Publikuar më 28.10.2024 nga shekulli_admin

Anija me mbetje të dyshuara toksike mbërriti sot në radën e Durrësit, ndërkohë që nuk ka ende një njoftim zyrtar kur dhe ku do të ankorohet në porti.

Mëngjesin e sotëm anija ka hedhur spirancën e ankorimit në radën e jashtme të portit, rreth 1.5 milje distancë nga porti.

Kujtojmë se Prokuroria e Durrësit ka nisur hetimet për veprën penale “Kontrabandë me mallra të ndaluara ose të kufizuara” mbi ngarkesën me mbetje të nisur nga porti i Durrësit.

Anija me mbetje toksike u nis në muajin korrik nga Shqipëria drejt Tajlandës, por ky shtet e refuzoi pas alarmit të dhënë nga organizatat joqeveritare amerikane.

Dogana deklaroi se rasti nuk është eksport nga Shqipëria, por një tranzit ndërkombëtar i produktit koncentrat zinku ndërmjet një firme nga Kosova dhe një firme zvicerane.Prokuroria e Durrësit ka sekuestruar 102 kontejnerët në anijen “Molive” që dyshohet se mbajnë mbetje toksike. Anija, e cila kishte destinacion Tajlandën, mbërrit në Portin e Durrësit mëngjesin e sotëm dhe u ankorua në radë.

“Bashkëlidhur me këtë shkresë, po ju dërgojmë për ekzekutim Vendimin e Prokurorit datë 26.10.2024 për sekuestrimin e konteniereve në lidhje me proçedimin penal nr. 1596/2024.

Të gjithë subjeketet e ngarkuara me zbatimin e këtij vendimi të nënshkruajnë në procesverbalin e sekuestrimit, në të cilin të përshkruhen në mënyrë të detajuar të gjitha veprimet që do kryhen në ekzekutim të vendimit dhe përshkrimi i saktë i sendeve. Të merren masa që sendet e sekuestruara të depozitohen në një vënd të sigurtë si përsa i përket sigurisë mjedisore dhe asaj fizike, nëpërmjet monitorimit të kamerave 24 orë.

Sendet e sekuestrua të mbahen në gjendjen që janë pa u proceduar me hapjen e tyre. Praktika e mbajtur për ekzekutimin të dërgohet menjëherë në Prokurorinë pranë Gjykatës së Shkallës së Parë të Juridiksionit të Përgjithshëm Durrës”- thotë prokuroria.

Jim Puckett, drejtori ekzekutiv i Rrjetit të Aksionit të Bazelit, nga Durrësi ka dalë në një prononcim për mediat lidhur me anijen me 102 kontejnerë me mbetje toksike.

Ai deklaroi se anija po mbahet 1 km larg bregut dhe pritet që pasditen e sotme të ankorohet në port.

Puckett deklaroi se anija po mbahet 1 km larg bregut dhe pritet që pasditen e sotme të ankorohet në port, ndërsa bëri thirrje që hapja e kontejnerëve duhet të bëhet nën mbikëqyrje të rreptë dhe në sy të publikut.

Ai u shpreh se është 90% i sigurt se mbetjet janë toksike dhe se e ka origjinën nga kompania e çelikut e vendosur në Elbasan, Kurum.

“Jemi këtu me rastin  arritjes së anijes me mbetej toksike me 102 kontejnerë. Presim që anija Moliva të arrijë prapa krahëve tonë dhe të ankorohet pasdite. Do të vinte sot në mëngjes në orën 8, por është kërkuar nga autoritetet të mbahet një km larg bregut. Kemi informacion që kemi kërkuar që kapiteni të vijë dhe të qëndrojë në pritje.

Besoj se kjo shtyrje është për shkak se ju jeni të gjithë këtu. Besojmë se pasdite do të ankorohet, por nuk jemi të sigurt  se çfarë do të ndodhë më pas.

Jemi në dijeni se ka një procedim penal nga Prokuroria për këtë çështje dhe shpresojmë që prokurorët të jenë këtu kur të vijë anija.

Shpresojmë që hapja e kontejnerëve të bëhet nën mbikëqyrje të rreptë dhe në transparencë me publikun.

Ka patur shumë polemika për këtë dërgesë. Disa thonë që nuk ka mbetje toksike, por jemi 90% të sigurt se ka mbetje toksike. Presim një analizë të plotë nga organet kompetente.

Jam 100% i sigurt se kjo ngarkesë nuk duhej të transportohej në Tajlandë. Kemi shkuar te fabrika në Tajlandë dhe e kemi parë atje. Kemi bërë ekzaminimet tonë dhe kemi gjetur mbetje toksike të rrezikshme, arsenik dhe plumb.

Besojmë se e ka origjinën nga kompania e çelikut e vendosur në Elbasan prandaj janë bërë gjithë vëzhgimet  e nevojshme”, tha Puckett .