Publikuar më 13.05.2024 nga shekulli_admin

Policia e Shtetit ka vendosur 30 mijë euro shpërblim për këdo që jep informacion që mund të çojë në kapjen e Azgan Mernicës, 23-vjeçari autori i dyshuar i vrasjes së efektivit të forcave “Shqiponja” Novruz Cenalia.

Policia thotë se 23-vjeçari është banues në fshatin Sulaj të Fierit. Pas vrasjes së efektivit të policisë, autori mësohet se është larguar nga vendngjarja me këmbë.

Në të gjithë qarkun e Fierit janë ngritur pika të shumta kontrolli, ndërsa kërkimet për lokalizimin e tij vijojnë nga FNSH dhe RENEA si dhe me dronë nga ajri.

Pasi autori është ndeshur sot me viktimën në rrugë, ka debatuar për makinën, dhe aty ka nisur një konflikt i çastit, për shkak të rrugës së ngushtë të fshatit ku janë ndeshur makinat.

Polici është qëlluar me plumb në kokë duke i shkaktuar vdekjen në vend. Autori Mërnica është larguar nga vendngjarja me automjetin e tij duke shkuar te shtëpia e dajës. Aty ka lënë makinën dhe më pas ia ka “mbathur” arave për t’iu fshehur uniformave blu. Ndërkohë këta të fundit, po bëjnë krehjen e gjithë zonës, teksa po bëhen kërkime edhe me dron.

Ndërkohë, në një prononcim për mediat nga vendi i ngjarjes, drejtori i Policisë së Fierit, Lenc Panganika është shprehur se ligji do të jetë shumë i ashpër për 23 vjeçarin që ka ngritur dorë mbi një punonjës të Policisë së Shtetit. Ai i ka bërë thirrje familjarëve të dorëzojnë autorin.

“Fillimisht kemi marrë njoftim për të shtëna me armë dhe të plagosur. Më pas, kemi marrë vesh se ishte plagosur dhe kishte ndërruar jetë në vend, efektivi Novrus Cenalia, i cili punonte prej katër vitesh punonte në Policinë e Shtetit.

I bëjmë thirrje autorit të vetëdorëzohet. Zbatimi i ligjit do të jetë shumë i ashpër. Motivet e para janë ato të çasitit, nuk ka lidhje me atë që përflitet për gjakmarrje. Deri tani e përjashtojmë këtë pistë”, u shpreh Lenc Panganika.

Kushdo që ka informacion të telefonojë në numrin pa pagesë 112, pasi Policia e Shtetit ju garanton anonimatin. Për çdo informacion të vlefshëm, Unifromat Blu vënë në dispozicion shpërblimin prej 30.000 euro.

Ndërkohë, shërbimet e Policisë së Fierit, Forca Kombëtare e Sigurisë dhe Reparti Special “RENEA”, në drejtimin e Drejtorit të Përgjithshëm të Policisë së Shtetit, vijojnë veprimet operacionale në zonë, me qëllim kapjen dhe vënien në pranga të 23-vjeçarit.

Kujtojmë që Policia e Shtetit ka bërë me dije se dyshohet që ngjarja ka ndodhur për konflikte të çastit. Fillimisht u raportua për gjakmarrje, por më vonë kjo pistë u hodh poshtë nga vetë drejtues të lartë të uniformave blu. Policia ka vënë në dispozicion 30 mijë euro për këdo që jep informacion të vlefshëm rreth lokalizimit të autorit.

Autori Azgan Mernica e ka vëllain në burg, Kiri Mernica, ndërsa efektivi e ka të atin polic. Ky i fundit ka qenë i dyshuar për një vrasje në Has në vitin 1997, por ishte shpallur i pafajshëm. Kjo ka bërë që të lindin dyshimet se vrasja mund të kishte ndodhur për gjakmarrje.

NJOFTIMI I POLICISË:

Në lidhje me ngjarjen e ndodhur në fshatin Baltëz, ku u vra me armë zjarri, punonjësi i Policisë (jashtë shërbimit), shtetasi N. C., Policia e Shtetit kërkon ndihmën dhe bashkëpunimin e qytetarëve për lokalizimin e autorit të dyshuar të vrasjes, shtetasit Azgan Mernica, 23 vjeç, banues në fshatin Sulaj.

Kushdo që ka informacion të telefonojë në numrin pa pagesë 112, duke iu garantuar anonimatin. Për çdo informacion të vlefshëm, Policia e Shtetit vë në dispozicion shpërblimin 30 000 euro.

Ndërkohë, shërbimet e Policisë së Fierit, Forca Kombëtare e Sigurisë dhe Reparti Special “RENEA”, në drejtimin e Drejtorit të Përgjithshëm të Policisë së Shtetit, vijojnë veprimet operacionale në zonë, me qëllim kapjen dhe vënien në pranga të 23-vjeçarit.

Gjithashtu, në të gjitha akset rrugore lidhëse me qarkun Fier janë ngritur pika kontrolli.

Grupi hetimor, në drejtimin e Prokurorisë, po vijon veprimet në vendngjarje për të sqaruar dhe dokumentuar me prova ligjore rrethanat e rastit.