TIRANË - Avokati i Popullit, Igli Totozani, i ka dërguar sot një rekomandim zyrtar kryeministrit Sali Berisha dhe ministrit të Brendshëm, Flamur Noka “për marrjen e masave mbi regjistrimin e pjesëtarëve të minoritetit rom në regjistrat e gjendjes civile në njësitë vendore ku ata kanë vendbanimin aktual”.

Pasi bën një parantezë të situatës së vështirë të këtij minoriteti, rekomandimi i Totozanit propozon disa ndryshime në ligje si; ai “Për Gjendjen Civile”, në mënyrë që brenda një afati të kufizuar kohor, të paktën 1-vjeçar, ata të lehtësohen nga afatet e parashikuara në ligj, si dhe t’iu njihet mundësia e regjistrimit apo ndryshimit të vendbanimit edhe nëse nuk plotësojnë dokumentacionin e parashikuar për këtë qëllim në gjendjen civile ku janë vendosur aktualisht. "Afati i propozuar prej institucionit të Avokatit të Popullit mund të vlerësohet nga institucioni juaj mbi mundësinë e zbatimit të tij në praktikë me qëllim integrimin në shoqëri të minoritetit rom."

Konkretisht, afati i regjistrimit, me ligj 30 ditë pas ardhjes në një vendbanim të caktuar. “Familjet që deklarohen se i përkasin minoritetit rom, të cilat do të regjistrojnë ndryshimin e vendbanimit, në banesa që nuk kanë statusin e vendbanimit, përjashtohen nga afati i përcaktuar në këtë pikë, deri në 31.12.2013.”, thuhet në propozim.

Ndërsa për sa i përket dokumentacionit, shprehimisht në shkresë thuhet: “Për familjet, të cilat deklarohen se i përkasin minoritetit rom, zyra e gjendjes civile në territorin e të cilës janë vendosur regjistron deklarimin e vendbanimit të tyre, edhe nëse nuk paraqesin dokumentacionin e përcaktuar në këtë pikë, të këtij neni.”
Gjithashtu ndryshime propozohen edhe në nene të caktuara mbi banesat që nuk kanë statusin e vendbanimit, janë banesa të ndërtuara si konstruksione të përkohshme dhe jo të qëndrueshme, përfshirë edhe ato në të cilat banon minoriteti rom.

M.Alla