Publikuar më 13.12.2024 nga shekulli_admin

Në Zyrih u hodh shorti i kualifikueseve të Kupës së Botës 2026, aty ku Shqipëria  mësoi kundërshtarët. Kuqezinjtë e Sylvinhos do të sfidojnë Anglinë, Serbinë, Letoninë dhe Andorrën. Kombëtarja jonë “peshkoi” një përfaqësuese gjigande si ajo e “3 luanëve”, ku synimi mbetet marrja e një rezultati pozitiv. Ndaj anglezëve kemi regjistruar statistika negative, pasi i kemi humbur që të gjitha ndeshjet ndaj tyre (6 takime direkte me këtë rival).

Kundërshtarë të pranueshëm për skuadrën tonë, mund të cilësohen Letonia dhe Andorra, të paktën në letër. Vlen të theksojmë se rrugëtimi në grup për Shqipërinë do të nisë në mars dhe do të mbyllet në nëntor.

Kjo pasi kuqezinjtë janë në një grup me pesë skuadra. Në rast se do të ishin me katër, atëherë gjithçka do të fillonte prej shtatorit të vitit të ardhshëm.

Kujtojmë se nga 13 përfaqësuese, këtë herë do të jenë 16 nga Europa në Botëror.

Goglat e kualifikueseve të Botërorit, vendosën në të njëjtin grup Shqipërinë dhe Serbinë. Kuqezinjtë e Silvinjos do të përballen me serbët, pas plot 10 vitesh. Në gjithë historinë, Shqipëria dhe Serbia janë përballur vetëm 2 herë.

Dueli i famshëm i 14 tetorit 2014 të zhvilluar në Beograd, u la përgjysëm pas sjelljeve vandale të vendasve, teksa Shqipëria fitoi në tavolinë 0-3, ndërkohë në sfidën e 8 tetorit të vitit 2015, serbët fitonin në “Elbasan Arena” me rezultatin 0-2, falë golave të Ljajiç dhe Kolarov.  

“Tre Luanët” padyshim janë rivali më i fortë dhe një nga pretendentët për të triumfuar në fund të këtij kompeticioni. Edhe statistikat janë në disfavorin e Shqipërisë për shkak se në 6-të përballje, nuk ka fituar asnjëherë dhe nuk ka marrë asnjë barazime. Janë të gjitha humbje.

Trajneri Silvinjo ka folur pas shortit për kualifikueset e Botërorit 2026 ku Shqipëria do të përballet me Anglinë, Serbinë, Letoninë dhe Andorrën.

Grupi- “E prisja. Grup i fortë si gjithë të tjerët. Sa herë i shikon Holandën, Gjermaninë, Italinë, janë të forta. Ishim në vazon e tretë, prisnim diçka të fortë nga e para dhe e dyta. Është një kompeticion shumë i shpejtë. Për ne çdo garë do të jetë finale si gjithmonë. Kemi një ëndërr për të shkuar përpara. Dhe duhet të gabojmë sa më pak sepse ashtu ke mundësi për të shkuara përpara”.

Serbia- “E dimë, është historia pas saj, por jemi këtu për të luajtur futboll. Jemi profesionistë. Historia është pas dhe e rëndësishme. Jemi këtu për të luajtur”.

Pikët e plota ndaj Andorrës dhe Letonisë- “Hap pas hapi”.

Do dëshironit grup si H? “Nuk mund të zgjedhësh, futbolli luhet. Kemi bërë kualifikimet e Europianit si Çekia dhe Polonia dhe kemi dalë në vendin e parë. Mund të ndodhë gjithçka, duhet ta shikojmë ndeshje pas ndeshje. Kemi dy transferta të vështira. Është një finale për ne, nëse duam të shkojmë në Botëror duhet të provojmë çdo gjë. Duhet të sjellim energji, të bëjmë gjëra të mira. Avash avash në çdo garë.

Besimi- “Besoj”, u shpreh Silvinjo për “Klan News”.

Adrian Aliaj, ish-lojtar i Kombëtares që jeton në Kroaci, nuk është aspak i kënaqur me shortin pikërisht për sfidën me Serbinë. Në anën tjetër ka shprehur pakënaqësi dhe ndaj Silvinjos, për mënyrën si foli pas shortit ku konsideroi çdo ndeshje finale. Kjo sepse sipas Aliajt presioni kalon te lojtarët.

“Serbia nuk duhet të ishte në grupin tonë, për anën sportive dhe politike. Ju nuk i ndjeni shumë afër këto se jam pak më afër, ndeshja e tyre me Shqipërinë nuk është normale, është diçka jashtë futbollit.

Nuk ekziston paqe mes shqiptarisë dhe serbëve. Është ndeshje që do jetë shumë e tensionuar, me urrejtje, shumë e vështirë për t’u luajtur. Nga ana e futbollit dhe ato kanë kualitet të na rrahin dhe në Shqipëri dhe në Serbi.

Sa jemi ne në gjendje të përballojmë një grup të tillë. Mendoj se akoma nuk jemi aty që të përballojmë një grup të tillë.

Akoma nuk jemi aty që të përballojmë një grup të tillë. Me Serbinë nuk krahasohemi fare nga ana e lojtarëve. Janë shumë herë më të mirë se ne. Të tentosh kualifikim është absurde këtë moment.

Nuk më pëlqeu Silvinjo, që çdo ndeshje është finale. Pse të jetë presioni te lojtarët. Ti duhet të bësh detyrat e shtëpisë si trajner, nuk ka lidhje finale apo jo.

Nuk po fus futbollin, është urrejtja, serbët duan të na rrahin”, u shpreh Adrian Aliaj.

Sigurisht që një grup ku ndodhen Shqipëria dhe Serbia, për kualifikueset e Botërorit 2026, merr të gjithë vëmendjen në rajonin e Ballkanit. Mediat sportive në Serbi po raportojnë dhe frika ndihet.

“Alo” dhe “Kurir” raportojnë në artikujt kryesorë se një rrugëtim i vështirë i pret. Dhe sigurisht që nënvizojnë Shqipërinë dhe Anglinë. Grupi K përbëhet nga Shqipëria, Anglia, Andorra, Letonia dhe Serbia. Rrugëtimi fillon në mars dhe mbyllet në nëntor.

Në Botëror kualifikohet direkt vendi i parë, ndërsa i dyti shkon në fazën “play-off” për të luajtur aty mundësinë e fundit.

 “The Sun” ka pasqyruar situatën në grupin K për kualifikueset e Botërorit 2026.

Aty ndodhet Anglia, të cilës goglat i rezervuan përballë Shqipërinë, Letoninë, Andorrën dhe Serbinë.

Këto të fundit raportohen dhe si testi i vështirë duke i bërë kështu “dalje” kuqezinjve të Silvinjos. Kujtojmë se Shqipëria në të gjashtë përballjet me Anglinë njeh vetëm humbje.

Media britanike ka prekur rivalitetin mes Shqipërisë dhe Serbisë. Në pasqyrimin e saj tregon dhe për situatat e fundit që kanë ndodhur dhe pse të dyja përfaqësueset nuk kanë qenë duke u ndeshur bashkë.

“The Sun” ka krijuar një sondazh ku pyet ndjekësit e saj, për rivalin më të vështirë të grupit. Me 72.3% votuesit kanë zgjedhur Serbinë. Shqipëria ka 17% të votave, ndërsa Andorra 7.3% dhe Letonia 3.4%.