Publikuar më 14.07.2024 nga shekulli_admin

Ish-presidenti i Shteteve të Bashkuara, Donald Trump është qëlluar me armë gjatë një mitingu në Pensilvani, ku mbeti i plagosur në veshin e djathtë.

Pas ngjarjes, Shërbimi Sekret tha se ekzekutoi autorin e dyshuar, 20-vjeçarin e identifikuar më parë si Thomas Matthew Crooks.

Ndërkohë mediat amerikane dhe në rrjetet sociale është publikuar një video e autorit, i cili shfaqet në rrjetet sociale duke shprehur urrejtjen ndaj Trump dhe republikanëve.

“Unë jam Thomas Mathew Crooks! I urrej republikanët e urrej Trump dhe gjejeni çfarë ju po ngatërroheni me djalin e gabuar!’- thotë ai. VIDEO

Ish-presidenti Donald Trump ishte rreth 120 deri në 150 metra nga atentatori i dyshuar në kohën e të shtënave në mitingun e tij në Butler, Pensilvani. CNN ka analizuar pozicionet e vendosjes së autorit dhe kandidatit për president.

Trump po mbante mitingun në Butler Farm Show Grounds të shtunën pasdite. Mësohet se ai qëlloi tetë herë dhe një nga plumbat e kapi ish-presidentin Trump në veshin e djathtë.

Personi i armatosur qëlloi nga një “pozicion i ngritur” jashtë tubimit, bëri të ditur Shërbimi Sekret. Burime të zbatimit të ligjit thanë për CNN se vrasësi ishte në një çati të një ndërtese jashtë vendit të tubimit.

Në pamje duket Thomas Matthew Crooks, 20 vjeç, nga Bethel Park, Pensilvani, pasi ishte ekzekutuar nga njësia e snajperistëve që duken në pamje, edhe ata të hipur në pjesën e sipërme të një banese.

Trump u plagos nga të shtënat por ndodhet jashtë rrezikut për jetën. Sulmi ndaj tij, tha FBI, ishte një atentat. Krahas atentatorit, u raportua i vdekur edhe një nga pjesëmarrësit në tubimin e kandidatit republikan.

A nuk kishte mjaftueshëm oficerë të sigurisë për të mbrojtur Donald Trump në tubim?

Një anëtar republikan i Dhomës së Përfaqësuesve pretendon se Sekretari i Sigurisë Kombëtare, Alejandro Mayorkas në mënyrë të përsëritur refuzoi rritjen e mbrojtjes së Shërbimit Sekret për ish-Presidentin Trump.

Republikani Mike Waltz nga Florida e bëri këtë akuzë disa orë pasi Trump u godit nga një plumb në tubimin e tij në Pensilvani të shtunën.

“Kam burime shumë të besueshme që më thonë se ka pasur thirrje të përsëritura për rritjen e mbrojtjes për Presidentin Trump. “Sekretari i Sigurisë refuzoi,” shkroi Waltz në X.

Partia e tij Republikane donte të largonte Sekretarin Demokratik të Sigurisë Kombëtare, Alejandro Mayorkas nga detyra në shkurt, por kishte mungesë mbështetjeje në Dhomën e Përfaqësuesve në atë kohë – madje edhe brenda radhëve të saj.

Ish-presidenti dhe kandidati Donald Trump ka të drejtën e mbrojtjes nga Shërbimi Sekret, tha për NTV ish-këshilltari i fushatës së Obamës, Julius van de Laar: “Në të gjitha këto ngjarje është si në aeroport. Askush nuk hyn këtu (…) pa kaluar përmes një aparati me rreze X.”

Incidenti përfaqëson krizën më të madhe të sigurisë për Shërbimin Sekret në dekada. Republikani James Comer shprehet “ka shumë pyetje dhe amerikanët kërkojnë përgjigje”

“Ishim disa centimetra larg nga humbja e ish-presidentit Trump në një atentat”, tha ish-agjenti i Shërbimit Sekret Jonathan Wackrow në CNN.

“Kjo nuk duhet të ndodhë më kurrë”, theksoi ai. Shërbimi Sekret duhet të kuptojë se çfarë shkoi keq dhe se si sulmuesi ishte në gjendje të realizonte një goditje të qartë ndaj ish-presidentit.

Nënkolonel George Bivens i Policisë së Shtetit të Pensilvanisë u shpreh se “është tepër e vështirë që në një vend të hapur për publikun, ta mbrosh atë nga çdo kërcënim i mundshëm, nga një sulmues shumë i vendosur.”

Donald Mihalek, një agjent i lartë në pension i Shërbimit Sekret, e quajti atentatin si një ngjarje historike dhe hoqi paralele me vrasjen e Theodore Roosevelt në Milwaukee në vitin 1912. “Nuk mund të mbyllësh një qytet të tërë”, shprehet ai.

Sezoni i fushatës e bën punën edhe më të vështirë, sepse orari i një kandidati mund të jetë i parregullt, duke i dhënë Shërbimit Sekret më pak kohë për të planifikuar.

Greg Gitschier, gjithashtu një ish-agjent i Shërbimit Sekret, vlerësoi shpejtësinë me të cilën agjentët lëviznin midis Trump dhe drejtimit të të shtënave. “Mendova se agjentët reaguan shumë mirë dhe shumë shpejt”, shprehet ai.

Komiteti i Sigurisë Kombëtare të Dhomës së Përfaqësuesve tani dëshiron të hetojë provat se Trumpit iu mohua mbrojtje më e madhe e inteligjencës përpara tubimit, shkruan Fox News Digital.