Konfindustria i ka thënë qeverisë se duhet të përgatis sa më shpejt skenarin e rritjes së deficitit buxhetor të planifikuar për vitin 2012.

 Konfindustria tha se qeveria skenarin e rritjes së deficitit buxhetor duhet ta marrë seriozisht dhe si një nga mënyrat më të drejtpërdrejta për lehtësimin e krizës së thellë të likuiditetit, që vihet re në ekonominë shqiptare, sidomos e rënduar dhe me pasoja për industritë prodhuese vendore. 

Nëpërmjet një deklarate për mediat, Administratori i Përgjithshëm i Konfindustrisë, Gjergj Buxhuku shprehet se skenari i rritjes së defiçitit buxhetor duhet të përgatitet njëkohësisht dhe pavarësisht pritshmërisë për të ardhurat që do të sigurohen nga privatizimet strategjike të parashikuara në muajt e ardhshëm. 

Sipas tij, është e domosdoshme, që qeveria nëpërmjet manovrës në fjalë të marri përsipër, duke shlyer sa më shpejt, të gjitha detyrimet financiare kontraktuale të deritashme ndaj sipërmarrjes vendore. 

Konfindustria vlerëson, se gërshetimi i dyfishtë dhe i njëkohshëm nga njëra anë e uljes prej 27% të shpenzimeve kapitale të qeverisë në 6 mujorin e parë të vitit 2012 dhe rënien me 300% të rritjes së kreditimit nga sektori bankar e kane çuar ekonominë shqiptare në kushtet e një krize likuiditeti, që i bashkangjitet shkaqeve subjektive të uljes së besimit konsumator. 

Në kushtet e mësipërme është domosdoshmëri ndërhyrja e kombinuar e qeverisë dhe Bankës së Shqipërisë me qëllim injektimin e parave në ekonominë reale si nga të vetmet mënyra me qëllim sigurimin e likuiditetit të mjaftueshëm dhe sigurimin e rritjes ekonomike të planifikuar. 

Norma i inflacionit prej 1.9% për 6 mujorin e parë brenda parashikimeve të Bankës së Shqipërisë lejon plotësisht kryerjen e politikave monetare të sipërpërmendur. 

Konfindustria mendon, se në të njëjtën kohë qeveria Shqiptare duhet të vlerësoj dhe përgatitjen e një strategjie të plotë dhe afatgjatë për vënien me efektivitet në funksion të ekonomisë reale të sasive të mjaftueshme të rezervave monetare në zotërim të sektorit bankar shqiptar, që në mënyrë të paarsyeshme ndodhen në prehje pikërisht në kohën kur janë të domosdoshme për përballimin e pasojave të krizës globale në vend.