Zbythet ISHSH, Ora News fiton betejën ndaj qeverisë

Tërhiqet ISHSH, Ora News fiton betejën. Solidariteti i medieve shqiptare dhe atyre ndërkombëtare, për të mos cenuar fjalën e lirë

Inspektorati Shëndetësor Tiranë  ka tërhequr kërkesën për mbylljen e televizionit Ora. Lajmin e ka bërë të ditur vet televizioni i cili njofton se do të vazhdojë beteja në gjykatë dhe do të vijojë të punohet për të sjellë lajmin e fundit, të vërtetë dhe të saktë ashtu siç është bërë deri më tani.

Tv Ora thotës se për dy ditë me radhë në javën që lamë pas, ISSH ushtroi presion ndaj  kësaj medie duke konkluduar dhe me vendimin për mbylljen e televizionit me argumentin se kishte lejuar debatet në studio.

Në mungesë të verifikimeve në terren dhe me fotografi të bëra përmes kompjuterit, ISHSH arriti në konkluzionin se u bënë shkelje të rregullores së parandalimit të Covid 19. Në fakt të ftuarit në emisionet e Artur Zhejit, të Sonila Meços dhe Dritan Hilës në të gjithë rastet kanë qëndruar mbi 2.5 m larg”, shkruan Tv Ora.

Kërkesa për mbylljen e këtij televizioni solli një reagim të madh të mediave shqiptare e po ashtu, të atyre ndërkombëtare duke e cilësuar veprimin si një presion për të mbyllur fjalën e lirë.

Në lidhje me tentativën e mbylljes së televizionit Ora News, i ftuar në studion e këtij televizioni u shpreh i indinjuar edhe kryetari i Partisë ‘Zgjidhja’, Koço Kokëdhima. Kreu i Partisë “Zgjidhja” tha se Inspektorati Shëndetësor duhet të tërhiqet nga ky qëllim dashakeqës për të bllokuar fjalën e lirë.“Dy gjobat e vëna dhe tentativa për të ndaluar aktivitetin informues të ‘Ora’, janë veprime të nxituara dhe që nuk mund të justifikohen me pretendimet për shkeljen e rregullave anti-Covid në transmetimet televizive. “Zgjidhja’ u bashkohet apeleve të organizatave të gazetarëve brenda dhe jashtë vendit për të mos cenuar median e lirë. Gjatë kohës së pandemisë, punonjësit e medias, ashtu si ato të shëndetit dhe të sigurisë, ishin në krye të detyrës për të informuar publikun. Ata meritojnë respekt dhe nderim dhe jo censurë e mbyllje mediesh”, u shpreh më vonë me një deklaratë “Zgjidhja”.

Sakaq, Drejtori i Informacionit në RTV Ora News, Brahim Shima, në një prononcim për gazetën “Shekulli”  më herët tha se dokumentacioni ka gafa dhe shkelje. Sipas tij kemi të bëjmë me një sulm selektiv për vetë faktin që AMA në 2 maj falënderonte ISSH-në që kurseu gjobat për dy televizione të tjera.

“Është selektiv sepse në datë 2 maj AMA ka nxjerrë një letër falënderimi që ISSH nuk ka gjobitur dy televizione të tjera dhe ky është fakt ndërkohë që Ora nuk është paralajmëruar asnjë herë dhe ka ardhur një shkresë në orën 10:30 të natës mbrëmë dhe një shkresë sot, që thotë dy të parat gjobë nga 10 milionë secila, dhe të nesërmen ka ardhur shkresa e dytë me gjobë 20 milionë lekë të vjetra dhe vendim kryesor mbyllje aktiviteti”, u shpreh Shima për “Shekulli”-n.

Mes të tjerash ai mohoi që të ketë pasur një inspektim në studiot e televizionit, ndonëse kjo gjë pretendohet në shkresa. “Në shkresën e ISSH thuhet që është bërë një inspektim nga ora kaq në orën aq….por faktikisht në studiot e Orës nuk ka pasur asnjë inspektim, nëse do të kishte ekspertët do të shikonin që kushtet këtu janë brenda të gjitha kritereve”, tha ai, një javë më parë

I pyetur nga “Shekulli” në lidhje me reagimin që do të ndërmerrte televizioni, drejtori i Informacionit në RTV Ora tha: “Ne sigurisht që do ta ankimojmë duke parë të gjitha gafat që kanë bërë në dokumentacion, të gjitha shkeljet që janë bërë në dokumentacion do të ankimohen dhe do të ndjekim të gjithë rrugën ligjore të mundshme të së drejtës”.

Për t’u bërë pjesë e grupit të "Shekulli"
mjafton të klikoni: Join our FB Group dhe kërkesa do t’ju aprovohet.

KOMUNITETI SHEKULLI ONLINE: https://www.facebook.com/groups/1381242728701899/



Leave a Reply

Your email address will not be published. Required fields are marked *

Të tjera

Abissnet