Publikuar më 21.03.2023 nga shekulli_admin

Pirro Naçi

‘’Fru-fru dhe aromata’’. Një shprehje që e përdorin grekët. ‘’Vizatojnë’’ ata që premtojnë shumë, por në fakt nuk bënjë asgjë, vetëm fjalë e veprime të bujshme.

Ndoshta ekspozita e Edi Ramës në Athinë një ditë më parë, mund të kishte një mijë e një të mira, mua të paktë më solli ndër mend shprehjen e grekëve. Ai nuk çeli ekspozitë, ai ‘’inaguroi’’ një zyrë si ajo e Tiranës! Qofsha i gabuar! Vizita nuk do të jetë zyrtare shkruante faqja e tij, por nga ana tjetër me elitën më të lartë greke u ‘’festua’’. Vetëm Perikliu , themeluesi i demokracisë, ‘’mungonte’’.

Thonë se veprat e artit dhe skulpturat e lashta të Athinës kanë edhe ‘’veshë’’ edhe ‘’gojë’’. Të shohim se ç’do të na thotë ‘’Perikliu’’ për festën dhe për ‘’Improvisations’’.

Gazetat e Athinës flasin për një ekspozitë që organizohet nën kujdesin e Ministrisë së Punëve të Jashtme të Greqisë! Poli orea! …Edhe ‘’jo zyrtare’’ edhe ‘’zyrtare’’… hajde gjeji fillin. Një praktikë që kohët e fundit është kthyer në ‘’modë’’. Pothuajse njësoj si ‘’Improvisations’’. Më 2020 kishim një takim ‘’privat’’ me kryeministrin grek, më 2021 prapë një vizitë informale, e njëjta edhe më vonë e deri më tani, më 2023.

Të gjitha këto flasin për një diplomaci të brishtë, paçka se nga të dyja anën trumbetojnë të kundërtën. Të hapësh një ekspozitë private dhe të bësh dhe ‘’ca punë’’ shtetërore sikur nuk i ka lezet diplomacisë. Nuk dua të gjykoj dhe vlerësoj praktikat apo punët e qeverisë, por me kësi lloj takimesh dhe deklarata pompoze nuk besoj se mund të zgjidhen problemet e shumta që na i ka lënë e kaluara, por as ato të kohëve të sotme.

Diplomacia ka shumë për të bërë me Athinën, mjafton t’i hedhim një sy historisë. 120 vjet më parë Ismail Qemali mbartte për brenda dëshirën e njeriut të vërtetë për të krijuar një klimë fqinjësie e dashurie midis dy popujve. Kaq mjaftonte për ta pritur dhe vlerësuar me seriozitetin më të madh nga e gjithë klasa politike greke, që nga mbreti, kryeministri, kryetari i Kuvendit, ministrat, akademikët e personalitete të shquara të kohës.

Sot ‘’Babain e Kombit’’ e kujtojmë vetëm kur duan të ‘’pagëzojnë’’ ndonjë nga aeroplanët që shpie lart e poshtë Evropës politikanët shqiptarë me emrin ‘’Ismail’’. Kjo na mjafton? Për pathosin e Ismail Qemalit ndaj të dy popujt, asnjë fjalë, asnjë qëndrim. Politikanët Shqiptarë sa herë që të vizitojnë Athinën mirë është t’i hedhin një sy kujtimeve të shkruara të Ismail Qemalit.

Sa për ekspozitën e Athinës kushdo ka të drejtë të hapë një të tillë. Por, kur mban përsipër një post shtetëror, siç është ai i kryeministrit, nuk mendon vetëm për veten, por diçka më shumë, për kulturën për artin e një populli dhe një kombi të tërë. Atë mund ta bësh dot?