Publikuar më 04.12.2024 nga shekulli_admin

Gazetari Osman Stafa ka denoncuar një tjetër skandal me repartin e Onkologjisë në QSUNT, teksa këtë herë bëhet fjalë për shitjen kontrabandë të ilaçeve kimio. Sipas gazetarit Stafa, këto ilaçe mungojnë tek Onkologjiku dhe shiten kontrabandë nga farmacitë rreth QSUNT-së.

Në një postim në rrjetet sociale, ai shkruan se posedon edhe prova me biseda për këtë gjë, por nuk mund t’i publikojë pasi u rrezikohet jeta denoncuesve.

Ai ka publikuar dhe një foto ku shfaqen dy persona me lekë në duar. Stafa thotë se pacientët prej hallit detyrohen jo vetëm të blejnë kimion kontrabandë, por t’i japin lekë dhe mjekut.

Postimi i plotë: 

Ilaçet kimio shiten edhe përpara Onkologjikut!

Në informacionet e mia, të mbështetaura edhe në prova e fakte, faktohet se shumë farmaci rreth e rrotull QSUNT dhe jo vetëm, shesin kimio kontrabandë. (Nuk mund të publikoj biseda, për shkak se vihen në rrezik njerëz).

Gjatë këtyre 5 viteve të fundit, mungesat e kimiove kanë qënë të frikshme. Prej këtyre mungesave kanë përfituar kontrabanda.

Sipas të dhënave që kam mbledhur, sekserët e ilaçeve kimio hynin edhe në spital, për t’u kërkuar mjekëve t’u çonin pacientë që t’u blenin medikamentet.

Pacientët prej hallit, dhe prej asaj që po përballeshin shkonin dhe i blinin, duke mos paguar vetëm vlerën e kimios kontrabandë, por edhe duke paguar një çmim për mjekun.

Si funksionon kjo?

Prsh heceptina kontrabandë është blerë 800 euro. Por nëse pacienti nuk shkonte i referuar nga mjeku dhe kontrabandisti bindej, herceptinën e merrte 200 euro më pak. (Këto dëshmi do i publikoj me zë dhe figurë kur të vij koha).

Më poshtë do publikoj rastin e një personi i cili ka blerë para derës së Onkologjikut, kimion. Kostoja e goserelinës? 262 mijë lekë.
Është skandal dhe e papranueshme kjo situatë. (Kjo ka ndodhur përpara disa javësh).

Gjithashtu është e papranueshme kjo situatë, pasi mjekët dhe Shefja e Onkologjikut, Silvana Çeliku, kanë qënë në dijeni të këtij fenomeni dhe nuk e kanë ngritur si shqetësim. Por e kanë pranuar.

Pse e kanë pranuar?

Pse nuk kanë folur, kur nuk mund të trajtonin pacientët me kancer?

Si mjekë të caktuar bëheshin bashkëpunëtor të kontrabandës?

Mos ndoshta ka ndonjë arsye tjetër sesi mjekët e Onkologjikut, “binden” të mosflasin?

Gazetari Osman Stafa ka bërë publik një tjetër skandal ku është e përfshirë Ministria e Shëndetësisë!

Gazetari tregon se si Ministria e Shëndetësisë është përfshirë në tendera, të cilët nuk kanë për qëllim sigurimin e kimiove që mungojnë, por fshehjen e mungesave të ilaçeve në Onkologjik. Bëhet fjalë për phesgo(kimio) që përdoret për kancerin e gjirit.

“Protokolli i këtij medikamenti e kërkon që një paciente me kancer gjiri të nisë trajtimin me phesgo 1200/600 (seanca e parë) dhe më pas phesgo 600/600.

Çfarë kanë bërë këta?

Në prill të 2024 Farmacia Qëndrore në QSUNT, lidh një kontratë 6 mujore, për të marrë vetëm 5 phesgo (flakon) 1200/600. Kontrata do mbaronte në tetor 2024. Pra i bie që për 6 muaj, në terapi (phesgo) të jenë futur vetëm 5 gra me kancer gjiri. Si i kanë përzgjedhur mjekët se kush pacient do të futet në këtë trajtim?

Muaji tetor, muaji rozë, e ka gjetur Farmacinë Qëndrore pa këtë medikament shumë të rëndësishëm për trajtimin e kancerit të gjirit.

Çfarë kanë bërë që mos të publikohej kjo mungesë?

Farmacia Qëndrore bën një tjetër kontratë në shtator të këtij viti, ku siguron vetëm 3 phesgo. Pra kontratë për të blerë 3 phesgo 1200/600. Dhe e dini se çfarë ndodhi me to?

Nuk ia dhanë grave që kishin nevojë, por i lanë në depo, për të treguar se gjendje ka dhe nuk ka asnjë mungesë.

Kjo është kriminale. Nëse këta mendojnë se duke mbajtur në gjendje (depo) ilaçe kimio, që si kanë, do të shpëtojnë, e kanë shumë gabim. Si mundet të bësh një kontratë për vetëm 3 flakonë dhe këta i mban në depo pa i lëvizur? Cili është qëllimi?

Madje mjekët onkologë i erdhën në ndihmë këtij skenari. Si? Nuk fusnin më pacientë të rinj në trajtim me phesgo.”- tregon gazetari

I revoltuar, gazetari shprehet se mjekët onkologë nuk duhet të bëhen pjesë e këtyre lojrave, që pacientëve u kushton jetën.

gazetari u bën thirrje mjekëve të mos zbatojnë urdhërat e shefave, për të mos shënuar në receta mjekimet e duhura, dhe sipas protokollove, sepse do të përfshihen në vepra penale.

“Pacientët nuk mund të trajtohen me çfarë ka Farmacia Qëndrore. Pacientët duhet të trajtohen sipas protokollit dhe pikë.”– thotë gazetari.