TIRANË - Këshilli i Lartë i Drejtësisë ka nxjerrë menjëherë sot një urdhër, ku kërkon hetim të procedurave të ndjekura për lirimin e Ilir Xhakjas, i cili ekzekutoi një ditë më parë shefin e komisariatit të Shijakut, Adem Tahirajn.
 
Vendimi është marrë në mbledhjen e sotme të KLD-së pas urdhrit të nxjerrë saktësisht nga zëvendëskryetari i KLD-së, Elvis Cefa.

“Me urdhër të Zëvendëskryetarit të Këshillit të Lartë të Drejtësisë, Inspektorati i këtij Këshilli do të verifikojë veprimtarinë gjyqësore të realizuar nga gjykatat, në shqyrtimin e akuzave penale, në ngarkim të të pandehurve, autorë të ngjarjes tepër të rëndë, të ndodhur në datën 13.09.2012, ndaj shefit të Komisariatit të Shijakut, kryekomisarit, Adem Tahiri”, thuhet në deklaratën e KLD-së.
 
Ilir Xhakja rezulton i dënuar për vrasje nga gjykatat shqiptare të shkallës së parë e të shkallës së dytë. Me një vendim të datës 27 mars 2006, Gjykata e Krimeve të Rënda e ka dënuar Ilir Xhakjan me 21 vite burg për akuzën e vrasjes, por çështja pushoi dhe Xhakja u lirua në vitin 2011.


M.Alla