Publikuar më 28.11.2023 nga shekulli_admin

Shqipëria feston sot 111-vjetorin e Pavarësisë. Më 28 Nëntor 1912, Ismail Qemali ngriti flamurin në Vlorë duke shpallur Shqipërinë shtet sovran dhe të pavarur.

28 Nëntori njihet ndryshe edhe si Dita e Flamurit, një ditë e rëndësishme për mbarë shqiptarët në trevat shqiptare dhe anembanë botës. Këtë 28 Nëntor, për herë të parë në vendin tonë u organizua Parada e shqiptarëve. Me pjesëmarrjen e mijërave shqiptarëve nga të gjitha trojet, parada mblodhi mbi 150 Ansamble popullore.

Pavarësisht reshjeve të shiut, grupet kulturore, artistike e sportive etj nga Shqipëria, qytetet shqipfolëse të Ballkanit Perëndimor, dhe shqiptarët e disaporës me kostume popullore tradicionale e valle, e flamurin shqiptarë në duar parakaluan në bulevard për ti treguar botës kulturën tonë dhe për ta kthyer Tiranën në zemrën e shqiptarisë. 

Të shumtë ishin dhe qytetarët të cilët nuk iu trembën shiut por dolën për të shijuar paradën që organizohet për herë të parë në Shqipëri dhe e para që hapi dyert për organizimin e saj ishte Tirana.

 Parada Shqiptare është një aktivitet i përvitshëm i organizuar nga organizata “Rrënjët Shqiptare- Albanian Roots (New York)”, si një ndër organizatorët kryesorë dhe bartësit e saj në këto 15 vitet e fundit, ku një nga sheshet kryesore të New Yorkut vishet kuq e zi.

Presidenti i “Albanian Roots” Marko Kepi, i cili është edhe organizator i përvitshëm i paradës së shqiptarëve në Nju Jork tha se organizmi i Paradës së shqiptarëve në Tiranë është një ëndërr që tashmë u realizua.

Në trajtën e një spektakli ngjyrash të traditës dhe trashëgimisë sonë kulturore, ky event synon nxitjen dhe promovimin e bashkëpunimit midis shqiptarëve kudo ku ndodhen, rrjetëzimin e qyteteve shqipfolëse në rajon dhe diasporës shqiptare, inkurajimin dhe promovimin e vlerave kulturore e historike, si dhe promovimin e potencialit turistik nëpërmjet trashëgimisë kulturore.

Në Paradën e mbajtur në Bulevardin “Dëshmorët e Kombit” nuk kanë munguar këngët e vallet shqiptare, mes të cilave “Mora Fjalë”, e cila është kthyer në një “himn” për shqiptarët kudo ku ndodhen.

Po ashtu nuk kanë munguar as motoristët të cilët po marshojnë në nder të përvjetorit të 111 të Pavarësisë.
Kujtojmë se 111 vite më parë Shqipëria fitoi Pavarësinë nga Perandoria Osmane.

Parada u mbyll me parakalimin e kryetarëve të bashkive dhe përfaqësueve të delegacioneve pjesëmarrëse në paradë, më pas dhe ngritjen e flamurit në sheshin ‘Skënderbej’ në Tiranë.

Parakalimi nisi nga sheshi “Nënë Tereza”, si pika e grumbullimit, për të vijuar në drejtim të sheshit “Skënderbej”, aty ku u bë ngritja ceremoniale e flamurit. Ndërkohë që presidenti, kryeministri, kryetarja e Kuvendit bënë ngritjen ceremoniale të flamurit në orën 10:00 në Vlorë.

Kryeministrat e shqiptarëve në Shqipëri dhe Kosovë, Edi Rama dhe Albin Kurti mbërritën së bashku në ceremoninë shtetërore organizuar në Vlorë, ku në mënyrë simbolike, u ngrit Flamuri njësoj si 111 vite më parë.

Njëri pas tjetrit, siç e parashikon protokolli, krerët më të lartë të shtetit shqiptar, presidenti Bajram Begaj, kryetarja e Kuvendit, Lindita Nikolla, kryeministri Edi Rama dhe kryeministri i Kosovës, Albin Kurti vendosën kurora me luleve tek varri i Ismail Qemalit.

Krerët e shtetit nuk mbajtën fjalime, por shtrënguan duart me njëri-tjetrin dhe përshëndetën qytetarë të shumtë që ndoqën nga afër ceremoninë në Sheshin e Flamurit.

Me një foto krejt të veçantë në rrjetet sociale Rama përcjell urimin: “Gëzuar përvjetorin e 111 të Flamurit të Pavarësisë!”

Po kështu urimin për shqiptarët edhe kryetarja e Kuvendit, Lindita Nikolla e ndau në rrjetet sociale duke rikujtuar rrugëtimin e Shqipërisë, nga anëtare e NATO-s, partnere e SHBA, drejt familjes evropiane.

Kreu i Shtetit Bajram Begaj përcolli urime për Ditën e Flamurit përmes Facebook, me mesazhin se modeli frymëzues i etërve themelues, të cilët dhanë gjithçka për Shqipërinë e lirë e të pavarur, të shërbejë si udhërrëfyes në çdo punë që bëjmë për vendin dhe për shqiptarët.

I vetmi që ndau një fjalë për gazetarët, pasi vizitoi ekspozitën në Galerinë e Arteve, ishte Albin Kurti, i cili duke shmangur dallimet politike, u përqendrua te mesazhi i kësaj dite që përbashkon.

“Nuk është sot dita që të flasim për dallime politike, jemi bashkë sepse kemi të përbashkët gjuhën dhe kulturën, të përbashkët historinë dhe të ardhmen. E tashmja përmbushet me kuptim pikërisht në këtë mënyrë”, tha Kurti.

Të pranishëm ishin edhe përfaqësues nga komuniteti fetar, si Baba Mondi dhe At Konstandin Prifti. Politika nuk ishte e bashkuar as në këtë përvjetor të 111-të të pavarësisë, por komuniteti fetar në Shqipëri, dha edhe një herë mesazhin unik të tolerancës fetare dhe bashkimit.

Festës iu bashkuan mijëra shqiptarë nga Kosova, Maqedonia e Veriut, Mali i Zi si dhe ata që jetojnë në diasporë. Për herë të parë në vendin tonë u organizua edhe ‘Parada e shqiptarëve’. 

Më 28 nëntor 1912, përpjekjet e patriotëve e shqiptarë nën drejtimin e Ismail Qemalit kurorëzuan me sukses shpalljen e pavarësisë dhe themelimin e shtetit të pavarur shqiptar.