NJU JORK - Në raportin e gjerë të sekretarit të Përgjithshëm të OKB-së, që është publikuar në ueb-faqen në internet të Këshillit të Sigurimit të OKB-së, theksohet se gjatë periudhës 16 prill - 15 korrik 2012, përgatitjet dhe mbajtja e zgjedhjeve parlamentare dhe presidenciale dhe procesi i formimit të qeverisë në Serbi ka çuar në një zbrazëti të vazhdueshme në dialogun e lehtësuar nga Bashkimi Evropian ndërmjet Prishtinës dhe Beogradit, ndërsa dallimet në interpretimin e marrëveshjeve të arritura më parë kanë krijuar tensione në rritje në terren.

Megjithëse qeveria e Serbisë është përmbajtur në mbajtjen e zgjedhjeve të saj lokale në Kosovë, komunat Zveçan dhe Zubin Potok kanë vazhduar, pavarësisht vërejtjeve formale nga Beogradi, Prishtina dhe pjesa më e madhe e bashkësisë ndërkombëtare, me mbajtjen e zgjedhjeve të tyre të palejueshme në 6 maj.

Në raport thuhet se veriu i Kosovës tashmë është i dominuar nga Partia Demokratike e Serbisë dhe Partia Progresive.

Gjatë kësaj periudhe, autoritetet e Kosovës kanë vazhduar me përgatitjet, që ata i kanë përshkruar si “përfundim i mbikëqyrjes së pavarësisë”.

Rrjedhimisht, kjo nënkupton mbylljen e Zyrës Ndërkombëtare Civile, e krijuar për të mbikëqyrur implementimin e parimeve të Propozimit për Marrëveshjen Gjithëpërfshirëse, të cilën autoritetet e Kosovës e kanë mbështetur.

Ato, po ashtu, kanë vazhduar me përgatitjet për miratimin e pakos së reformave juridike, që duket se nuk e prekin nivelin e mbrojtjes institucionale për komunitetet në Kosovë, me përjashtim të heqjes së propozimit së një neni në Kushtetutë, që u referohet refugjatëve dhe personave të zhvendosur.

Këto reforma pritet ta heqin autoritetin ekzekutiv të organizatave ndërkombëtare në Kosovë.

Më 2 korrik, Grupi Ndërkombëtar Drejtues, i përbërë nga 25 vende që e kanë njohur Kosovën, kanë konkluduar se mandati i Zyrës Ndërkombëtare Civile do të përfundojë më vonë në vitin 2012, shkruhet në raportin e sekretarit të Përgjithshëm të OKB-së, Ban Ki-mun, i cili do të paraqitet në mbledhjen e Këshillit të Sigurimit për Kosovën.

Në raport vlerësohet se situata e sigurisë në Kosovën Veriore mbetet e ndjeshme. Tensionet shpërthyen kur KFOR-i ishte përpjekur të largonte bllokadën e rrugës në komunën e Zveçanit.

Protestuesit lokalë dhunshëm u konfrontuan me KFOR-in, i cili u përgjigj me forcë. Rrjedhimisht, dy ushtarë të KFOR-it dhe pesë serbë të Kosovës morën plagë nga të shtënat.

Më 4 korrik, vazhdon raporti, Komiteti i Krizës i strukturës komunale në Mitrovicën Veriore, i sponsorizuar nga Beogradi, protestoi kundër aksionit të KFOR-it dhe shpalli se anëtarët e EULEX-it nuk do të lejohen të lëvizin lirisht nëpër Mitrovicën Veriore.

Gjatë javëve në vazhdim, tensionet në mënyrë graduale u zvogëluan dhe EULEX-i ishte në gjendje të rimerrte qasjen në këtë hapësirë dhe të kryejë aktivitetet e veta normale.

Në kapitullin Vëzhgimit, sekretari i Përgjithshëm i OKB-së, pos të tjerash, shkruan se sheh me kënaqësi rezultatet konkrete që kanë dalë nga marrëveshjet e arritura në dialogun ndërmjet Prishtinës e Beogradit deri tani. Megjithatë, “jam i shqetësuar me vështirësitë në të cilat ka hasur implementimi i disave prej tyre”, thekson Ban Ki-mun.

Rrjedhimisht, ai i fton palët të demonstrojnë qëndrim konstruktiv në kapërcimin e problemeve të tilla dhe u bën thirrje ndërmjetësuesve që t’i kushtojnë kujdes më të madh dhe burime detajizimit të çështjeve të implementimit.

Ban Ki-muni, në fund të raportit të tij të gjatë, i falënderon partnerët e Kombeve të Bashkuara në Kosovë, KFOR-in, NATO-n, Bashkimin Evropian, OSBE-në dhe agjencitë e OKB-së për mbështetjen e tyre dhe për bashkëpunimin me misionin e OKB-s në Kosovë, UNMIK.

Europa e lirë/MA