Publikuar më 29.10.2023 nga shekulli_admin

Aktorja e njohur e teatrit dhe filmit, Nderi i Kombit, Roza Anagnosti ka festuar 80-vjetorin e Lindjes në një mbrëmje mes kolegësh dhe miqsh. E rrethuar nga familja, vajzat e nipërit ajo e kishte shkruar fjalën përshëndetëse duke parashikuar emocionet. Dhe mbrëmjen e suksesin ia kushtoi së pari familjes.

“Dua të falënderoj familjen time që ka qenë për mua frymëzim, Dhimitrin e shtrenjtë, vajzat tona dhe vazhdimësia. nipërit. E lashë për në fund publikun tim që më ka ndjekur. Ata janë energjia që më ka çuar drejt suksesit. Kam qenë e sinqertë në art dhe populli ma ka kthyer me respekt e mirënjohje. I falenderoj”, tha ajo në fjalën e mbajtur.

Ndërsa Arkivi Qendror i filmit shfaqi versionin e restauruar të “Mësonjëtores” ku Anagnosti përjetëson figurën ikonë të Sevasti Qiriazit përmes rolit të Dafinës, aktorja, u ndal te profesioni dhe gjurmët në kinematografi.

“Në filmin ‘Mësonjëtorja’ unë kam një prej roleve të mia më të dashura, Dafinën që është edhe një histori e ndritur e gjuhë shqipe dhe identitetit tonë.
Aktori është i lirë dhe shpesh improvizon. E bukura në ekran është edhe në formë. Ne shoqërinë e konsumit edhe arti ka ndryshuar. Për mua vitet kalojnë dhe janë drejt perëndimit” tha aktorja e njohur.

E shfaqur në ekran në fillim si Roza Xhuxha dhe pas martesës me regjisorin e njohur Dhimitër Anagnosti, me mbiemrin e tij, ajo mundi të ruajë balancat dhe të dalë mbi paragjykimet e dritëhijet në kohë të vështira. E bija në një postim i përmendte gëlltitjen e lotëve, prindërit e persekutuar dhe sabotimin e kolegëve me sebepin e biografisë.

***

Vajza e aktores së madhe Roza Anagnosti, Juna, ka bërë një dedikim prekës për 80-vjetorin e lindjes së mamasë së saj.
Familja jonë sot feston ditëlindjen e bashkëshortes, mamit, nonës Roza! Dhe nëse të gjithë njerëzit urojnë sot artisten e shquar unë dua të uroj njeriun e mrekullueshëm që je.
Vajza e aktores së madhe Roza Anagnosti, Juna, ka bërë një dedikim prekës për 80-vjetorin e lindjes së mamasë së saj.
Postimi i vajzës së Roza Anagnostit
Familja jonë sot feston ditëlindjen e bashkëshortes, mamit, nonës Roza! Dhe nëse të gjithë njerëzit urojnë sot artisten e shquar unë dua të uroj njeriun e mrekullueshëm që je.
Dua të përshkoj me imagjinatë 80 vjetët e rrugëtimit tënd të jetës ku jo vetëm talenti, po dhe këmbëngulja, vullneti, ndershmëria, sensibiliteti, dhembshuria dhe sakrifica e madhe të bënë të jesh artistja dhe njeriu i çmuar për ne.
Shumë pak njerëz i njohin sakrificat e tua të mëdha brenda e jashtë skenës dhe ekranit, dorë për dore me dashurinë tënde, shokun e jetës Dhimitër.
Ti ke gëlltitur shumë lot: kur shkoje te prindërit e tu të varfër e të persekutuar, kur detyroheshe të merrje borxh për të arritur në fund të 15-ditëshit, kur me sebepin e biografisë kishte kolegë që të sabotonin, kur e mbushje gjithmonë më pak pjatën tënde.
Ti ke qenë bijë, motër, mbesë, bashkëshorte, nuse, kunatë, nënë, teze, hallë, vjehërr, gjyshe e sakrificës. Je kujdesur pa rezerva për të gjithë me mish e me shpirt. E ke ndarë kafshatën e familjes tënde pa hezitim me kë ka pasur nevojë. Shtëpia jonë në Tiranë, që unë e quaja “Hotel Anagnosti”, i kishte gjithmonë dyert e hapura, në çdo kohë, për njerëzit e fisit që vinin nga Vlora, Shkodra e Korça. Tani edhe nga Italia e Amerika.
Edhe gurët e Jalit e njohin përkushtimin tënd.
Ti vetëm vrapoje. Takat e tua trokisnin nga Teatri ne shtëpi, nga shtëpia në Kinostudjo, nga shtëpia nëpër spitale, kaq e kaq herë.
Ti dhe tani, kur je vetëm, vrapon, veçse pa taka.
Ka shumë për të thënë për ty mami im dhe ky post nuk mjafton.
Ti ke Nënë Terezën në shpirt dhe me vargjet e saj përpiqesh të lehtësosh dhimbjen dhe sakrificat e tanishme që Zoti të rezervoi.
Do të të jemi debitorë për jetë mami e shtrenjtë.
Dhe sot familja jote e vogël të uron: GËZUAR DITËLINDJEN!
Ti ke shumë akoma për të thënë e për të dhënë dhe ne si publik i privilegjuar do jemi gjithmonë në radhë të parë
Të duam përjetësisht:
bashkëshorti i shtrenjtë Dhimitër,
vajzat Juna dhe Era
dhëndurët Tonin e Ali
mbesa Marigò
nipat Jon, Anteo e Stefan

***

Ndërsa ajo feston, Ndriçim Xhepa kujton njohjen me të.
“E kam njohur një vit ose dy pasi hyra në teatër në vitet 1980-1982 . Kemi luajtur role vëlla e motër e burrë e grua. Në një pjesë të Ruzhdi Pulahës, nga viti 1985-1986, kishim role çifti dhe kisha pak frikë. Pirro Mani tha se Roza duket shumë e re dhe as nuk e kupton fare, do dilni shkëlqyeshëm. Ajo është aktore potente që ka shkëlqyer në çdo rol”, tha Xhepa.

Me 20 filma dhe disa pjesë teatri, Roza ju ka dhënë jetë roleve dhe personazheve duke krijuar një portret unik në artin shqiptar.