Zgjedhjet e 25 qershorit, “shqiptari” De Biazi voton te “Xhamlliku”

Publikuar më 18. 06. 2017 nga Eno Shkëmbi

Xhani De Biazi nuk është më në krye të Kombëtares shqiptare të futbollit, por nënshtetësia shqiptare i jep atij mundësinë që të jetë një nga votuesit që do t’u drejtohen kutive të votimit më 25 qershor.

Për trajnerin italian, hera e parë si votues në vendin tonë e gjen atë në një nga zonat tradicionale në Tiranë, te “Xhamlliku”, raporton “Panorama Sport”.

Si për të qenë të pandarë, me gjithë largimin nga Kombëtarja, ish-trajneri i kuqezinjve e gjen vetën në të njëjtën qendër votimi me disa nga lojtarët që i ka stërvitur, apo edhe një tjetër që mund të ishte kandidat për t’u afruar në Kombëtare: Abrashi, Aliji dhe vëllezërit Ajeti, janë gjithashtu pjesë e votuesve në Njësinë Nr.3 në Tiranë.

Ish-strategu i përfaqësueses shqiptare të futbollit do të votojë në qendrën numër 1749, në Njësinë bashkiake numër tre në kryeqytet dhe numri rendor në listat e votimit për të është 217.

Trajneri e mbylli aventurën e tij me kuqezinjtë pas pesë vitesh e gjysmë në drejtim të tyre, mirëpo në daljen e fundit si trajner i Shqipërisë, deklaroi se nuk do të humbasë lidhjen me shqiptarët dhe se ndihet krenar që ka nënshtetësi shqiptare.

Lojtarët

Si për rastësi, De Biazi do të jetë i pandarë edhe me disa nga lojtarët e Kombëtares. Në të njëjtën qendër votimi gjenden edhe emrat e Amir Abrashit, Naser Alijit dhe vëllezërve Adonis dhe Albian Ajeti.

Bie në sy mospranimi i emrit të vëllait tjetër, mbrojtësit të Kombëtares, Arlindit, që nuk është në listën e votuesve pranë dy vëllezërve të tij në numrat rendorë.