Publikuar më 06.11.2023 nga shekulli_admin

Sali Berisha ka mbajtur fjalim nga dritarja re Kryesisë së Kuvendit, aty ku pak më parë u futën disa nga deputetët e opozitës, që nuk u lejuan nga Garda, që të futen nga dera.

“Janë të gjithë deputetë me imunitet dhe kurrë ndonjëherë në historinë e një parlamenti deputetët nuk janë ndaluar do kurrë. Sa kohë kanë qenë deputetët, të marrin pjesë në mbledhjen e grupit. Frika dhe tmerri i Ramës bën që të urdhërojë lindën e tij në akte të turpshme. Deputetët nuk mund të përjashtohen përveçse nga mbledhja e grupit nga grupi i tyre.

Edi Rama ka frikë, tmerr. Shikoni se ku arrin kjo verbëri. Sipas tij, ata që përjashton ai nga aktiviteti parlamentar nuk mund të marrin pjesë në mbledhjet e tyre. As Lukashnenko e Putini nuk kanë dhënë një urdhër të tillë. Kjo është fytyra e Ramës.

Nuk lejohet kryetari i grupit me ardh në mbledhje, Histori më të turpshme se kjo nuk ka. Ky është vetëm fillimi. Deputetët dhe populli opozitar nuk tërhiqet. Ti po tregon veten si pasardhës i xhelatit, babait tënd”, tha Berisha.

Pas tensioneve që u regjistruan sot në hyrje të Kryesisë së Kuvendit, ku deputetë të përjashtuar të PD, por edhe ata që nuk janë të përjashtuar kanë gjetur rrugë të tjera.

Përmes një karrigeje, Salianji dhe Nallbati kanë hyrë nga dritarja për në kryesi, dhe më pas Noka.

Pas debateve të forta te Kryesia e Kuvendit, Garda ka vendosur të hapë derën për deputetët e opozitës.

Ndërkohë, punonjësit e Gardës kanë lejuar që të futen në Kuvend, vetëm deputetët që nuk janë përjashtuar.

I vetmi që ka hyrë në Kryesi, nga radhët e deputetëve të përjashtuar, është Flamur Noka, i cili hipi përmes kangjellave.

Kreu i grupit parlamentar të PD-së, Gazment Bardhi ka reaguar sërish për mediat, ku ka lëshuar akuza në drejtim të maxhorancës.

Ai tha se me ligj, mbledhjet e Komisionit nuk lejohen të mbahen online.

“Është në shkelje të rregullores. Deputetët e opozitës kamë futur në mbledhje për të bërë shënime në procesverbal. Punonjësit e Kuvendit janë në shkelje të ligjit.”, tha ai.

Deputeti Ervin Salianji ka deklaruar se Kryesia e Kuvendit është rrethuar me autoblinda dhe me 300 gardistë, për t’i penguar deputetët e opozitës që të futen në mbledhje.

Ai tha se ajo që po ndodh sot është e paimagjinueshme, duke deklaruar se qeveria kërkon të izolohet fjala, ndaj sipas tij japin urdhra të paligjshëm.

Ai tha se Rama i ka dhënë sot urdhër Gardës që “t’i ndalojnë fizikisht, nesër mund t’i japin urdhër për eliminim fizik”.

“Këtu të vetmit njerëz që po tentojnë ta mbajnë me dhunë fizike dhe psikologjike dhe banda, janë deputetët e PS, Rama. Shikoni sjellje brutale, e paimagjinueshme. Nuk ka ndodh ndonjëherë që të vendosen më shumë sesa 300 gardistë dhe rrethim me autoblind për të ndaluar fjalën. Kërkohet të izolohet edhe fjala. Ndaj japin urdhra të paligjshëm, sot i kanë dhënë urdhër për t’i ndaluar fizikisht, nesër mund t’i japin urdhër t’i eliminojnë fizikisht…

Ne nuk jemi këtu për të bërë luftë muskujsh. Por në momentin kur ka kërkesë llogarie ndaj qeverisë, ndodh kjo që ju shihni sot. Ajo që patë ditën e enjte kur kalonin ligjet. Betejën në publik se ku qëndron e drejta, opozita e ka fituar. Kjo nuk është betejë e lehtë, por vetëm fillimi”, tha ai.