TIRANË - Riaktivizim i task-forcës për rishikimin e lejeve dhe licencave. Këtë ka urdhëruar sot ministri i Ekonomisë Tregtisë dhe Energjitikës, Edmond Haxhinasto, nisur prej prej problematikave të hasura kohët e fundit në minierat e vendit.
Kjo deklaratë e kreut të METE u bë në një takim me përfaqësues nga disa prefektura të vendit, përfaqësues të AKBN-së, RISHM, Drejtorisë së Përgjithshme të Policisë, si dhe përfaqësues nga sektori privat në këtë industri.

“Riaktivizim i task-forcave në të gjitha qarqet ku ushtrohet sektori minerar për monitorimin e rreptë ndaj çdo operatori për sa i përket lejes për ushtrim aktiviteti, sigurisë dhe standardeve të kushteve të punës, si dhe ruajtjes së standardit mjedisor.”, u shpreh Haxhinasto. Duke nënvizuar domosdoshmërinë e koordinimit dhe bashkëpunimit të gjitha institucioneve për rritjen e efikasitetit të punës dhe realizimin e një standardi të ri në këtë sektor, siç e cilësoi, ndër më të rëndësishmit në vend.

Po kështu Haxhinasto tha se do të vëzhgohen në mënyrë të prerë edhe investimet e bëra nga operatorët, për rritjen e kapaciteteve me qëllim rritjen e prodhimit. Ministri i ka bërë dhe një panoramë ecurisë së sektorit minerar gjatë 2011, ku ka numëruar 7.8 milionë ton prodhim dhe rreth 340 milionë euro fitime nga eksporti. Duke vlerësuar dhe interesin e investitorëve në këtë industri, ai tha se, po gjatë 2011 janë dhënë 1600 leje minerale, ndërsa janë hapur 9800 vende pune.

MA