Qosja: “Korrupsioni dhe padrejtësia cenojnë kohezionin tonë mbarëkombëtar”

Universiteti “Aleksandër Moisiu” nderon me titullin “Doctor Honoris Causa” akademikun Prof. Dr. Rexhep Qosja

Qosja: Fokusohuni te shkenca, artet, kultura që janë të gjithëkohëshme, ruani identitetin e kombit

“Duhet të mësojmë prej historisë”, ky është apeli i akademikut dhe profesorit të shquar, Rexhep Qosja, dje nga Universiteti i Durrësit. Gjatë një ceremonie të zhvilluar në Durrës me titullin “Doktor Honoris Causa”, akorduar nga Senati Akademik i Universitetit “Aleksandër Moisiu”, mbajti një fjalë me theks vlerat kombëtare.

Motivacioni

Prof. Dr. Rexhep Qosja u nderua me titullin e lartë me motivacionin: “Për kontribut të shquar e shumëdimensional në zhvillimin e kulturës, arsimit të lartë dhe kërkimit shkencor në Kosovë dhe në mbarë botën shqiptare; si studiues i shquar i shkencave albanologjike; si themelues dhe drejtues i institucioneve, programeve të studimit e organeve shkencore; si studiues i letërsisë, në veçanti i letërsisë së Rilindjes Kombëtare Shqiptare; si historian i letërsisë e kritik letrar; si shkrimtar, publicist e polemist; si një zë origjinal në trajtimin e problemeve të mëdha të kohës, bazuar vetëm në kriterin e së vërtetës; si veprimtar shoqëror e politik, si një ndër intelektualët më të shquar të kombit shqiptar; si shembulli më i mirë i akademikut, studiuesit, krijuesit e intelektualit; si Nder i Kombit”. Në ceremoninë akademike të dhënies së titullit të nderit morën pjesë personalitete të arsimit dhe shkencës, studiues të gjuhës e letrave shqip, përfaqësive diplomatike, si dhe shumë të ftuar të tjerë. Në fjalën e saj, Rektorja e Universitetit “Aleksandër Moisiu”, Prof. Dr. Kseanela Sotirofski vlerësoi lart kontributet akademike të Akademik Rexhep Qosjes. Ajo u shpreh e nderuar që tashmë një figurë e tillë, e cila lidhet me shumë aspekte të zhvillimit në shkencave albanologjike, të arsimit tonë kombëtar dhe të kulturës shqiptare, është pjesë e familjes së UAMD-së.

Kohezioni mbarëkombëtar

Në fjalën e tij, Akademik Rexhep Qosja u shpreh i ngazëllyer me vlerësimin. “Faleminderit Senatit Akademik për titullin e nderit. Ky titull më gëzon sepse më jepet prej një universiteti që mban emrin e një prek artistëve më të lavdishëm shqiptarë e europianë, Aleksandër Moisiu. Ai ishte artist me sjellje të fisme në kohë të keqe e të mirë”, u shpreh ndër të tjera ai. Akademiku Qosja mbajti kumtesën me temë:  “Kohezioni shoqëror e mbarëkombëtar dhe rrezikuesit e tij”. “Duhet të forcojmë kohezionin shoqëror dhe kombëtar, i cili po rrezikohet nga krahinarizmi dhe lokalizmi. Këto i shpallin si shtyllë kurrizore të Kosovës apo Shqipërisë, ndërsa promovuesit qëndrojnë në institute shkencore dhe jo shkencore të vendeve tona. Ndarja sipas klasave, korrupsioni, padrejtësia dhe cenimi i dinjitetit njerëzor po ashtu cenojnë kohezionin tonë mbarëkombëtar”, u shpreh Akademik Qosja.

Për të parandalimi i së keqes bëhet më së pari nga intelektualët dhe universitetet. “Qëmtoni dhe kumtoni të këqijat që dëmtojnë vendin, dobësimin e vlerave, moralin dhe rrjedhimisht kohezionin tonë social dhe mbarë kombëtar. Fokusohuni te shkenca, artet, kultura që janë të gjithëkohëshme, përmbajtja që ruan dhe pasuron identitetin e kombit”, ishte kumti që përcolli nderi i Universitetit të Durrësit. Ceremonia e dhënies së titullit të nderit që iu dha Prof. Dr. Rexhep Qoses,u zhvillua në fillim të punimeve të Konferencës Ndërdisiplinore Ndërkombëtare “Institucionet sociale në shoqërinë bashkëkohore: Bashkëveprimi ndërmjet arsimit, familjes, besimit fetar, politikës dhe ekonomisë”.

Minishengeni ballkanik?

Më herët, akademiku Rexhep Qosja ishte në Panairin e Librit në Tiranë. Gjatë një prononcimi të shkurtër për mediat, ku ishte i pranishëm tek Panairi i Librit, ka reaguar për herë të parë në lidhje me nismën “Mini Shengen Ballkanik”, inicuar nga kryeministri shqiptar Edi Rama, presidenti i Serbisë Aleksandër Vuçiç si dhe kryeministri maqedonas Zoran Zaev. Qosja u shpreh se kjo po diskutohet, por asgjë nuk është e qartë, ndërkohë që shtoi se vendet e Ballkanit Perëndimor duhet të shohin drejt BE-së. “Po diskutohet, për të ashtuquajturën Minishengen, me duket sikur nuk po e kuptojmë. Çfarë do të thotë Minishengen? Cilat janë të mira dhe pengesat, nuk e di. Po pres dhe të shohim! Këto vende të Ballkanit Perëndëmior, por Ballkani Perëndimor është shumë më i gjerë. Me Minishengen apo pa Minishengen, Ballkani Perëndimor do të jetë pjesë e BE-së. BE është një premtim madhështor për gjithë Evropën. Një premtim për paqen, për bashkëpunimin. Rama ka thënë në Beograd diçka që askush nuk e ka thënë më para në Beograd para tij, ka kërkuar njohjen e pavarsisisë së Kosovës. Edi Rama dhe Albin Kurti duhet të kenë një bashkëpunim të tyrin midis tyre në të mirë të shqiptarëve, të Shqipërisë dhe Kosovës.”- u shpreh Qosja.

Studiuesit nga 18 shtete

Kjo ngjarje shkencore bëri bashkë 270 studiues nga 18 shtete të ndryshme, të cilët shkëmbyen ide dhe përvoja studimore në lidhje rolin e institucioneve arsimore, familjes, religjionit, por edhe lëvizjeve qytetare apo komuniteteve në shoqërinë bashkëkohore. Një fokus i veçantë në prezantimet e akademikëve pjesëmarrës iu kushtua sfidave dhe problematikave që prekin të rinjtë, emigracionin, pjesëmarrjen qytetare, etj. Gjatë punimeve të konferencës u ndanë gjithashtu dy çmime: “Studiuesi/botimi i Vitit në shkencat sociale dhe humane” si dhe çmimi për studiuesin e ri më të mirë në këtë fushë.

Leave a Reply

Your email address will not be published. Required fields are marked *

Të tjera

Abissnet