë palestineze në vendet e tjera të Lindjes së Mesme, duke përfshirë Jordaninë dhe Egjiptin. Ai shpjegoi se kjo masë mund të jetë “e përkohshme ose afatgjatë” për të afirmuar një paqe në zonë.

“Po flasim për 1.5 milionë njerëz dhe do të pastrojmë gjithçka”, – tha presidenti amerikan, duke e quajtur Gazën një “vend të shkatërruar”. Në mbrëmje ka ardhur edhe përgjigja nga Amani, me ministrin e Jashtëm jordanez, Ayman Safadi. “Refuzimi ynë i shpërnguljes së palestinezëve është i vendosur dhe nuk do të ndryshojë. Jordania është për jordanezët dhe Palestina është për palestinezët”– tha ai. Të njëjtin qëndrim mbajti edhe Egjipti, i cili hodhi poshtë propozimin e kreut të Shtëpisë së Bardhë.

Në krahun tjetër fjalët e Trump u duartrokitën menjëherë nga e djathta ekstreme izraelite, e cila që nga 7 tetori 2023 ka shtyrë vazhdimisht për një zgjidhje edhe më radikale duke folur për pushtimin e territoreve dhe duke shkuar deri aty sa të kërcënojë, ditët e fundit, me rrëzimin e qeverisë së Netanyahut kur të jetë finalizuar armëpushimi. Protagonist është ministri izraelit i Financave, Bezalel Smotrich. “Një ide e shkëlqyer” – ishte përkufizimi i tij për planin e shpallur nga Trump.

“Pas 76 vitesh gjatë të cilave shumica e popullsisë së Gazës është mbajtur me forcë në kushte të vështira për të ruajtur aspiratën e shkatërrimit të shtetit të Izraelit, ideja për t’i ndihmuar ata të gjejnë vende të tjera për të filluar një jetë të re dhe më të mirë është një ide e shkëlqyer”, – tha Smotrich, sipas “Times of Israel”.

Propozimi i presidentit amerikan nxiti menjëherë edhe reagimin e Xhihadit Islamik Palestinez, i cili luftoi kundër Izraelit në Gaza së bashku me Hamasin deri në armëpushimin e 19 janarit: “E mjerueshme. Ky propozim vjen në kuadrin e inkurajimit të krimeve të luftës dhe krimeve kundër njerëzimit duke i detyruar njerëzit tanë të largohen nga toka e tyre”.

Edhe Hamasi reagoi menjëherë. “Palestinezët do ta prishin idenë e Trump” u përgjigj zyrtari i lartë Bassem Naim. Anëtari i byrosë politike i tha AFP se grupi është kundër propozimit: “Ashtu siç ata kanë penguar çdo plan për zhvendosje në një atdhe alternativë gjatë dekadave, populli ynë do të prishë plane të tilla edhe këtë herë.”

Trump njoftoi gjithashtu se i kishte dhënë fund pezullimit të dërgimit të bombave 2000 paund në Izrael që ishte vendosur nga paraardhësi i tij, Joe Biden, si një formë presioni për të reduktuar viktimat civile gjatë luftës. “Shumë gjëra që ishin porositur dhe paguar nga Izraeli, por ishin penguar nga Biden, tani janë rrugës!” –shkroi ai në Truth pa cituar llojin e armëve. Megjithatë një zyrtar i administratës amerikane konfirmoi se ai po u referohej atyre bombave të rënda.