Publikuar më 19.09.2023 nga shekulli_admin

Gjykata e Pireut ka lënë në paraburgim vrasësin e 39-vjeçarit shqiptar, Brigen Limka në Greqi. 

Ngjarja ndodhi mesditën e së premtes (15 shtator) në Pire, pas një konflikti për vendin e parkingut. 

Mediat greke shkruajnë se 68-vjeçari është shfaqur i penduar para gjykatës, ndërsa ka kërkuar falje për krimin e rëndë. “Jam penduar. Sinqerisht kërkoj falje, ishte gabimi më i madh i jetës sime. Dhe për këtë uroj dënimin tim”, raportohet se ka deklaruar.

Po ashtu, mësohet se autoritetet kanë kërkuar kryerjen e ekspertizës psikiatrike ndaj të moshuarit.

Si ndodhi ngjarja

Shqiptari u qëllua për vdekje me dy plumba në fytyrë nga një 68-vjeçar me të cilin kishte konflikte të vazhdueshme.

Shqiptari u dërgua në spitalin Zaneio por nuk arriti t’i mbijetojë plagëve të marra, duke humbur jetën. Viktima mësohet se ishte baba i tre fëmijëve dhe punonte në parkingun ku ndodhi sherri.

Dëshmitarët thanë se 68-vjeçari shfaqte shpesh sjellje agresive dhe i kërkonte viktimës një vend parkimi në parkingun ku i riu punonte. Pas debatit, autori shkoi në banesën e tij, mori armën dhe qëlloi për vdekje me gjakftohtësi shqiptarin.

Vetëm 9 sekonda, i mjaftuan një 68-vjeçari grek për t’i marrë jetën një 39-vjeçari shqiptar, roje parkingu në Pire, baba i 3 fëmijëve. Briken Limka, me origjinë nga Korça kishte pasur një debat me autorin, i cili sipas dëshmitarëve okularë grindej çdo ditë me jo vetëm me viktimën, por edhe me fqinjët e tjerë.

Pas sherrit, autori shkoi në banesë dhe mori armën e gjahut. Sapo ka parë shqiptarin e ka qëlluar në fytyrë. Viktima ka mundur të bërtasë: “Vrapo Kosta!” duke iu drejtuar kolegut të tij, por ka marrë vetë plumbin. Menjëherë është rrëzuar në tokë, por autori nuk e ka lënë me kaq.

Ai është afruar dhe e ka qëlluar edhe një herë në kokë. “Mbarova punë me ty tani”– thuhet se ka bërtitur autori duke treguar se sa i vendosur ishte për të vrarë. Më pas 68-vjeçari u nis menjëherë për në shtëpinë e tij. Sipas një gruaje që ndodhej në mesditë në vendin e ngjarjes, autori nuk kishte as makinë, por shfaqte shpesh sjellje obsesive dhe kishte një mosdashje të madhe për parkingjet.

“Ata patën një debat. Ai u ngjit në shtëpinë e tij dhe mori pushkën. Kur u largua tha “tani mbarova me ty” dhe më pas u largua. Priti me këmishën hapur që ta arrestonin. Ai ishte një njeri i çuditshëm. Dy vjet më parë ai pati një aksident me makinë. Nuk kishte makinë, por nuk i pëlqenin parkingjet. I konsideronte të paligjshme”, – tha ajo.

Një tjetër grua që njihte autorin e moshuar e konsideron si një person që shpesh shkaktonte probleme dhe debatonte me fqinjët për arsye të parëndësishme. Gruaja e cila prej vitesh jeton në këtë zonë rrëfen ngjarjen.

“Rreth orës 1 e çerek dëgjojmë të shtëna. Zhurma ishte shumë e fortë. Dëgjoj zëra. Pashë fqinjin. Ai hapi zjarr mbi djaloshin dhe iu kthye përsëri. E mbushi dhe i dha edhe një goditje tjetër”, – përshkruan gruaja ngjarjen tragjike. Ajo shpjegoi se autori “ka 16 vite që lufton me të gjithë, duke u krijuar probleme të gjithëve. Ai nuk është i çmendur. Ai është i keq. I thanë se parkingu është privat, por ai nuk kuptonte”.