Luis Tanushi

Kur ka mbetur më pak se një vit nga zgjedhjet e përgjithshme të 2013-s, qeveria ka lajmëruar rritjen e pagave. Në një dalje për mediat, zëdhënësja e Kryeministrit, Erla Mëhilli, njoftoi se shefi i qeverisë ka firmosur vendimin e një jave më parë për rritjen e rrogave të punonjësve të administratës. Kjo rritje, sipas mazhorancës, përgjysmon raportin e pagës së kryeministrit me atë të buxhetorëve të tjerë nga viti 2005 deri në 2012-ën.

Mbi bazën e kësaj rritje, paga mesatare e arsimtarit në arsimin e mesëm, që në vitin 2005 ka qenë 26831 lekë (njëzet e gjashtë mijë e tetëqind e tridhjetë e një lekë), në vitin 2012 bëhet 59235 lekë, një rritje mbi 2.2 herë krahasuar me vitin 2005. Me të njëjtat ritme, qeveria shprehet se janë rritur edhe pagat e arsimtarëve që punojnë në arsimin 9 vjeçar. Nëse në vitin 2005 kanë qenë 22771 lekë, në vitin 2012 bëhet 50563 lekë, me një rritje mbi 2.2 herë krahasuar me vitin 2005. Shtesa e pagave ka përfshirë edhe sistemin shëndetësor ku përfshihen mjekët dhe infermierët.

Paga mesatare e mjekut, që në vitin 2005 ka qenë 22683 lekë, në vitin 2012 bëhet 58098 lekë, me një rritje prej rreth 2.6 herë krahasuar me vitin 2005. Paga mesatare e infermierit, që në vitin 2005 ka qenë 15044 lekë, në vitin 2012 bëhet 35618 lekë, një rritje prej rreth 2.4 herë krahasuar me vitin 2005. Në mbledhjen e djeshme u lajmërua edhe rritja e pagave për punonjësi e policisë, paga e të cilëve do të bëhet 55944 lekë, pra ka një rritje prej rreth 1.8 herë krahasuar me vitin 2005. Paga mesatare në administratën publike për këtë vit do të bëhet 35122 lekë.

Sipas zëdhënëses së Këshillit të Ministrave, rritja e vazhdueshme e pagave ka ulur diferencat mes pagës së punonjësve të thjeshtë dhe pagës së kryeministrit. “Ndërsa raporti i pagës së arsimtarit të arsimit 9 vjeçar me pagën e kryeministrit që në vitin 2005 ka qenë 1 me 8.6, në vitin 2012 është vetëm 1 me 4.5. Raporti i pagës së infermierit me pagën e kryeministrit, që në vitin 2005 ka qenë 1 me 13, në vitin 2012 është 1 me 6.4 ”, theksoi zëdhënësja.